Matthieu
6 « Pa fè bèl bagaj jis pou fè moun wè. Sinon zòt Papa ki annan syèl-a pa ké béni zòt. 2 Atò, lò to ka fè bèl bagaj pou ròt-ya, pa alé di tout moun sa to ka fè. Paské a sa ipokrit-ya ka fè lò yé k’alé adoré Bondjé annan yé koté épi lò yé annan lari-ya. Yé ka fè sa pou moun-yan poté yé anlè. Zòt pouvé sir di sa mo ka di zòt, yé ja trapé sa yé té lé é Bondjé pa ké bay yé anyen. 3 Mé to menm, lò to ka fè bèl bagaj pou ròt-ya, pa di pyès moun sa to ka fè. 4 Moun-yan pa bézwen savé tout bèl bagaj to ka fè. To Papa ka wè tousa to ka fè é i ké béni to. 5 « Anplis di sa, lò zòt ka priyè, pa fè kou ipokrit-ya. Lò yé ka priyè, yé kontan mété yé kò koté tout moun pouvé wè yé, ki a koté yé ka adoré Bondjé, ki a annan lari-a. Zòt pouvé sir di sa mo ka di zòt, yé ja trapé sa yé té lé é Bondjé pa ké bay yé anyen. 6 Mé to, lò to lé priyè, alé roun koté i pa gen moun épi priyè to Papa. Pyès moun pa ka wè sa to ka fè, mé li, i ka wè tout bagaj é i ké béni to. 7 Lò zòt ka priyè, pa toujou répété menm bagaj-a. Moun-yan ki pa konnèt adoré Bondjé, a sa yé ka fè. Yé konprann di Bondjé ké kouté yé paské yé annan roun lapriyè ki pa ka fini. 8 Pa fè kou yé paské zòt Papa savé sa zòt bézwen anvan menm zòt doumandé l’. 9 « Men kouman zòt divèt priyè : « “Nou Papa ki annan syèl-a, nou ka priyè pou moun-yan rèspèkté to non. 10 Nou ka priyè pou to gouvèrnman dirijé latè-a é pou to volonté fèt asou latè-a, kou i ja ka fèt annan syèl-a. 11 Souplé, bay nou manjé-a nou bézwen pou jòdla ; 12 pardonnen nou pou sa nou ka fè ki pa bon, menm fason nou ja pardonnen sa-ya ki fè nou mové bagaj. 13 É souplé, idé nou lò nou ka riské fè roun bagaj ki pa bon, é protéjé nou kont Djab-a.” 14 « Si zòt ka pardonnen ròt-ya lò yé ka fè zòt bagaj ki pa bon, zòt Papa ki annan syèl-a ké pardonnen zòt osi. 15 Mé si zòt pa ka pardonnen ròt-ya lò yé ka fè zòt mové bagaj, zòt Papa pa ké pardonnen zòt nonplis lò zòt ké fè roun bagaj ki pa bon. 16 « Lò zòt désidé rété san manjé, pa fè kousidiré zòt ka wè mizè kou ipokrit-ya ka fè. Yé ka fè kousidiré yé gen lapenn pou fè moun-yan savé ki yé désidé rété san manjé. Zòt pouvé sir di sa mo ka di zòt, yé ja trapé sa yé té lé é Bondjé pa ké bay yé anyen. 17 Mé to, lò to désidé rété san manjé, alé penyen épi lavé to vizaj, 18 konsa ròt-ya pa ké savé ki to désidé rété san manjé. To Papa ki annan syèl-a, a li rounso ki pou wè sa to ka fè. É to Papa ki ka wè tousa to ka fè ké béni to. 19 « Arété travay rèd pou divini rich épi pou chaché gen roun patché bagaj asou latè-a, paské ti bèt ké larouy pouvé gaté sa bagaj-ya épi moun pouvé vòlò yé. 20 Miyò zòt travay rèd pou fè bagaj ki gen valò pou Bondjé ki annan syèl-a, koté ni ti bèt, ni larouy pa pouvé gaté yé épi pyès moun pa pouvé vòlò yé. 21 Paské sa ki gen plis valò pou to, a bagaj-ya to ka sonjé toulong. 22 « To wéy kou roun limyèr ki ka kléré to. Si to wéy ka rété asou sa ki pi enpòrtan, tout bagaj ké klè pou to. 23 Mé si to wéy anvi sa ròt-ya gen, to ké annan soukou nèt. É si to pa gen limyèr ankò, atò to annan soukou dou menm ! 24 « Pyès moun pa pouvé travay pou dé mèt : si i kontan roun, i ké rayi ròt-a, é si i fidèl ké roun, i pa ké rèspèkté ròt-a. Atò si soumaké, a bagaj-a ki pi enpòrtan annan zòt lavi, zòt pa ké pouvé sèrvi Bondjé. 25 « A pou sa mo ka di zòt : Arété enkyété parapòrta sa zòt ké manjé ouben sa zòt ké bwè. Épi arété enkyété parapòrta lenj zòt ké mété. Ès zòt lavi pa pi enpòrtan pasé sa zòt ka manjé ? É ès zòt kò pa pi enpòrtan pasé lenj zòt ka mété ? 26 Byen gadé zozo-ya. Yé pa ka sonmen, yé pa ka ranmasé é yé pa ka mété manjé asou koté. Mé zòt Papa ki annan syèl-a ka bay yé manjé. Atò, ès zozo-ya gen plis valò pasé zòt ? 27 A pa pas zòt ka enkyété ki zòt ké pouvé viv pi lontan. 28 É poukisa zòt ka enkyété parapòrta lenj zòt ké mété ? Gadé kisa flèr-ya ki annan savann ka anprann zòt. Yé pa ka travay é yé pa ka koud lenj. 29 Mé mo ka di zòt ki menm rwa Salomon, ké tout rich i té rich-a, épi ké tout so prèstans, pa menm li pa té gen pi bèl lenj ki sa flèr-ya. 30 Sa plant-ya ka pousé jòdla, mé dimen yé ké sèk é moun ké vin boulé yé. Magré sa, Bondjé ka fè sa plant-ya vin bèl menm. Donk zòt krè Bondjé pa ké pouvé fè menm bagaj pou zòt épi bay zòt lenj zòt bézwen-an, menmsi a roun tibi lafwa zòt gen ? 31 Donk zòt pa janmen divèt enkyété épi doumandé zòt kò : “Kisa nou ké manjé ?” ouben : “Kisa nou ké bwè ?” ouben : “Ki lenj nou ké mété ?” 32 Moun-yan ki pa konnèt Bondjé, a dèyè sa bagaj-ya yé ka kouri. Zòt Papa ki annan syèl-a ja savé ki zòt bézwen tout sa bagaj-ya. 33 « Sa ki divèt pi enpòrtan annan zòt lavi, a gouvèrnman Bondjé épi obéyi Bondjé, é Bondjé ké bay zòt tousa zòt bézwen pou viv. 34 Donk zòt pa janmen divèt enkyété pou sa dimen ké poté, dimen ké gen sopa traka ! Zòt ja gen asé traka pou jòdla.