Luc

5 Roun jou, Jézi té ka ansényé roun patché moun paròl Bondjé òbò lak Jénézarèt. Yé té ka rété kolé òbò li. 2 É i wè dé bato òbò lak-a ; mé péchèr-ya té désann di bato-ya é yé té ka nétwayé yé tramay. 3 I monté annan roun bato, a té bato Simon, é i doumandé l’ alé roun tibi pi lwen asou dlo-a. Apré sa, i asiz annan bato-a, é i koumansé ansényé moun-yan. 4 Lò i fin palé, i di Simon : « Alé koté dlo-a fon, épi lagé zòt tramay pou zòt péché. » 5 Simon réponn li : « Ansényan, nou travay rèd tout lannwit san nou pa trapé anyen. Mé kou to ka doumandé mo fè l’, mo ké lagé mo tramay. » 6 Enben lò yé fè sa, yé tchenbé roun patché poson. Anfèt, yé tramay té ka déchiré. 7 Donk, yé doumandé yé asosyé ki té annan ròt bato-a vini idé yé. Yé vini, é kou dé bato-ya té plentim, yé té ka anfonsé annan dlo-a. 8 Lò i wè sa, Simon Pyèr tonbé a jounou douvan Jézi é i di li : « Pa rété òbò mo, Sényèr, paské mo sa roun wonm plen ké péché. » 9 Paské li ké tout sa ki té la ké li té rété èstébékwé douvan kantité poson yé té pran ; 10 Jak ké Jan osi té annan menm léta-a, a té pitit Zébédé, é yé té ka travay ké Simon. Mé Jézi di Simon : « Pa pè konsa. Aprézan, a moun to ké tchenbé tou vivan. » 11 Yé kòsté bato-ya, yé lésé tout yé bagaj la é yé swiv li. 16 Mé i té k’alé souvan koté i pa té gen moun, pou i té pouvé priyè. 30 Alòr, farizyen-yan ké èskrib-ya koumansé kritiké so disip é yé di yé : « Poukisa zòt ka manjé ké bwè ké sa-ya ki ka ranmasé enpo é ké moun ki ka fè péché ? » 31 Jézi réponn yé : « A pa moun ki gen bon lasanté ki bézwen dòktèr, mé a sa-ya ki malad. 32 Mo pa vini pou di moun ki jis répanti, mé mo vini pou di moun ki ka fè péché répanti. »