Genèse

1 O koumansman, Bondjé kréyé syèl-a ké latè-a. 2 Latè-a pa té gen pyès fòrm é i pa té gen anyen asou l’, é soukou-a té ka kouvri dlo-ya ; é fòrs Bondjé ka sèrvi pou fè sa i lé té ka déplasé anlè dlo-ya. 3 É Bondjé di : « A pou i gen limyèr. » Épi limyèr-a parèt. 10 Bondjé aplé latè-a « latè », mé i aplé tout dlo-ya ansanm « lanmè ». É Bondjé wè ki sa té bon. 20 Apré sa, Bondjé di : « A pou dlo-ya plen ké zannimo, é a pou zannimo ki gen zèl volé laro, anmitan syèl-a. » 21 É Bondjé koumansé kréyé gran zannimo ki annan lanmè-a é tout patché zannimo ki ka viv anba dlo-a, soulon yé ras, ké tout zannimo ki gen zèl é ki ka volé, soulon yé ras. É Bondjé wè ki sa té bon. 24 Apré sa, Bondjé di : « A pou latè-a bay zannimo soulon yé ras : zannimo kaz, zannimo ki ka ralé asou yé vant ké zannimo sovaj di latè-a, soulon yé ras. É a konsa bagaj-ya fèt. 25 Bondjé koumansé fè zannimo sovaj di latè-a soulon yé ras, zannimo kaz soulon yé ras ké tout zannimo ki ka ralé asou yé vant soulon yé ras. É Bondjé wè ki sa té bon. 26 Apré sa, Bondjé di : « Annou fè wonm-an kou nou menm, pou i sanblé nou, annou fè li koumandé poson lanmè-a, zannimo ki gen zèl annan syèl-a, zannimo kaz, tout latè-a ké tout zannimo ki ka ralé asou yé vant é ki ka maché asou latè-a. » 27 É Bondjé koumansé kréyé wonm-an kou li menm ; Bondjé kréyé l’ kou li menm. I fè yé wonm ké fanm. 28 Apré sa, Bondjé béni yé é i di yé : « Fè pitit é divini bokou ; plen latè-a é okipé di li ; koumandé poson ki annan lanmè-a, zannimo ki ka volé annan syèl-a ké tout zannimo ki ka maché asou latè-a. » 31 Apré sa, Bondjé gadé tousa i té fè é i wè ki sa té bon toubonnman. Aswè pasé, bonmanten pasé : sizyèm jou.