ARTIK POU ÉTIDYÉ 10
KANTIK 31 Marche avec Dieu !
Anprann wè bagaj-ya kou Jéova ké Jézi ka wè yé
« Kou Kris soufri annan so lachè, zòt menm osi, a pou zòt gen menm mantalité-a » (1 PIERRE 4:1).
SA NOU KÉ ANPRANN
Nou ké wè kouman apot Pyèr anprann imité fason Jézi ka wè bagaj-ya é sa sa ka anprann nou.
1-2. a) Kouman nou divèt kontan Jéova ? b) Kouman Jézi montré ki i té kontan Jéova ké tout so pansé ?
« TO DIVÈT kontan Jéova to Bondjé ké tout to tchò, ké tout to nanm, ké tout to fòrs é ké tout to pansé » (Luc 10:27). Jézi byen èspliké ki sa koumannman-an, a té sa-la ki té pi enpòrtan annan Lalwa Moyiz-a. Nou kontan Jéova ké tousa nou gen annan nou tchò, sa lé di sa nou lé ké sa nou ka rousanti. Kou nou kontan l’, nou ka bay li tout nou fòrs osi. Mé, nou kontan Jéova osi ké tout nou pansé, sa lé di fason nou ka wè bagaj-ya. Nou lé wè bagaj-ya kou Jéova ka wè yé. Asiré, nou pa ké janmen konprann di roun fason ki parfè kouman Jéova ka réfléchi. Mé, nou pouvé pi byen konprann kouman i ka réfléchi, lò nou ka étidyé « mantalité Kris-a » paské i byen konnèt kouman Jéova ka wè bagaj-ya é li-menm ka wè bagaj-ya kou li (1 Cor. 2:16).
2 Jézi té kontan Jéova ké tout so pansé. I té savé sa i té lé i fè é i té byen désidé fè tousa i té doumandé li fè, menmsi sa té lé di ki i té ké soufri. Sa ki té an prémyé annan so lavi, a té fè volonté so Papa é i pa janmen lésé anyen vin pi enpòrtan ki sa.
3. Kisa Pyèr anprann grasa èkzanp Jézi, é kisa i ankourajé krétyen-yan fè ? (1 Pierre 4:1).
3 Pyèr ké ròt apot-ya té gen chans, yé pasé roun bon moman d’tan ké Jézi é yé anprann kouman i té ka wè bagaj-ya. Annan prémyé lèt Bondjé fè Pyèr ékri, Pyèr di krétyen-yan ki yé té divèt gen menm mantalité ki Kris (li 1 Pierre 4:1). Annan lang Pyèr ékri, lò i ékri « a pou zòt gen », i sèrvi sa yé ka di lò roun sòlda ka préparé pou alé lagèr é ka pran so zarm. Si krétyen-yan gen menm mantalité ki Kris, sa lé di si yé ka wè bagaj-ya kou Jézi ka wè yé, yé ké armé pou briga kont tout kalité vyé anvi yé pouvé gen épi kont monn Satan ka dirijé-a (2 Cor. 10:3-5 ; Éph. 6:12).
4. Kisa nou ké wè annan sa artik-a ?
4 Annan sa artik-a nou ké wè kouman Jézi ka wè bagaj-ya. É nou ké wè kisa nou pouvé fè pou nou rivé wè bagaj-ya kou li-menm ka wè yé. So èkzanp ké anprann nou 1) imité fason Jéova ka wè bagaj-ya, 2) fè nou kò toupiti, é 3) sa dé moun ki ka byen réfléchi, dé moun ki ka priyè é ki ka konté asou Jéova.
IMITÉ FASON JÉOVA KA WÈ BAGAJ-YA
5. Annan ki sitiasyon Pyèr montré ki i pa té ka wè bagaj-ya kou Jéova té ka wè yé ?
5 Roun jou, Pyèr montré ki i pa té ka wè bagaj-ya kou Jéova té ka wè yé. Jézi té èspliké so apot ki i té ké gen pou alé Jérizalèm, é ki chèf rélijyé-ya té ké arété l’, malmennen l’ épi tchwé l’ (Mat. 16:21). Pyèr té savé ki Jézi té sa Mési Bondjé té promèt ki té ké sové so pèp. Donk, sa té pitèt rèd pou Pyèr asèpté ki Jéova té ké lésé moun tchwé Jézi (Mat. 16:16). Atò, i mennen Jézi pi lwen é i di l’ : « Pa di bagaj konsa Sényèr. Sa pa ké rivé to pyès » (Mat. 16:22). Kou Pyèr pa té ka wè sitiasyon-an kou Jéova té ka wè l’, i pa té dakò ké Jézi.
