Luc

4 Jézi, ki té plen ké lèspri sen, lésé Jourden-an é lèspri sen-an gidé l’ annan dézèr-a 5 Atò Djab-a mennen li roun koté ki rot, é annan roun ti moman, i montré li tout rwayonm asou latè-a. 6 É i di li : « Mo ké bay to tout sa pouvwar-a ké laglwar sa rwayonm-yan, pas yé bay mo sa pouvwar-a é mo ka bay moun mo lé. 7 Donk, si to ka mété to jounou atè pou adoré mo, mo ké bay to tout sa bagaj-ya. » 8 Jézi réponn li : « Men sa ki ékri : “A Jéova to Bondjé to divèt adoré, é a li rounso to divèt bay roun sèrvis sakré.” » 13 Kou Djab-a té fin tanté Jézi, i lésé l’ jiktan i trapé rounòt moman. 16 Épi i alé Nazarèt, koté i té lévé, é jou saba-a, i antré annan sinagòg-a kou i té gen labitid. Lò i lévé pou li, 17 yé bay li roulo profèt Izayi-a. I louvri roulo-a é i trouvé koté i té marké : 18 « Lèspri Jéova-a asou mo, paské i chwazi mo pou bay sa-ya ki maléré bon nouvèl. I voyé mo pou di prizonyé-ya ki yé ké libéré é pou di sa-ya ki pa ka wè ki yé wéy ké louvri byen gran, pou libéré sa-ya ki krazé, 19 pou mo préché lannen Jéova ka bay nou so favèr. » 20 Apré sa, i fronmen roulo-a, i roubay sèrvitèr-a roulo-a é i alé asiz. É tout moun, annan sinagòg-a té ka gadé l’. 21 Atò, i di yé : « Jòdla, sa mo fin li pou zòt annan Ékritir-ya, fèt. » 22 Yé tout koumansé di bon bagaj asou li. Lò yé tandé bèl paròl i té ka di, yé té èstébékwé. É yé té ka di ant yé : « A roun pitit Jozèf ki la, pa vré ? » 23 Atò i di yé : « Mo sir ki zòt ké di sa asou mo : “Dòktèr, géri to kò to menm.” É zòt ké di mo : “Nou tandé sa to fè Kafarnaòm. Atò, fè menm bagaj-a isi osi, annan topa koté.” » 24 I di yé osi : « Mo ka di zòt lavérité, i pa gen pyès profèt yé ka asèpté annan sopa koté. 25 Sa mo ka di zòt, a lavérité : pannan lépòk Éli, i té gen bokou vèv annan péyi Israyèl, lò i pa té gen pyès lapli pannan trwa lannen ké sis mwa, é roun lafamin fè gro déga annan tout péyi-a. 26 Pourtan, Bondjé pa voyé Éli alé wè pyès annan sa madanm-yan. A sèlman koté vèv-a ki té ka rété Sarèpta, annan péyi Sidon-an, i voyé l’. 27 Annan lépòk Élizé, i té gen bokou moun ki té gen lalèp annan péyi Israyèl. Pourtan, Bondjé pa géri pyès annan yé ; a sèlman Naaman, Siryen-an, Bondjé géri. 28 Lò yé tandé sa, tout sa-ya ki té annan sinagòg-a lévé faché. 29 Yé lévé é yé fè l’ soti di vil-a.Yé mennen li laro tèt montangn-an koté yé vil té fika pou jité li tèt anba. 30 Mé i pasé anmitan yé é i kontinyé so chimen. 43 Mé i di yé : « Mo divèt alé préché bon nouvèl rwayonm Bondjé-a annan ròt vil-ya osi, paské a pou sa Bondjé voyé mo. »