Matthieu

5 Lò Jézi wè sa patché moun-yan, i monté asou montangn-an. I asiz, épi so disip vini òbò li. 2 Atò, i koumansé ansényé yé, i di : 3 « Sa-ya ki savé yé bézwen Bondjé gidé yé annan yé lavi, yé tchò kontan paské gouvèrnman Bondjé ki annan syèl-a, a di yé. 4 « Sa-ya ki gen chagren latchò, yé tchò kontan paské yé ké konsolé yé. 5 « Sa-ya ki gen imilité, yé tchò kontan paské latè-a ké pou yé. 6 « Sa-ya ki ka antann lajistis, yé tchò kontan paské yé ké gen sa yé lé. 7 « Sa-ya ki gen pityé pou ròt-ya, yé tchò kontan paské moun ké gen pityé pou yé. 8 « Sa-ya ki ka adoré Bondjé ké tout yé tchò, yé tchò kontan paské yé ké wè Bondjé. 9 « Sa-ya ki ka chaché fè lapè ké ròt-ya, yé tchò kontan paské yé ké aplé yé pitit Bondjé. 10 « Sa-ya ki ka soufri paské yé ka fè sa ki byen, yé tchò kontan paské gouvèrnman Bondjé ki annan syèl-a, a di yé. 11 « A pou zòt tchò kontan lò yé ka jouré zòt, lò yé ka malmennen zòt, é lò yé ka manti asou zòt é di tout kalité vyé bagaj asou zòt akoz di mo. 12 A pou zòt tchò kontan menm paské Bondjé ké béni zòt bokou. A konsa yé malmennen sa-ya ki té ka anonsé mésaj Bondjé tan-lontan. 13 « Annan sa monn-an, zòt kou disèl. Mé si disèl-a pa salé ankò, kouman i pouvé roudivini salé ? I pa ka sèrvi anyen ankò, a yenki jité l’ dèrò, épi moun ka maché asou l’. 14 « Annan sa monn-an, zòt kou roun limyèr ki ka kléré. Lò roun vil asou roun montangn, i pa pouvé séré. 15 Lò roun moun ka limen roun lalanp, a pa pou mété l’ anba roun panyen, i ka mété l’ asou roun tab é konsa i ka kléré tout moun ki annan kaz-a. 16 Menm fason-an, a pou zòt fè zòt limyèr kléré douvan tout moun, pou yé pouvé wè bèl bagaj zòt ka fè, é pou yé pouvé bay zòt Papa ki annan syèl-a laglwar. 17 « Pa konprann di mo vini pou fini ké Lalwa Moyiz ké paròl Profèt-ya. Mo pa vini pou fin ké sa Lalwa-a ni ké paròl Profèt-ya. Mo vini pou fè tousa ki marké. 18 Zòt pouvé sir di sa mo ka di zòt, syèl-a ké latè-a pouvé disparèt, mé i pa gen pyès lèt di sa Lalwa-a ki ké disparèt. É pa menm roun ti bout lèt pa ké disparèt. Tousa ki marké annan sa Lalwa-a gen pou fèt. 19 Donk sa-la ki pa ka obéyi roun annan koumannman-yan ki pi piti é ki ka di ròt moun-yan fè menm bagaj ki li, pa fèt pou gouvèrnman Bondjé ki annan syèl-a. Mé sa-la ki ka obéyi Lalwa, é ki ka di ròt moun-yan obéyi osi, sa moun-an fèt pou gouvèrnman Bondjé ki annan syèl-a. 20 Paské mo ka di zòt ki si zòt pa gen plis lafwa pasé farizyen-yan, ouben pasé sa-ya ki ka ansényé Lalwa, zòt pa ké jen rantré annan gouvèrnman Bondjé ki annan syèl-a. 21 « Zòt savé yé di zòt gangan : “To pa divèt tchwé pyès moun. Sa-la ki ka tchwé roun moun, i ké divèt alé tribinal.” 22 Mé mo, mo ka di zòt ki sa-la ki ka rété faché ké so frè ké divèt alé tribinal pou yé jijé l’. É sa-la ki ka jouré so frè, yé ké jijé l’ annan roun pi gran tribinal ankò. É sa-la ki ka di : “Bonnaryen !” yé ké kondané l’ pou i mouri. 23 « Donk, lò to k’alé ofri Bondjé roun bagaj, é ki a sa moman-an to ka sonjé ki to frè faché ké to, 24 lésé sa to té lé ofri Bondjé-a la. Anvan, alé fè lapè ké to frè, épi apré sa, vini ofri Bondjé sa to té lé bay li-a. 25 « Si roun moun lé mennen to tribinal, ranjé problèm-an ké li vitman. Réglé problèm-an pannan zòt asou chimen tribinal-a menm. Sinon, i ké alé wè jij-a, jij-a menm ké riské kondané to épi di gardyen-an mété to lajòl. 