2 Corinthiens

6 Kou nou ka travay ansanm ké Bondjé, nou ka di zòt osi pa pran favèr Bondjé nou pa mérité-a épi pa fè sa zòt divèt fè apré. 2 Paské i ka di : « Annan roun lépòk mo té ka bay mo favèr, mo tandé to, é pannan roun tan pou délivrans, mo sové to. » Gadé ! Men tan-an ki bon menm. Gadé ! Men jou délivrans-a rivé. 3 Nou pa ka fè anyen ki pouvé fè moun tribiché, pou yé pa kritiké nou ministèr ; 4 mé annan tout domenn, nou ka montré ki nou sa dé minis Bondjé, paské nou ka kontinyé tchenbé anba rounlo éprèv, malò, soufrans, difikilté, 5 kou, lajòl, lò i gen dézòrd, annan travay ki rèd, lò nou pa ka dronmi lannwit, lò nou pa gen manjé, 6 paské nou ka rété pròp, nou ka aji soulon konésans-a, nou gen pasyans, nou gen bonté, nou ka lésé lèspri sen gidé nou, nou lanmou san ipokrizi, 7 nou ka di lavérité, paské nou ka konté asou pwisans Bondjé, grasa zarm lajistis-a, sa-ya ki annan nou lanmen drèt ké sa-ya ki annan nou lanmen goch, 8 annan laglwar ké annan mépri, ki nou gen bon ki nou gen mové répitasyon. Yé ka wè nou kou dé moun ka bloublou moun é pourtan, a lavérité nou ka di, 10 kou moun ki tris, mé nou toujou gen tchò kontan, kou maléré, mé nou ka fè patché moun divini rich, kou moun ki pa gen anyen, mé pannan sa tan-an, nou gen tout bagaj. 11 Zòt moun Korent, nou palé pou zòt franchman, é nou louvri nou tchò gran pou zòt. 12 Nou pa chis ké lanmou nou gen pou zòt, mé zòt menm zòt chis ké lanmou zòt gen pou nou. 13 Atò, menm fason nou kontan zòt — mo ka palé pou zòt kousidiré zòt sa mo timoun — zòt menm osi, louvri zòt tchò gran. 14 Pa alé mété zòt kò ké pyès moun ki pa ka krè annan Bondjé. Paské kisa lajistis gen ka wè ké sa ki kont lalwa ? Ouben kisa limyèr-a gen ka wè ké soukou ? 15 Ouben kouman Kris pouvé maché ké Bélyal ? Ouben ankò, kisa roun moun ki ka krè gen ka wè ké roun moun ki pa ka krè ? 16 É kisa tanp Bondjé-a gen ka wè ké zidòl-ya ? Paské nou sa tanp roun Bondjé ki vivan ; kou Bondjé di : « Mo ké rété anmitan yé é mo ké maché anmitan yé, é mo ké sa yé Bondjé, é yé ké sa mo pèp. » 17 « A pou sa, soti anmitan yé, é séparé zòt kò di yé, a sa Jéova ka di, é arété manyen bagaj ki pa pròp-a » ; « é mo ké rousouvwè zòt. » 18 « Mo ké divini roun papa pou zòt, é zòt ké divini mo tifi ké mo tibolonm”, a sa Jéova ka di, Tou-Pwisan-an. »