Galates

10 Sèl bagaj yé doumandé nou, a sonjé sa-ya ki pov, é mo fè bokou éfòr pou fè sa ké tout mo tchò. 11 Mé, lò Séfas vini Antyòch, mo di li franchman sa mo té ka pansé, paské an tout sans i pa té gen rézon. 12 Wi paské, anvan plizyèr wonm Jak té voyé rivé, i té ka manjé ké moun nasyon-yan ; mé lò yé rivé, i arété manjé ké yé é i pran so bò, paské i té pè sa ki té sirkonsi-ya. 13 Ròt jwif-ya osi fè menm sinéma-a, é menm Barnabé koumansé fè menm sinéma-a. 14 Lò mo wè yé pa té ka maché dapré lavérité bon nouvèl-a, mo di Séfas douvan tout moun : « Si to ki sa roun Jwif, to ka viv kou moun nasyon-yan mé pa kou Jwif-ya, kouman to pouvé blijé moun nasyon-yan viv soulon tradisyon Jwif-ya ? » 16 Nou ka rékonnèt ki Bondjé pa ka di roun wonm jis paské i obéyi lalwa, mé sèlman parapòrta so lafwa annan Jézi Kris. A pou sa, nou mété nou lafwa annan Jézi Kris, pou Bondjé pa di nou jis paské nou obéyi lalwa, paské pyès moun pa ké divini jis paské i obéyi lalwa, mé pou i di nou jis akoz di nou lafwa annan Kris. 19 Paské mo asèpté lalwa-a, mo mouri parapòrta lalwa pou mo pouvé divini vivan pou Bondjé. 20 Mo klouwé asou poto-a ké Kris. Mo pa ka viv pou mo ankò, mé a pou Kris mo ka viv. Wi, lavi mo ka viv aprézan annan lachè-a, mo ka viv li grasa lafwa annan Pitit Bondjé-a, ki montré mo i té kontan mo é ki bay so lavi pou mo.