26 To pouvé sir ki to pa ké soti la tout tan to pa bay li tout soumaké to divèt bay li-a. 27 « Zòt tandé yé di : “To pa divèt tronpé to mouché ouben to madanm.” 28 Mé mo ka di zòt ki sa-la ki ka gadé roun madanm é i anvi madanm-an afòrs i ka gadé l’, i ja tronpé so pròp madanm annan so tchò. 29 Donk si to wéy ka fè to fè roun péché, raché l’ épi jité l’ lwen di to. Miyò to pédi roun ti moso annan to kò pasé to pédi tout to kò. 30 É si to lanmen ka fè to fè roun péché, koupé l’ épi jité l’ lwen di to. Miyò to pédi roun ti moso annan to kò pasé to pédi tout to kò. 31 « Yé di osi : “Sa-la ki ka divòrsé ké so madanm divèt bay li papyé divòrs-a.” 32 Mé mo ka di zòt ki roun wonm pa divèt divòrsé ké so madanm si so madanm pa fè pyès bagaj malpròp ké rounòt moun. Si i ka divòrsé, i ka mété madanm-an annan roun sitiasyon koté li menm osi ké pitèt fè roun bagaj malpròp. É sa-la ki ka maryé ké sa madanm-an ki divòrsé, li menm osi ka fè roun bagaj malpròp. 33 « Zòt savé osi yé di zòt gangan : “To pa divèt promèt fè roun bagaj é apré to pa ka tchenbé to promès. Tousa to ka promèt Jéova, to divèt fè l’”. 34 Mé mo ka di zòt : Pa jiré pyès. Pa jiré asou syèl-a, paské Bondjé Rwa annan syèl-a. 35 Pa jiré asou latè-a, paské latè-a, a ti ban-an koté Bondjé ka mété so pyé. Pa jiré asou Jérizalèm paské Jérizalèm, a vil Bondjé. 36 Pa jiré asou to tèt paské a pa to ka désidé si to chivé ké divini blan ouben si yé ké rété nwè. 37 Lò zòt ka di wi pou fè roun bagaj, a pou zòt fè l’. É lò zòt ka di non pou pa fè roun bagaj, zòt pa divèt fè l’. Paské si zòt ka di roun bagaj mé ki zòt lidé asou rounòt bagaj, zòt ka imité Djab-a. 38 « Zòt tandé yé di : “Si roun moun ka bay rounòt moun roun kou annan so wéy, a pou yé bay li roun kou annan sopa wéy. É si roun moun ka pété dan rounòt moun, a pou yé pété sopa dan.” 39 Mé mo ka di zòt : Lò roun moun méchan ké zòt, pa fè li menm bagaj i fè zòt. Si roun moun ka bay to roun dolanmen, bay li ròt bò to vizaj pou i bay to rounòt dolanmen. 40 Si roun moun lé mennen to tribinal pas i lé pran to chimiz, bay li to palto osi. 41 Si roun moun ki ka koumandé to ka di to maché pannan roun kilomèt, fè dé kilomèt ké li. 42 Si roun moun ka doumandé to roun bagaj, bay li. É si roun moun lé doumandé to prété roun bagaj, pa di li non. 43 « Zòt savé ki sa-ya ki ka ansényé zòt ka di : “To divèt kontan to konpanyen épi rayi to lèlmi.” 44 Mé mo ka di zòt : A pou zòt kontan zòt lèlmi, é a pou zòt priyè pou sa-ya ki ka fè zòt soufri. 45 Si zòt ka fè sa, zòt ka montré ki zòt sa pitit zòt Papa ki annan syèl-a. I ka fè solèy-a lévé ni asou moun mové, ni asou moun ki bon. É i ka fè lapli-a tonbé asou moun ki ka fè sa ki bon é osi asou moun ki ka fè sa ki mové. 46 Si zòt kontan sa-ya ki kontan zòt rounso, poukisa Bondjé ké béni zòt ? Menm sa-ya ki ka ranmasé enpo ka fè sa. 47 É si zòt janti ké zòt bon zanmi rounso, kisa i gen annan sa ? Moun-yan ki pa konnèt Bondjé, a pa sa yé ka fè osi ? 48 Zòt divèt montré roun lanmou ki parfè kou zòt Papa ki annan syèl-a ka fè l’.