Psaume

34 A tout tan mo lé louwé Jéova, a toulong mo bouch ké louwé li. 2 A parapòrta Jéova mo ké gonflé mo lèstomak ; sa-ya ki gen imilité ké tandé é yé tchò ké kontan toubonnman. 3 Vini ansanm ké mo pou bay Jéova laglwar ; annou louwé so non nou tout ansanm ! 4 Mo doumandé Jéova, é i réponn mo. I libéré mo di tousa ki té ka fè mo pè. 7 Zanj Jéova-a ka protéjé tout sa ki gen lakrent pou Jéova é i ka délivré yé. 8 Vini gouté épi zòt ké wè ki Jéova bon, moun-an ki ka kouri séré òbò l’, so tchò kontan. 9 A pou zòt gen lakrent pou Jéova, zòt tout so sen-yan, pas sa-ya ki gen lakrent pou li pa ka manké anyen. 10 Menm jenn lyon-yan ki fò pa té gen anyen pou manjé ankò, mé sa-ya ki ka chaché Jéova pa ké manké anyen ki bon. 11 Vini, mo pitit, kouté mo ; mo ké anprann zòt krenn Jéova. 12 Kimoun annan zòt ka pran plézi viv é té ké kontan viv lontan ké tchò kontan ? 13 Alòr, véyé pou to pa sèrvi to lang pou di mové bagaj, é véyé pou to pa sèrvi to bouch pou manti. 14 Tounen to do bay sa ki mové é fè sa ki byen ; chaché lapè é fè tousa to pouvé pou to trouvé l’. 15 Wéy Jéova asou moun ki jis é so zorè ka kouté lò yé ka aplé l’ pou i idé yé. 16 Mé vizaj Jéova kont sa-ya ki ka fè sa ki mové, pou fè yé disparèt di latè-a é pou pyès moun pa sonjé yé ankò. 17 Sa-ya ki jis, yé rélé é Jéova tandé ; i délivré yé di tout yé malò. 18 Jéova pròch di sa-ya yé tchò krazé ; i ka sové sa-ya ki dékourajé. 19 Moun-an ki jis gen patché éprèv, mé Jéova ka libéré li di tout sa éprèv-ya. 20 I ka protéjé tout so zo ; yé pa menm krazé rounsèl annan yé. 22 Jéova ka viré achté lavi so sèrvitèr-ya ; é annan sa-ya ki ka chaché sékour koté li yé pyès pa koupab.