Isaïe

30 Men sa Jéova ka di : « A pou malò tonbé asou pitit-ya ki pa lé kouté, ki ka fè bagaj mo pa doumandé yé fè, ki ka fè alyans san mo lèspri pa dirijé yé, ki ka fè péché asou péché. 9 Paské a roun pèp so tèt rèd, a pitit ki ka manti, pitit ki ka réfizé kouté lalwa Jéova. 15 Paské men sa Souvéren Sényèr Jéova-a, Sen Israyèl-a ka di : « A si zòt ka rouvini òbò mo é si zòt ka antann jantiman zòt ké sové. Men sa ki ké sa zòt fòrs : rété kalm é fè mo konfyans. » Mé zòt pa té lé fè sa. 18 Mé Jéova ka pran pasyans é i ka antann pou aji ké konpasyon ké zòt é i ké lévé pou fè zòt mizérikòrd. Paské Jéova sa roun Bondjé lajistis. Sa-ya ki ka kontinyé antann li, yé tchò kontan. 19 To pouvé sir ki, lò pèp-a ké rété Syon, a Jérizalèm, to pa ké pléré ankò. I ké toujou aji ké konpasyon ké to lò to ké aplé l’ pou i sové to, lò i ké tandé to i ké réponn to lanmenm. 20 A vré ki Jéova ké bay zòt manjé mizè kou dipen é i ké fè zòt bwè malò kou dilo ; mé to Gran Ansényan pa ké séré ankò, é to ké wè to Gran Ansényan ké to pròp wéy. 21 Si roun jou to té ka lésé bon chimen-an pou alé a drèt ouben a goch, to zorè ké tandé sa paròl-a dèyè to : « Men chimen-an. Swiv li. » 23 I ké fè lapli tonbé pou grenn to ka planté-ya, é latè-a ké bay rounlo ké roun patché manjé. A sa lépòk-a, to troupo ké manjé annan gran savann. 24 Béf-ya ké nann-yan ki ka travay latè ké manjé pay ké lozèy moun vannen ké pèl ké fourch. 25 Jou-a yé ké tchwé roun patché moun, lò tour-ya ké tonbé, i ké gen ti larivyè ké dlo asou tout montangn ki rot ké asou tout ti montangn. 26 Wi, jou-a Jéova ké bandé koté so pèp gen roun bagaj ki kasé é lò i ké géri koté i té byen blésé paské i té bay li kou, limyèr lalin-an ki plen ké divini kou limyèr solèy-a, é limyèr solèy-a ké divini sèt fwa pi fò, kou limyèr i gen pannan sèt jou.