1 Pierre

6 A pou sa, zòt tchò kontan bokou, menmsi tout kalité éprèv ka oblijé zòt gen chagren pou roun ti moman, 7 pou zòt lafwa ki pasé anba éprèv — roun lafwa ki gen lontan plis valò pasé lò ki ka gaté menmsi i pasé annan difé — jwenn louwanj, laglwar ké lònò lò Jézi Kris ké fè tout moun konnèt kimoun i sa. 8 Menmsi zòt pa jen wè l’, zòt kontan l’. Menmsi zòt pa ka wè l’ aprézan, magré sa, zòt ka montré ki zòt lafwa, a annan li i fika é zòt kontan toubonnman ké roun lajwa pyès moun pa pouvé èspliké, roun lajwa plen ké laglwar, 9 paské zòt ka rivé gen sa zòt lafwa ka poté, zòt délivrans. 13 A pou sa, paré zòt kò pou aji, gardé zòt bon sans ; mété zòt èspérans annan favèr nou pa mérité zòt ké rousouvwè lò Jézi Kris ké fè tout moun konnèt kimoun i sa. 14 Kou timoun ki ka obéyi, pa lésé sa zòt té anvi anvan lò zòt pa té konnèt anyen, fè zòt chanjé, 15 mé, kou Sen-an ki aplé zòt, a pou zòt osi zòt divini sen annan tousa zòt ka fè. 16 Paské men sa ki marké : « Zòt divèt sen, paské mo sen. » 18 Wi, zòt savé ki, a pa ni ké arjan ni ké lò, bagaj ki ka gaté, yé libéré zòt di lavi initil zòt rousouvwè di zòt gangan. 19 Mé a ké roun disan ki gen valò, kou disan roun ti-mouton ki pa gen ni défo ni tach, disan Kris-a. 21 Grasa li, zòt ka krè Bondjé, ki résisité l’ é ki bay li laglwar, pou zòt mété zòt lafwa ké zòt èspwar annan Bondjé. 22 Aprézan zòt vin pròp paské zòt obéyi lavérité — é a konsa zòt vin kontan zòt frè ké sò-ya ké tout zòt tchò, pa ké dé vizaj —, a pou zòt gen roun lanmou ki fò roun pou ròt, ké tout zòt tchò.