Jacques

7 Atò, a pou zòt gen pasyans, mo frè-ya, jik prézans Sényèr-a rivé. Gadé ! Sa-la ki ka travay latè ka antann sa latè-a ké bay, i ka antann ké pasyans jistan prémyé sézon lapli ké dèrnyè sézon lapli-a rivé. 8 Zòt osi a pou zòt gen pasyans ; fè zòt tchò vin pi fò, paské prézans Sényèr-a tou pròch rivé. 10 Mo frè-ya, pou zafè tchenbé anba éprèv ké pran pasyans, pran èkzanp asou profèt-ya ki palé annan non Jéova. 11 Gadé ! Nou ka di ki sa-ya ki tchenbé, yé tchò kontan. Zòt tandé kouman Jòb tchenbé é zòt wè sa Jéova fè pou li lò tout bagaj té fini, é zòt wè ki Jéova gen bokou lanmou pou nou, i plen ké pityé é i lé pardonnen nou. 13 Ès i gen roun moun annan zòt ki annan traka ? A pou i priyè. Ès i gen roun moun ki kontan ? A pou i chanté kantik. 14 Ès i gen roun moun ki malad ? A pou i aplé ansyen-yan annan asanblé-a pou yé vini wè l’, é a pou yé priyè pou li, toupannan yé ka mété dilwil asou l’ annan non Jéova. 15 É lapriyè yé ké fè ké lafwa ké fè sa-la ki malad viré byen, é Jéova ké lévé l’. Anplis di sa, si i péché, Bondjé ké pardonnen l’. 16 Pa pè di zòt konpanyen ki péché zòt fè, épi priyè pou zòt konpanyen, pou zòt géri. Lò roun moun ki jis ka priyè pou sipliyé Bondjé, a roun bagaj ki pwisan. 17 Éli té sa roun wonm ki té gen menm santiman ki noupa, é magré sa, lò i priyè ké tout so fòrs pou lapli pa tonbé, lapli-a pa tonbé asou péyi-a pannan trwa lannen ké sis mwa. 18 Épi i priyè ankò, é lapli tonbé, é latè-a bay manjé. 19 Mo frè-ya, si roun annan zòt ka pati lwen di lavérité épi rounòt ka fè li rouvin, 20 a pou zòt savé ki sa-la ki ka fè roun péchèr rouvini asou bon chimen-an ké sové l’ di lanmò-a é i ké kouvri roun patché péché.