Révélation

2 É mo wè rounòt zanj monté, i té ka vini di koté solèy-a ka lévé, i té ka tchenbé roun so di Bondjé ki vivan-an annan so lanmen ; é, pou kat zanj-ya ki rousouvwè pouvwar pou yé té pouvé krazé latè-a ké lanmè-a, i rélé fò : 3 « Pa fè ni latè-a ni lanmè-a pyès méchansté, ni pyébwa-ya non plis, jiktan nou mété mark-a asou fron tout èsklav nou Bondjé. » 4 É mo tandé asou konmyen moun yé mété roun mark : 144 000 moun yé chwazi annan tout ti nasyon pitit Israyèl : 9 Apré sa, mo wè, épi gadé ! roun patché moun pyès moun pa té pouvé konté, moun tout nasyon, ti nasyon kou gran nasyon, ké pèp ké lang. Yé té dibout douvan tronn-an ké douvan Timouton-an, ké gran ròb blan anlè yé ; é yé té gen féy palmyé annan yé lanmen. 10 É yé pa té ka arété rélé fò : « A grémési nou Bondjé ki asiz asou tronn-an, ké Timouton-an, si nou gen délivrans-a. » 11 Tout zanj-ya té dibout alantou tronn-an, ansyen-yan ké kat kréyatir vivan-yan, é yé mété yé jounou atè douvan tronn-an é yé adoré Bondjé, 12 yé té ka di : « Anmèn ! Louwanj, laglwar, sajès, rékonésans, lònò, pwisans ké fòrs, a pou nou Bondjé, pou tout-tan. Anmèn » 13 Alòr roun annan ansyen-yan doumandé mo : « A kimoun sa moun-yan ké gran ròb blan, é koté yé soti ? » 14 É lanmenm mo réponn li : « Mo sényèr, a to ki savé. » É i di mo : « A sa-ya ki soti annan gran tribilasyon-an, é yé lavé yé gran ròb é yé fè yé vin blan annan disan Timouton-an. 15 A pou sa yé douvan tronn Bondjé-a, é yé ka bay li roun sèrvis sakré lannwit kou jou annan so tanp ; é sa-la ki asiz asou tronn-an ké louvri so tant asou yé. 16 Yé pa ké fen ankò, é yé pa ké swèf ankò, é ni solèy-a ni pyès chalò pa ké krazé yé, 17 paské Timouton-an ki anmitan tronn-an, ké sa yé bèrjé é i ké mennen yé òbò sours dlo lavi-a. É Bondjé ké swiyé tout yé dlo wéy. »