1 Samuel

16 Apré roun tan, Jéova di Samiyèl : « Konmyen tan to ké tris konsa akoz di Sayil, alòr ki mo désidé i pa ké rwa Israyèl ankò ? Pran roun kòrn, plen l’ ké dilwil épi alé wè Jésé ki ka rété Bètléyèm. Mo chwazi roun annan so pitit pou i rwa. » 3 Di Jésé vini pou sakrifis-a. Apré sa, mo ké di to sa to ké divèt fè. Mo ké montré to roun moun, é to ké divèt vidé dilwil asou so tèt. 6 Kou yé té ka rivé, Samiyèl wè Éliyab. I di annan so tchò : « Asiré, men sa-la Jéova chwazi, ki dibout douvan li. » 7 Mé Jéova di Samiyèl : « Pa gadé so aparans ni kouman i rot, paské a pa li mo chwazi. Moun pa ka wè bagaj-ya kou Bondjé ka wè yé, paské moun ka wè sa yé wéy pouvé wè, mé Jéova, li menm, ka wè sa i gen annan tchò-a. » 10 Atò, Jésé fè sèt annan so garson vini douvan Samiyèl ; mé Samiyèl di l’ : « Jéova pa chwazi pyès annan yé. » 11 Finalman Samiyèl doumandé Jésé : « Ès a tout to garson ki la ? » Jésé di li : « I ka manké pi piti-a. I ka véyé mouton-yan. » Samiyèl di li : « Voyé roun moun chaché l’ pas nou pa ké koumansé manjé si i pa la. » 12 Atò Jésé voyé roun moun chaché David, é i mennen l’ pou Samiyèl. Lapo David té gen roun ti koulèr roz, so wéy té bèl é a té roun bèl ti boug. Atò Jéova di Samiyèl : « Lévé, vidé dilwil asou so tèt, pas a li mo chwazi ! »