Proverbes

2 Moun-yan krè ki tousa yé ka fè jis, mé Jéova ka wè sa ki ka fè yé aji. 3 Mété tousa to ka fè annan lanmen Jéova, é sa to ka prévwè fè ké maché. 4 Jéova fè sa ki fo pou tout bagaj alé annan sans so projè, menm méchan-yan ki ké trapé yé pinisyon pannan jou malò-a. 6 Grasa so bonté ké so fidélité, Bondjé ka pardonnen nou fot, é lò roun moun ka krenn Jéova, i ka tounen so do bay sa ki mové. 7 Lò Jéova kontan sa roun moun ka fè, i ka fè lèlmi sa moun-an viv byen ké li, annan lapè. 18 Òrgèy-a ka fè moun tonbé, é roun moun ki ka krè so kò ké fè roun mové bagaj. 20 Sa la ki ka montré i pèrspikas annan roun bagaj ké rivé, é sa-la ki ka fè Jéova konfyans, so tchò kontan. 21 Sa-la ki saj, yé ké di a roun moun ki entélijan, é sa-la ki gen paròl ki dous ka rivé fè moun krè sa i ka di ké plis fòrs. 22 Sa-ya ki gen bon tèt ka trapé lavi ; mé sa-ya ki tèbè, yé pinisyon, a bagaj sòt yé ka fè. 23 Tchò roun moun ki gen sajès ka fè l’ palé ké entélijans é ka bay so paròl plis fòrs. 24 Paròl ki agréyab, yé kou myèl, yé dous pou nanm-an é a roun rémèd pou zo-ya. 25 Roun moun pouvé krè ki roun chimen bon, mé annan bout sa chimen-an, i gen lanmò. 28 Roun moun ki kontan briga ka lévé blo, é roun moun ki ka malpalé asou ròt-ya pou sali yé répitasyon ka fè bon zanmi faché. 31 Chivé blan-yan kou roun bèl kouròn lò yé asou chimen lajistis-a. 32 Sa-la ki pa ka kouri faché pi bon pasé roun wonm vayan, é sa-la ki ka métrizé so kò lò i kòlè pi bon pasé sa-la ki ka pran roun vil.