Hébreux
10 Wi, kou a réprézanté Lalwa-a ka réprézanté bon bagaj ki gen pou vini dimen, mé a pa vré bagaj-ya ki la, i pa janmen pouvé fè sa-ya ki ka vini òbò Bondjé vin parfè grasa sakrifis-ya yé ka kontinyé fè chak lannen. 2 Si a té sa, ès nou pa té ké arété fè sa sakrifis-ya ? Paské, si sa-ya ki ka fè roun sèrvis sakré té ka vin pròp, yé pa té ké savé ki yé ka péché. 3 Sa sakrifis-ya ka pito fè nou sonjé nou péché lannen apré lannen, 4 paské ni disan béf ni disan kabrit pa pouvé tiré péché-ya. 5 A pou sa, lò i ka antré annan monn-an, i ka di : « “To pa asèpté ni sakrifis, ni ofrann, mé to préparé roun kò pou mo. 6 To pa asèpté ni sakrifis yé ka boulé nèt, ni sakrifis pou péché-a.” 7 Alòr mo di : “Gadé ! Mo ka vini (men sa ki marké asou mo annan roulo-a) pou fè to volonté, o Bondjé !” » 10 Grasa sa « volonté-a », Bondjé ka sanktifyé nou grasa Jézi Kris ki bay so kò rounsèl kou pou tout-tan. 12 Mé sa mouché-a fè rounsèl sakrifis pou péché-ya pou tout-tan é i asiz òbò Bondjé, a so drèt, 22 annou vini òbò Bondjé ké tout nou tchò épi ké roun lafwa ki antchè, ké roun tchò ki pròp paské nou pa gen roun mové konsyans ankò, ké roun kò ki lavé ké roun dlo ki pròp. 23 Annou kontinyé fè tout moun savé ki nou gen sa èspwar-a, san nou pa moli, paské sa-la ki fè nou sa promès-a, i fidèl. 24 É annou gadé roun pou ròt pou nou idé nou konpanyen gen lanmou é fè bèl bagaj ; 25 épi annou pa lésé nou réinyon-yan, kou sèrten gen labitid, mé annou ankourajé nou konpanyen, plis ankò paské zòt ka wè jou-a ka rivé. 26 Paské si nou ka péché parèsprè apré nou rousouvwè vré konésans lavérité-a, i pa ka rété pyès sakrifis pou péché-ya ankò, 33 Détan, a zòt yé té ka jouré douvan tout moun é yé té ka pèrsékité, é détan, a zòt ki idé sa-ya ki té annan sa kalité éprèv-ya. 35 Donk, kontinyé palé ké kouraj paské sa ké fè zòt gen roun gro rékonpans. 36 Paské zòt bézwen tchenbé, konsa apré zòt fè sa Bondjé lé, zòt ké rousouvwè sa i promèt-a. 37 Paské « roun tibi tan » ankò, é « sa-la ki ka vini ké rivé, é i pa ké an rétar ». 38 « Mé mo sèrvitèr ki jis ké viv paské i gen lafwa », é « si i ka bat dèyè, mo pa kontan li ». 39 Mé, nou menm nou pa annan sa-ya ki ka bat dèyè pou Bondjé détrwi yé, mé nou annan sa-ya ki gen lafwa pou sové yé lavi.