2 Corinthiens

5 Pas, dapré mo, mo pa janmen montré zòt ki mo pi fèb ki zòt apòt ki ka krè yé pi fò pasé pyès moun. 6 Menmsi mo pa ka palé byen, sa pa lé di mo pa gen konésans. Nou byen montré zòt sa annan tousa nou fè. 14 É sa pa ka étoné nou, paské Satan li menm ka dégizé toulong pou fè kousidiré i té sa roun zanj limyèr. 23 Ès yé sa minis Kris ? Kou roun moun ki pédi so tèt mo ka réponn wi mo sa roun minis ankò plis : mo travay pasé yé, yé mété mo lajòl pi souvan pasé yé, mo pa pouvé konté konmyen kou mo pran, é plizyèr fwa mo manké mouri. 24 Senk fwa Jwif-ya bay mo 40 kou mwens roun, 25 trwa fwa yé bat mo ké baton, roun fwa yé voyé ròch asou mo pou tchwé mo, trwa fwa lò mo té annan roun bato i chalviré, mo rété roun lannwit ké roun jou anmitan lanmè-a ; 26 mo té ka vwayajé souvan, mo té souvan an danjé akoz di larivyè, an danjé akoz di volèr-ya, an danjé akoz di moun di mo pèp, an danjé akoz di moun nasyon-yan, an danjé annan vil-a, an danjé annan dézèr-a, an danjé asou lanmè, an danjé anmitan fo frè-ya ; 27 mo savé a kisa ki travay rèd ké fè bokou éfòr, mo pasé bokou lannwit san dronmi, mo té fen ké swèf, souvan i pa té gen anyen pou manjé, souvan mo té frèt é mo pa té gen lenj. 28 Anplis di sa bagaj-ya, i gen sa ki ka troumanté mo touléjou, mo ka enkyété mo kò pou tout asanblé-ya.