Jenn frè-ya, kisa zòt pouvé fè pou ròt-ya fè zòt konfyans ?

1. Poukisa jenn frè-ya gen valò pou yé asanblé ?

JENN frè-ya, zòt pouvé vréman itil pou zòt frè ké sò-ya. Bokou annan zòt gen roun bon lasanté é zòt gen fòrs (Prov. 20:29). Zòt ka fè bokou bagaj pou idé zòt frè ké sò-ya é pitèt zòt lé divini asistan. Mé pitèt zòt ka santi ki ròt-ya ka pansé ki zòt tro jenn ouben zòt pòkò paré pou yé bay zòt rèsponsabilité enpòrtan annan asanblé-a. Mé menm si zòt jenn toujou, i gen bagaj zòt pouvé fè pou frè ké sò-ya annan zòt asanblé fè zòt konfyans é rèspèkté zòt.

2. Kisa nou ké wè annan sa artik-a ?

² Annan sa artik-a, nou ké palé di rwa David. Nou ké wè osi plizyèr bagaj ki rivé Aza ké Jozafat, dé rwa Jida. Nou ké wè déztrwa problèm sa trwa mouché-ya jwenn, kisa yé fè pou réglé sa problèm-yan é kisa jenn frè-ya pouvé anprann gras a yé èkzanp.

KISA ÈKZANP DAVID KA ANPRANN ZÒT

3. Kouman jenn frè-ya pouvé idé granmoun-yan annan yé asanblé ?

³ Lò i té jenn, David anprann fè bagaj ki té itil pou ròt-ya. I té gen roun bèl lanmityé ké Jéova, i travay rèd osi pou i byen jwé lanmizik é i sèrvi sa pou idé rwa Sayil (1 Sam. 16:16, 23). Jennjan, ès zòt konnèt fè bagaj ki pouvé itil pou frè ké sò-ya annan zòt asanblé ? Pitèt zòt wè ki granmoun-yan kontan lò roun moun ka montré yé kouman yé pouvé sèrvi yé tablèt ké ròt aparèy élèktronik pou yé pouvé étidyé yé rounso épi pou yé réinyon. Si zòt vayan annan zafè enfòrmatik, zòt pouvé idé yé.

4. Kou David, ki bèl kalité jenn frè-ya divèt chaché gen ? (gadé zimaj-a anlè prémyé paj-a).

⁴ David té sa roun jennjan yé té pouvé fè konfyans. Parèkzanp, lò i té jenn i travay rèd pou véyé asou mouton so papa. Mé a té roun travay ki té danjéré détan. Pita, men sa David di Sayil : « Koté mo papa, mo ka véyé mouton. Roun jou, roun lyon vini é i alé ké roun mouton ; rounòt jou, a roun lous ki vini, é i fè menm bagaj-a. Atò mo kouri dèyè yé, mo frapé yé, é mo ralé mouton-yan annan yé djòl » (1 Sam. 17:34, 35). David té savé i té divèt pran swen di mouton so papa, é i briga ké tout so fòrs pou protéjé yé. Jenn frè-ya, zòt pouvé imité David lò zòt ka travay rèd pou byen fè nenpòrt ki bagaj yé ka bay zòt fè-a.

5. Dapré Psaume 25:14, kisa jenn frè-ya divèt fè ki pi enpòrtan pasé pyès ròt bagaj ?

⁵ David rivé gen roun lanmityé ki té fò ké Jéova. A vré, i té gen bokou kouraj é i té konnèt byen jwé lanmizik. Mé sa ki té pi enpòrtan pou li, a té so lanmityé ké Jéova. Jéova pa té sèlman so Bondjé ; i té osi so Zanmi, so pi bon Zanmi (li Psaume 25:14). Nou jenn frè-ya, si zòt lé rousouvwè plis rèsponsabilité annan asanblé-a, koumansé divini pi pròch ké zòt Papa ki annan syèl-a.

6. Kisa roun ran moun té ka pansé di David ?

⁶ Roun problèm David té gen a ki moun-yan té ka pansé ki i té tro jenn ouben ki i pa té séryé. Parèkzanp, lò David di i té paré pou alé briga ké Golyat, Sayil éséyé anpéché li alé. I di li : « To sa roun tibolonm toujou » (1 Sam. 17:31-33). Roun tibi tan anvan sa, so pròp frè té akizé l’, yé té di li ki i pa té séryé (1 Sam. 17:26-30). Mé Jéova li menm pa té ka pansé ki David té tro jenn ouben ki i pa té séryé. I té byen konnèt David. É David rivé tchwé Golyat paské i té ka konté asou so Zanmi, Jéova (1 Sam. 17:45, 48-51).

