Daniel
3 Mé Danyèl té pi fò pasé ròt fonksyonèr-ya ké satrap-ya, paské a pa ti entélijans i té gen. Rwa-a té lé bay li dirijé tout rwayonm-an. 4 A sa lépòk-a, gran fonksyonèr-ya ké satrap-ya té ka chaché roun mwayen pou yé té pouvé akizé Danyèl. Yé té lé montré ki Danyèl pa té ka byen okipé di bagaj rwayonm-an, mé yé pa trouvé anyen pou akizé li, ni pyès bagaj malonnèt, paské moun té pouvé fè li konfyans. Yé pa trouvé pyès bagaj malonnèt koté li paské i toujou té ka byen fè so travay. 10 Lò Danyèl anprann ki rwa-a té signé lalwa-a, i rantré an so kaz ; lafinèt so chanm ki té asou twa-a té louvri annan dirèksyon Jérizalèm. Épi trwa fwa chak jou, kou i té gen labitid fè l’ anvan sa, i mété so kò ajounou, i priyè é i louwé so Bondjé. 11 A sa moman-an, sa wonm-yan yenki antré konsa koté Danyèl é yé trouvé l’ la ka priyè so Bondjé épi ka sipliyé l’ pou doumandé l’ so favèr. 16 Atò, rwa-a bay yé lòrd alé chaché Danyèl, épi yé jité l’ annan roun trou koté i té gen lyon. Rwa-a di Danyèl : « To Bondjé to ka sèrvi toulong ké sové to. » 22 Mo Bondjé voyé so zanj é i fronmen djòl lyon-yan. Yé pa manyen mo, paské pou li mo inosan ; é mo pa fè to pyès mové bagaj, o rwa. » 26 A pou tout moun annan mo rwayonm, tranblé douvan Danyèl so Bondjé. Paské i sa Bondjé ki vivan-an é i ka rété pou tout-tan. So rwayonm pa ké janmen disparèt, é so dominasyon, a pou tout-tan.