Kitan lafen-an ké vini ? Sa Jézi di

GADÉ SA DÉ BAGAJ-YA JÉZI DI ASOU LAFEN-AN :

« A pou zòt panga, paské zòt pa konnèt ni jou-a ni lèr-a » (MATTHIEU 25:13).

« Panga, lésé zòt wéy byen louvri, paské zòt pa savé kitan moman Bondjé chwazi-a ké rivé » (MARC 13:33).

Donk, pyès moun pa pouvé di kitan lafen sa monn-an ké vini. Parkont, Labib-a ka anprann nou ki Bondjé fiksé ‘roun jou ké roun lèr’ pou lafen-an (Matthieu 24:36). Ès sa lé di ki i pa gen pyès fason pou nou savé kitan lafen-an ké rivé ? An pyès sans ! Jézi di so disip ki yé té divèt véyé plizyèr lévènman ki té ké montré lafen-an tou pròch rivé.

SIGN-AN

Sa lévènman-yan té ké roun sign pou montré nou ki monn-an annan so « dèrnyé moman ». Jézi anonsé : « Roun nasyon ké lévé kont rounòt nasyon é roun rwayonm kont rounòt rwayonm, é i ké gen lafamin ké tranblémandétèr roun koté apré ròt » (Matthieu 24:3, 7). I anonsé osi ki i té ké gen « épidémi » (Luc 21:11). Ès ou ka wè sa profési-ya ka réyalizé ?

Jòdla, lagèr, lafamin, tranblémandétèr ké maladi ki ka tchwé moun, ka fè patché déga asou latè-a. Parèkzanp, an 2004, akoz di roun gro tranblémandétèr annan oséyan Endyen-an, roun sounami tchwé 225 000 moun. Pannan trwa lannen, pandémi Covid-19-a tchwé 6,9 milyon moun annan monn-an. Jézi di ki sa kalité lévènman-yan té ké montré ki lafen sa monn-an tout pròch rivé.

« DÈRNYÉ JOU-YA »

Pou palé di tan-an ki ka vini jis anvan lafen sa monn-an rivé, Labib-a ka palé di « dèrnyé jou-ya » (2 Pierre 3:3, 4). Annan 2 Timothée 3:1-5, nou ka li ki, annan dèrnyé jou-ya, moun-yan pa té ké gen bon mèrs ankò menm (gadé ankadré-a « Tan-an anvan lafen sa monn-an »). Ès ou pa ka wè jòdla kouman moun-yan ka gadé pou yé douvan lèstomak, kouman yé ka fè voras, kouman yé mové menm é kouman yé pa gen lanmou ? A rounòt prèv ki lafen sa monn-an tou pròch rivé.

Konmyen tan sa dèrnyé jou-ya ké diré ? Dapré Labib-a, roun « ti moso tan » rounso. Apré sa, Bondjé ‘ké détrwi sa-ya ki ka détrwi latè-a’ (Révélation 11:15-18 ; 12:12).

TITALÒ LATÈ-A KÉ DIVINI ROUN PARADI !

Bondjé ja mété roun jou ké roun lèr koté i ké fini ké sa monn mové-a (Matthieu 24:36). É ròt bon nouvèl-a, a ki « i pa lé rounsèl [moun] mouri » (2 Pierre 3:9). Wi, i vréman lé ki tout moun rété vivan lò lafen sa monn-an ké vini é ki tout moun viv ansanm annan monn nouvo-a, lò latè-a ké divini roun paradi. A pou sa i ka bay tout moun posibilité soumèt yé kò anba so lalwa.

É a pou sa i fè roun program pou ansényé tout moun asou latè-a, pou moun-yan anprann kouman yé pouvé fè parti di sa-ya ki ké viv annan monn nouvo-a, ki so rwayonm ké dirijé. Jézi di ki bon nouvèl asou rwayonm Bondjé-a té ké préché « asou tout latè-a » (Matthieu 24:14). Toupatou asou latè-a, Témwen Jéova-ya pasé milyar lèr ka préché ké ansényé mésaj Labib-a ki ka bay èspwar. Jézi di ki sa travay prédikasyon-an té ké fèt toupatou asou latè-a anvan lafen-an rivé.

Tan-an koté imen-yan ka dominé près fini. Mé sa ki pi bèl, a ki ou pouvé rété vivan lò lafen sa monn-an ké vini, épi viv asou latè annan paradi-a Bondjé promèt nou. Artik ki ka vini-a ké montré ou kisa ou divèt fè pou ou viv annan sa monn nouvo-a.