7. Kisa jenn frè-ya pouvé anprann ké èkzanp David ?

⁷ Nou jenn frè-ya, kisa sa ki rivé David pouvé anprann zòt ? A pou zòt gen pasyans. Sa ké pran tan pou sa-ya ki konnèt zòt dipi zòt toupiti rivé konprann ki zòt vin gran. Zòt pouvé sir ki Jéova ka wè kimoun zòt sa vréman. I savé kimoun zòt sa é kisa zòt pouvé fè (1 Sam. 16:7). A pou zòt fè osi zòt rélasyon ké Bondjé vin pi fò. A sa David fè, i pran tan gadé tousa Jéova kréyé é a konsa i fè so rélasyon ké li vin pi fò. I pran tan réfléchi asou tousa sa bagaj-ya té ka anprann li asou Kréyatèr-a (Ps. 8:3, 4 ; 139:14 ; Rom. 1:20). Rounòt bagaj zòt pouvé fè a doumandé Jéova bay zòt fòrs zòt bézwen. Parèkzanp ès zòt gen kanmarad lékòl ki ka ari zòt paské zòt Témwen Jéova ? Si a sa, priyè Jéova pou li idé zòt sipòrté sa sitiasyon-an. Épi fè tousa Jéova ka konséyé zòt fè annan so Paròl, annan nou piblikasyon ké nou vidéyo-ya. Chak kou zòt ké wè Jéova idé zòt réglé roun problèm, zòt ké fè l’ ankò plis konfyans. Anplis di sa, pi ròt-ya ké wè zòt ka konté asou Jéova, pi yé ké fè zòt konfyans.

8-9. a) Kisa ki idé David antann byen jantiman jistan i divini rwa ? b) Kisa jenn frè-ya pouvé anprann ké èkzanp David ?

⁸ Annou wè rounòt problèm David jwenn. Apré Jéova chwazi l’ pou i divini rwa, David antann roun patché lannen anvan i vréman divini rwa Jida (1 Sam. 16:13 ; 2 Sam. 2:3, 4). Pannan sa tan-an kisa ki idé l’ antann byen jantiman ? Pasé i lésé dékourajman-an anpéché li vansé, David sèrvi tan i té gen-an pou fè sa i té pouvé fè. Parèkzanp, lò i chapé koté Filisten-yan pou maron Sayil, David profité pou briga ké lèlmi Israyèl. A konsa i protéjé frontyèr péyi Jida-a (1 Sam. 27:1-12).

⁹ Nou jenn frè-ya, ki ròt bagaj ankò zòt pouvé anprann ké èkzanp David ? Fè sa zòt pouvé pou randé zòt frè ké sò-ya sèrvis. Gadé sa ki rivé roun frè yé ka aplé Ricardob. Lò i té gen 10 an, i té lé divini pyonyé pèrmanan. Mé ansyen-yan di li ki i patékò paré pou sa. Pasé i dékourajé ouben faché pou sa, Ricardo koumansé préché plis. I ka di : « Mo ka randé mo kò kont ki i té gen sèrten bagaj mo té bézwen chanjé. Mo désidé routounen wè tout moun ki té entérésé é mo désidé byen préparé mo kò chak kou mo té ka routounen wè roun moun. É mo jis koumansé bay mo prémyé léson biblik. Pi mo té ka préché, mwens mo té pè. » Jòdla, Ricardo sa roun bon pyonyé pèrmanan épi i asistan.

10. Roun jou, kisa David fè anvan i pran roun désizyon enpòrtan ?

¹⁰ Annou wè rounòt bagaj ki rivé David. Lò i té chapé koté Filisten-yan pou maron Sayil, David ké wonm-yan ki té ka maché ké li-a lésé tout yé fanmi annan vil-a, pou alé fè lagèr. Lò yé rouvini, yé wè ki Amalésit-ya té ataké vil-a, é ki yé té pran ni fanm ni timoun. David té pouvé di ki kou i té sa roun sòlda ki té gen bokou èspéryans i té pouvé trouvé roun mwayen pou libéré yé tout li rounso. Pasé i fè sa, i doumandé Jéova idé li. David doumandé roun prèt yé ka aplé Abyatar bay li éfòd-a, é i doumandé Jéova : « Ès a pou mo kouri dèyè sa bann volèr-ya ? » Jéova di li ki i té divèt kouri dèyè yé é i promèt li ki i té ké libéré prizonyé-ya (1 Sam. 30:7-10). Kisa sa istwè-a ka anprann nou ?

