Proverbes

3 Pa bay fanm-yan to fòrs, é panga pran menm chimen ki fè roun patché rwa mouri. 4 O Lémouwèl, a pa rwa-ya ki divèt bwè diven é a pa chèf-ya non plis ki divèt di : « Bay mo roun bagaj pou bwè ! » 5 Pas si yé ka fè sa, yé ké bwè épi yé ké bliyé lalwa-a, é yé pa ké bay piti-ya sa yé divèt gen. 6 Bay sa ki ké mouri alkòl épi diven pou sa ki ka soufri séryé. 8 Si roun moun pa pouvé palé, palé a so plas, défann tout sa ki ké mouri. 9 Palé épi jijé ké jistis, défann sa-ya ki pi fèb ké sa-ya ki maléré. 10 Kimoun ki pouvé trouvé roun madanm ki djòk ? Roun madanm konsa gen lontan plis valò pasé koray ! 11 So mari ka fè li konfyans ké tout so tchò é i gen tousa i bézwen. 12 Chak jou di so lavi, i ka rékonpansé so mari ké bon bagaj, i pa ka fè li soufri. 13 I ka alé chaché lalèn ké len, i kontan travay ké so dé lanmen. 14 I kou bato-ya roun marchan ganyen, i ka fè so manjé soti di roun koté ki lwen. 15 Anplis di sa, i ka lévé lò jou pòkò louvri, i ka bay so fanmi manjé é i ka bay so sèrvant yépa. 16 I ka désidé gen roun bati é i ka achté l’, i ka rivé planté roun patché pyé rézen paské i travay rèd. 17 I ka préparé so kò pou fè roun travay ki rèd ké so dé lanmen. 18 I ka wè kouman so ti komèrs ka fè li gen roun bon ti soumaké ; lannwit so lalanp pa ka étenn. 19 So dé lanmen ka tchenbé baton-an pou fè fil é i ka pran bobin-an pou fè fil. 20 I ka bay sa-ya ki pi fèb anba bra é i ka bay maléré-ya san konté. 21 I pa enkyèt pou so fanmi lò i gen lanèj, pas tout so fanmi gen lenj ki ka anpéché yé frèt. 22 A li menm ki ka fè so dra. So lenj fèt ké len épi ké lalèn vyolèt. 23 Yé byen konnèt so mari douvan lapòt vil-a, a la i ka asiz anmitan ansyen-yan annan péyi-a. 24 I ka fè é i ka vandé lenj fèt ké len, i ka fè sentir pou bay marchan-yan. 25 I gen fòrs ké prèstans. I pa pè sa dimen ké poté. 26 Lò i ka louvri so bouch, i ka palé ké sajès ; lò i ka ansényé, i ka palé ké bonté. 27 I ka véyé sa ki ka pasé annan so kaz, é i pa fenyan. 28 So pitit-ya ka lévé é ka di tout moun i gen tchò kontan ; so mari ka lévé, é i ka di tout bèl bagaj i ka pansé di li. 29 I gen kantité bon madanm, mé to, to pi bon pasé yé tout. 30 Roun madanm pouvé jòlòt épi anyen pa la é tout bèl i bèl i pitèt pa ké rété bèl lontan ; mé yé ké di bon bagaj asou roun madanm ki gen lakrent pou Jéova. 31 Bay li roun rékonpans pou sa i ka fè, é, douvan lapòt vil-a, a pou yé félisité l’ pou so travay !