Psaume

32 Sa-la Bondjé ka pardonnen so péché, é ka kouvri so fot, so tchò kontan. 2 Moun-an Jéova pa ka wè kou roun moun ki koupab, é ki pa ka sonjé bloublou ròt-ya, so tchò kontan. 3 Lò mo pa té ka di anyen, mo zo té ka fini andidan mo paské mo té ka plenn tout lajournen. 4 Paské lannwit kou lajournen to lanmen té ka krazé mo. Mo fòrs chapé, menm fason dlo-a ka chapé pannan sézon chalèr-a. 5 Finalman, mo konfésé tout mo péché pou to ; mo pa séré mo fot. Mo di : « Mo ké konfésé mo péché douvan Jéova. » É to pardonnen mo fot, tout mo péché. 6 A pou sa, tout sa ki fidèl ké priyè to pannan nou pouvé trouvé to toujou. Alòr, menm gro dlo pa ké rivé koté li. 7 To sa roun koté mo pouvé alé séré, to ké protéjé mo lò bagaj-ya ké rèd pou mo. To ké fè moun òbò mo rélé fòrs yé kontan akoz di délivrans to ka bay-a. 8 « Mo ké idé to konprann tout bagaj é mo ké montré to chimen to divèt pran-an. Mo lé konséyé to, mo wéy asou to. 10 Méchan-an ka soufri bokou ; mé sa-la ki ka fè Jéova konfyans, i ka antouré l’ ké so lanmou fidèl.