11. Kisa zòt divèt fè anvan zòt pran roun désizyon ?

¹¹ Nou jenn frè-ya, doumandé ròt-ya bay zòt konsèy anvan zòt pran roun désizyon. Pou koumansé, alé wè zòt papa ké zòt manman. Ansyen-yan ki gen bokou èspéryans ké pouvé bay zòt bon konsèy osi. Jéova ka fè sa wonm-yan konfyans, i ka wè yé kou dé « kado » annan asanblé-a. Donk zòt menm osi zòt pouvé fè yé konfyans (Éph. 4:8). Zòt ké pran bon désizyon si zòt ka imité yé lafwa é si zòt ka kouté bon konsèy yé ka bay zòt. Aprézan, annou wè kisa èkzanp rwa Aza-a ka anprann zòt.

KISA ÈKZANP RWA AZA-A KA ANPRANN ZÒT

12. Ki bèl kalité Aza té gen lò i divini rwa ?

¹² Lò i té jenn, rwa Aza-a té gen imilité é i té gen kouraj. Parèkzanp, lò so papa Abiya mouri, Aza divini rwa a so plas, é i koumansé tiré tout zidòl annan péyi-a. I di moun-yan osi ki té ka rété Jida « chaché Jéova Bondjé yé gangan épi rèspèkté Lalwa ké koumannman-yan » (2 Chron. 14:1-7). É lò Zéra Étchopyen-an ataké Jida ké roun milyon sòlda, Aza doumandé Jéova idé li. I di : « O Jéova, to pa mélé pou savé si sa-ya to ka sové fò ouben si yé fèb. Idé nou, o Jéova nou Bondjé, paské nou ka fè to konfyans. » Sa bèl bagaj Aza di-a ka montré kouman i té ka fè Jéova konfyans pou i sové li ké so pèp. I fè so Papa ki annan syèl-a konfyans, é Jéova fè Aza ké Jida ganyen Étchopyen-yan (2 Chron. 14:8-12).

13. Kisa ki rivé Aza pita é poukisa ?

¹³ Aza divèt pran pè douvan roun larmé roun milyon sòlda, é nou ka konprann sa. Mé Aza rivé ganyen paské i konté asou Jéova. Malérèzman, lò Aza jwenn rounòt problèm, i pa konté asou Jéova. Lò méchan rwa Israyèl-a Baasa ataké l’, Aza alé doumandé rwa Siri-a idé li. Sa désizyon-an mennen malò ! Dipi sa jou-a, Aza pa jen arété fè lagèr. Jéova fè so profèt Anani di Aza : « A paské to fè rwa Siri-a konfyans pasé to fè Jéova to Bondjé konfyans ki larmé rwa Siri-a chapé di to lanmen » (2 Chron. 16:7, 9 ; 1 Rois 15:32). Kisa sa ka anprann nou ?

14. a) Kisa roun jenn frè ké fè si i ka fè Jéova konfyans ? b) É dapré 1 Timothée 4:12, si roun jenn frè ka fè Jéova konfyans, ki bénédiksyon i ké jwenn ?

¹⁴ Jenn frè-ya, kontinyé gen imilité é kontinyé konté asou Jéova. Jou zòt batizé-a, zòt montré zòt té gen bokou lafwa é ki zòt té ka fè Jéova konfyans. É Jéova té vréman kontan rousouvwè zòt annan so fanmi. Sa zòt bézwen fè aprézan, a kontinyé fè Jéova konfyans. Lò nou gen gran désizyon pou nou pran, pitèt sa fasil pou nou konté asou Jéova. Mé, é pou ròt bagaj-ya ? Sa vréman trè enpòrtan ki zòt konté asou Jéova lò zòt ka pran roun désizyon, menm si a pou chwazi zòt anmizman, ki kalité travay zòt ké fè ouben kisa zòt ké fè annan zòt lavi. Pa konté asou zòt pròp kò. Chaché pito ki prensip ka alé ké zòt sitiasyon é tchenbé kont di sa prensip-ya pou désidé sa zòt ké fè (Prov. 3:5, 6). Si zòt ka fè sa, Jéova ké kontan é frè ké sò-ya annan zòt asanblé ké rèspèkté zòt (li 1 Timothée 4:12).

