1 Pierre

2 Atò, arété fè tout kalité méchansté, arété tronpé moun, fè ipokrit, anvyé moun é arété malpalé moun. 2 Kou timoun ki fin fèt, a pou zòt anprann anvi bwè dilèt Paròl Bondjé-a ki pa mélanjé ké anyen, pou zòt grandi é pou zòt sové grasa li. 3 mé, pou fè sa, a pou zòt ja gouté pou wè ki Sényèr-a bon. 9 Mé zòt, zòt sa roun « ras yé chwazi, roun group prèt, roun nasyon ki sen, roun pèp ki divèt divini roun nasyon èspésyal, pou zòt fè tout moun konnèt bèl kalité » sa-la ki fè zòt soti annan soukou pou fè zòt vini annan so bèl limyèr. 10 Paské tan-lontan zòt pa té sa roun pèp, mé aprézan zòt sa pèp Bondjé-a ; tan-lontan yé pa fè zòt mizérikòrd, mé jòdla zòt trapé mizérikòrd. 11 Zòt mo kontan-an, zòt ki étranjé é ki pa la pou lontan, mo ka ankourajé zòt réfizé fè bagaj lachè-a anvi fè, é ki ka briga ké zòt. 12 A pou zòt gen roun bon konpòrtman douvan tout moun, konsa lò yé ké di ki zòt ka fè bagaj ki pa bon, yé ké pouvé wè bèl bagaj zòt ka fè é yé ké bay Bondjé laglwar lò i ké vini. 13 Akoz di Sényèr-a, a pou zòt obéyi tout moun yé mété la : ki a roun rwa kou roun moun ki pi rot, 14 ki a gouvèrnèr-ya kou moun i voyé pou pini moun ki ka fè mové bagaj mé pou félisité sa-ya ki ka fè bon bagaj. 17 Bay tout kalité moun lònò, kontan tout frè ké sò-ya, gen lakrent pou Bondjé, bay rwa-a lònò. 20 Paské ki valò sa gen si zòt ka sipòrté lò yé ka bat zòt pou péché zòt fè ? Parkont, si zòt ka tchenbé lò zòt ka soufri pou bon bagaj zòt fè, a roun bagaj ki ka fè Bondjé plézi. 21 É a pou sa yé aplé zòt, paské Kris soufri pou zòt é i lésé roun modèl pou zòt, pou zòt byen swiv so tras. 22 I pa fè pyès péché é i pa janmen di anyen pou bloublou moun. 23 Lò yé té ka jouré l’, i pa té ka jouré yé. Lò i té ka soufri, i pa té ka ménasé pyès moun, mé i té ka lésé tout bagaj annan lanmen Sa-la ki ka jijé ké jistis.