Marc
17 Pas a Éròd li menm ki té bay lòrd arété Jan, maré l’ ké chen épi jité l’ lajòl, akoz di Érodyad, madanm so frè Filip. Pas Éròd té maryé ké Érodyad, 18 é Jan té ka di li : « To pa gen drwa pran madanm to frè. » 19 Érodyad té swèf li é i té ka chaché tchwé l’. Mé i pa té pouvé fè l’ 20 pas Éròd té pè Jan. — i té savé ki a té roun wonm ki té jis ké sen — é i té ka protéjé l’. Chak fwa i té ka kouté l’ i pa té savé sa pou fè. Mé i té ka kontinyé pran plézi kouté l’. 30 Apot-ya rasanblé yé kò bò d’ Jézi é rakonté l’ tout sa yé té fè ké ansényé. 31 É i di yé : « Annou alé annan roun koté i pa gen moun, pou zòt pozé zòt kò moso. » Kou i té gen roun patché moun ki té k’alé vini, yé pa menm té gen tan pou manjé. 32 A konsa yé pran roun bato pou alé roun koté i pa té gen moun, pou yé té pouvé rété yé tousèl. 33 Mé moun-yan wè yé pati, é roun patché ròt moun anprann sa. Moun di tout vil-ya kouri jis laba, é yé rivé anvan yé. 34 Lò i soti annan bato-a, Jézi wè roun patché moun é i koumansé gen pityé pou yé, paské yé té kou mouton ki pa gen bèrjé. Alòr i koumansé anprann yé roun patché bagaj. 35 Kou i té ja ta, so disip-ya vini di li : « Sa koté-a lwen di vil-ya é lèr-a ka vansé. 36 Di moun-yan alé annan bitasyon-yan ké vilaj-ya ki alantou pou yé achté roun bagaj pou yé manjé. » 37 I réponn yé : “Bay yé manjé zòt menm.” Mé yé doumandé l’ : “Ès a pou nou achté 200 dényé dipen é bay moun-yan sa pou manjé ?” 38 I di yé : “Alé gadé konmyen dipen zòt gen.” Apré yé alé gadé, yé di li : “Nou gen senk dipen ké dé poson.” 39 Apré sa, i doumandé moun-yan fè plizyèr group épi asiz atè asou radyé-a. 40 Yé fè group di 100 moun ké group di 50 moun é yé asiz atè. 41 I pran senk dipen-yan ké dé poson-yan, i lévé so wéy pou gadé laro syèl-a épi i fè roun lapriyè. Apré sa, i kasé dipen-yan é koumansé bay disip-ya, pou yé bay moun-yan. I partajé osi dé poson-yan ké tout moun. 42 A konsa tout moun manjé plen yé vant. 43 Yé ranmasé dipen-yan ki té ka rété : yé plen 12 panyen — san menm konté poson-yan. 44 5 000 wonm manjé dipen. 50 Pas yé tout té ka wè l’ é yé té pè. Mé lanmenm i di yé : « Pran kouraj, a mo ! Pa bézwen pè. » 51 Épi i monté ké yé asou bato-a, épi van-an tonbé. Atò yé rété ababa. 52 Yé pa té konprann sa mirak ké dipen-yan té lé di. Yé té ka pran tan pou konprann.