Job

1 Annan péyi Ouz i té gen roun mouché yé té ka aplé Jòb. I té fidèl é i té drèt annan so zafè, i té gen lakrent pou Bondjé é i té ka bay do pou sa ki mové. 2 I té gen sèt garson ké trwa tifi. 4 So garson té gen labitid fè roun gran manjé, yé chak té gen roun jou. Yé té ka envité yé trwa sò pou manjé ké bwè annan yé kaz. 6 Jou-a rivé pou pitit vré Bondjé-a antré pou vini douvan Jéova, é Satan osi antré ké yé. 7 Alòr Jéova doumandé Satan : « Koté to soti ? » Satan réponn Jéova : « Mo té ka promennen asou latè-a é mo té ka gadé sa ki té ka pasé asou l’. » 8 Épi Jéova réponn Satan : « Ès to wè mo sèrvitèr Jòb ? I pa gen pyès moun kou li asou latè-a. A roun wonm fidèl ki drèt annan so zafè, ki gen lakrent pou Bondjé é ki ka bay do pou sa ki mové. » 9 Mé Satan réponn Jéova : « Ès a pou bon tchò Jòb ka krenn Bondjé ? 10 Ès to pa mété roun baryè a so lantou é alantou so kaz ké tousa ki di li ? To béni tousa i fè, é i rivé gen roun patché zannimo annan péyi-a. 11 Pou chanjé, lonjé to lanmen, é détrwi tousa i gen, é asiré pa pitèt, i ké gadé to anmitan to wéy pou i modi to. » 12 Atò Jéova di Satan : « Gadé ! Pran tousa i gen. Mé sèl bagaj, pa manyen l’ ! Atò Satan soti douvan Jéova. 13 Roun jou, toupannan pitit Jòb té ka manjé ké bwè diven annan kaz yé gran frè, 14 roun sèrvitèr Jòb vini di li : « Béf-ya té ka tounen latè-a é nann-yan té ka manjé zèrb òbò yé, 15 lò moun Sabé jité yé kò asou yé épi yé pran yé é yé tchwé sèrvitèr-ya ké yé zépé. A mo rounso ki rivé chapé pou vin di to sa. » 16 I patékò fin palé lò rounòt sèrvitèr rivé é i di : « Difé Bondjé soti di syèl-a, i boulé tout kabrit ké sèrvitèr-ya, yé boulé nèt ! A mo rounso ki rivé chapé pou vin di to sa. » 17 I patékò fin palé lò rounòt sèrvitèr rivé épi i di : « Moun Kadé fè trwa bann épi yé pran chamo-ya, é yé tchwé sèrvitèr-ya ké zépé. A mo rounso ki rivé chapé pou vin di to sa. » 18 I patékò fin palé lò rounòt sèrvitèr rivé épi i di : « To pitit-ya té ka manjé ké bwè diven annan kaz yé gran frè. 19 Épi rounsèl kou konsa roun gran van ki té ka vin di dézèr-a tonbé asou kat koté kaz-a, épi kaz-a tonbé asou yé, épi yé tout mouri. A mo rounso ki rivé chapé pou vin di to sa. » 20 Alòr Jòb lévé, i déchiré so lenj é i koupé so chivé. Épi i tonbé atè, i mété so kò ajounou 21 épi i di : « A toutouni mo soti annan vant mo manman é a toutouni mo ké routounen annan l’. Jéova bay é Jéova tiré. A pou yé kontinyé bay non Jéova louwanj. » 22 Magré tousa, Jòb pa péché é i pa akizé Bondjé di fè pyès mové bagaj.