1 Jean

3 Gadé ki kalité lanmou Papa-a bay nou, pou yé aplé nou pitit Bondjé ! É a sa nou sa. A pou sa monn-an pa konnèt nou, paské i pa rivé konnèt li. 2 Mo frè mo kontan-an, aprézan nou sa pitit Bondjé, mé nou pòkò savé kouman nou ké fika. Mé nou savé ki lò sa ké fèt, nou ké sanblé ké li paské nou ké wè li kou i fika. 8 Si roun moun ka kontinyé péché, i ka vini di Djab-a, paské Djab-a ka péché dipi koumansman-an. A pou sa Pitit Bondjé-a vini : pou détrwi travay Djab-a. 10 Men sa ki diféran ant pitit Bondjé ké pitit Djab-a : sa-la ki pa ka fè sa ki drèt pa ka vini di Bondjé, sa-la ki pa kontan so frè non plis. 11 Paské men mésaj zòt tandé dipi koumansman-an : nou divèt kontan nou konpanyen, 12 é nou pa divèt kou Kayen, ki té ka vini di méchan-an é ki tchwé so frè. É poukisa i tchwé l’ ? Paské sa i té ka fè té mové, mé sa so frè té ka fè té drèt. 15 Si roun moun rayi so frè, a roun kriminèl, é zòt savé ki pyès kriminèl pa pouvé gen lavi pou tout-tan. 16 Nou rivé konprann a kisa ki lanmou paské Jézi Kris bay so lavi pou nou, é kou li menm, nou divèt bay nou lavi pou nou frè-ya. 17 Mé sa-la ki gen patché bagaj ki ka vini di sa monn-an é ki ka wè ki so frè pa gen anyen, mé magré sa i pa ka idé l’, kouman sa moun-an pouvé di i kontan Bondjé ? 18 Timoun-yan, a pa ké bouch ouben paròl rounso nou divèt kontan ròt-ya, a pou nou fè bagaj pou montré ki nou kontan yé ké tout nou tchò. 19 A konsa nou ké savé nou ka vini di lavérité, é nou ké kalmé nou tchò douvan Bondjé, 20 kèlkéswa sa ki té ké pouvé fè nou tchò kondané nou, paské Bondjé gran pasé nou tchò é i konnèt tout bagaj.