1 Timothée

7 Mé pa kouté istwè ki pa vré é ki ka dérèspèkté Bondjé, kou sa-ya vyé fanm ka rakonté. Parkont, travay rèd pou to kontinyé adoré Bondjé ké fidélité. 8 Paské lò roun moun ka fè èkzèrsis ké so kò, sa ka sèrvi pou déztrwa bagaj, mé lò roun moun ka adoré Bondjé ké fidélité, sa ka sèrvi pou tout bagaj, paské, ké sa, i gen promès pou lavi jòdla ké lavi ki ka vini-a. 10 A pou sa nou ka travay rèd é nou ka briga, paské nou mété nou èspwar annan roun Bondjé ki vivan, Sa-la ki ka sové tout kalité moun, èspésaylman sa ki fidèl. 12 A pa pou pyès moun méprizé to paské to jenn. Mé a pou to sa roun èkzanp pou tout sa ki fidèl, annan fason to ka palé, annan sa to ka fè, annan lanmou to gen, annan to lafwa, annan lavi to ka mennen ki pròp. 13 Toupannan to ka antann mo vini, kontinyé divini pi vayan annan zafè li douvan tout moun, annan zafè ankourajé ké ansényé moun. 14 Pa néglijé don to gen-an, don-an yé bay to grasa roun profési, lò kolèj ansyen-an pozé yé lanmen asou to. 15 Réfléchi asou sa bagaj-ya, mété tout to fòrs annan sa, pou tout moun pouvé wè to ka fè progrè. 16 A tout tan pou to véyé to pròp kò ké sa to ka ansényé-a. Kontinyé fè sa bagaj-ya, paské si to ka fè sa, to ké sové ni to menm, ni sa-ya ki ka kouté to.