KISA ÈKZANP JOZAFAT KA ANPRANN ZÒT

15. Dapré 2 Chroniques 18:1-3 ké 19:2, kisa rwa Jozafat fè ki pa té bon ?

¹⁵ Kou nou tout, zòt pa parfè. É détan, zòt ké fè bagaj ki pa bon. Mé sa pa divèt anpéché zòt fè tousa zòt pouvé pou Jéova. Annou pran èkzanp rwa Jozafat. I té gen patché bèl kalité. Lò i té jenn, i té ka ‘chaché Bondjé so papa é i té ka rèspèkté so koumannman’. Anplis di sa, i voyé osi plizyèr prens annan tout péyi-a pou yé té anprann pèp-a lalwa Jéova (2 Chron. 17:4, 7). Mé menm si i té vréman lé fè Bondjé plézi, détan sa rivé li pran mové désizyon. Parèkzanp, roun jou i té pran roun mové désizyon, Jéova voyé roun profèt pou di li ki sa i té fè-a pa té bon (li 2 Chroniques 18:1-3 ; 19:2). Kisa sa ka anprann nou ?

16. Kisa jenn frè-ya pouvé anprann ké èkzanp Rajeev ?

¹⁶ Lò yé ka bay zòt roun konsèy, a pou zòt asèpté konsèy-a é a pou zòt fè sa yé ka di zòt fè. Kou roun patché jennjan, pitèt sa difisil pou zòt mété sèrvis pou Jéova an prémyé annan zòt lavi. Mé pa dékourajé. Gadé sa ki rivé roun jenn frè yé ka aplé Rajeev. Men sa i ka di : « Détan mo pa té savé sa mo té lé fè annan mo lavi. Kou roun patché jenn di mo laj, sa ki té ka entérésé mo plis, a té fè èspòr ouben anmizé pasé alé annan réinyon-yan ouben préché. » Kisa ki idé Rajeev ? Roun ansyen trè janti bay li déztrwa konsèy. Rajeev ka rakonté : « I idé mo réfléchi asou prensip ki annan 1 Timothée 4:8. » Rajeev té gen imilité, i kouté konsèy frè-a bay li é i réfléchi asou sa ki té pi enpòrtan annan so lavi. I ka di : « Mo désidé mété sèrvis pou Jéova an prémyé annan mo lavi. É déztrwa lannen apré, mo divini asistan. »

FÈ TOUSA ZÒT POUVÉ POU ZÒT PAPA KI ANNAN SYÈL-A FYÈR DI ZÒT

17. Kisa frè ké sò-ya annan asanblé-a ka rousanti pou jenn frè-ya ki ka sèrvi Jéova ?

¹⁷ Nou jenn frè-ya, frè ké sò-ya annan zòt asanblé kontan sèrvi Jéova ansanm ké zòt ! (Soph. 3:9). É yé kontan wè fason zòt ka fè travay yé ka bay zòt fè-a ké bon balan. Yé kontan zòt (1 Jean 2:14).

18. Dapré Proverbes 27:11, kisa Jéova ka rousanti pou jenn frè-ya ki ka adoré l’ ?

¹⁸ Pa janmen bliyé ki Jéova kontan zòt osi é i ka fè zòt konfyans. I di ki annan dèrnyé jou-ya i té ké gen roun larmé jenn wonm ki té ké vini ‘bay li yé fòrs ké tout yé tchò’ (Ps. 110:1-3). I savé ki zòt kontan li é ki zòt lé fè tousa zòt pouvé pou adoré l’. Donk pran pasyans ké ròt-ya, mé pran pasyans osi ké zòt menm. Lò zòt ka fè roun bagaj ki pa bon, a pou zòt asèpté konsèy yé ka bay zòt, é a pou zòt wè sa kousidiré a Jéova ki ka fòrmé zòt (Héb. 12:6). A pou zòt travay rèd pou byen fè tout travay yé ka bay zòt fè. É pi enpòrtan-an, annan tousa zòt ka fè, a pou zòt Papa ki annan syèl-a toujou fyèr di zòt (li Proverbes 27:11).