6. Kouman Jézi montré ki i té ka wè bagaj-ya èkzaktéman kou Jéova té ka wè yé ?
6 Jézi té ka wè bagaj-ya èkzaktéman kou so Papa té ka wè yé. Men sa i réponn Pyèr : « Pasé dèyè mo, Satan ! To kou roun ròch asou mo chimen ki pouvé fè mo tonbé, pas to pa ka wè bagaj-ya kou Bondjé ka wè yé, to ka wè bagaj-ya kou moun ka wè » (Mat. 16:23). Jézi té savé ki Jéova pa té lé i gadé pou so kò rounso. Pyèr té dèt ka éséyé idé Jézi, mé Jézi pa kouté l’ pyès. Sa jou-a, Pyèr konprann ki sa enpòrtan di wè bagaj-ya kou Bondjé ka wè yé. A roun bagaj nou menm osi nou divèt anprann.
7. Kisa ka montré ki Pyèr éséyé wè bagaj-ya kou Jéova té ka wè yé ? (gadé zimaj-a ).
7 Pita, Pyèr éséyé wè bagaj-ya kou Jéova té ka wè yé. Jéova té di ki roun jou, moun nasyon-yan té ké pouvé fè parti di so pèp é sa jou-a té rivé. Bondjé di Pyèr alé préché pou Kòrnèy, a roun annan prémyé moun ki pa té Jwif ki té ké divini krétyen. Kou Jwif-ya pa té ka pran men ké moun ki pa té Jwif, sa nòrmal ki Pyèr té bézwen yé idé l’ anvan i alé wè Kòrnèy. Lò i konprann sa Jéova té ka pansé di sa-ya ki pa té Jwif, i chanjé fason i té ka wè yé. É lò yé voyé moun chaché l’, ‘i pa fè ni roun ni dé, i alé ké yé’ (Actes 10:28, 29). I préché pou Kòrnèy ké so fanmi é yé batizé (Actes 10:21-23, 34, 35, 44-48).
Pyèr ka antré annan kaz Kòrnèy (gadé paragraf 7).
8. Kisa ki ké montré ki nou anprann wè bagaj-ya kou Jéova ka wè yé ? (1 Pierre 3:8).
8 Plizyèr lannen pita, Pyèr di krétyen-yan ki yé té divèt ‘tonbé dakò annan fason yé ka réfléchi’ (li 1 Pierre 3:8). Nou pouvé tonbé dakò ké nou frè ké sò annan fason nou ka réfléchi, si nou ka imité fason Jéova ka wè bagaj-ya é a annan Labib nou ka anprann sa. Annou pran roun èkzanp. Jézi ankourajé so disip mété Rwayonm-an an prémyé annan yé lavi (Mat. 6:33). Roun proklamatèr annan nou asanblé ki lé swiv sa konsèy-a ké pitèt désidé sèrvi Jéova a plen tan. Pasé nou dékourajé frè-a ouben sò-a épi fè li gadé pou so kò rounso, nou divèt ankourajé l’ fè sa i désidé fè épi di li ki nou la pou idé l’.
FÈ TO KÒ TOUPITI
9-10. Kouman Jézi montré ki i té ka fè so kò toupiti ?
9 Lannwit anvan yé tchwé Jézi, i montré Pyèr ké ròt apot-ya kouman yé té pouvé fè yé kò toupiti. Roun tibi tan anvan sa, sa menm jou-a, Jézi té voyé Pyèr ké Jan chaché sa yé té ké bézwen pou dèrnyé répa-a i té ké manjé ké so apot anvan i mouri. Asiré, Pyèr ké Jan té prévwè roun bésin ké plizyèr sèrvyèt pou roun moun pouvé lavé pyé envité-ya. Mé, kimoun ki té ké fè so kò toupiti épi lavé pyé tout moun ?
10 Jézi pa ézité, i montré ki i té ka fè so kò toupiti. I fè sa roun sèrvitèr té divèt fè é so disip pa té ka antann sa menm. I tiré lenj ki té asou lenj i té mété-a, i maré so ren ké roun sèrvyèt, i vidé dlo annan bésin-an épi i koumansé lavé yé pyé (Jean 13:4, 5). Sa dèt pran li bokou tan pas yé té 12 é annan yé i té gen Jida ki té ké trayi l’. Magré sa, i fè so kò toupiti é i lavé pyé tout disip-ya. Épi i pran tan èspliké yé jantiman : « Ès zòt konprann sa mo soti fè pou zòt la ? Zòt ka aplé mo “Ansényan” ké “Sényèr”, é zòt gen rézon, pas a sa mo sa. Donk, si mo menm ki sa Sényèr-a ké Ansényan-an, mo lavé zòt pyé, zòt menm osi zòt divèt lavé pyé zòt konpanyen » (Jean 13:12-14).
A ofon nou tchò nou ka fè nou kò toupiti
11. Kisa ki ka montré ki Pyèr anprann fè so kò toupiti ? (1 Pierre 5:5 ; gadé zimaj-a osi).
11 Pyèr pa jen bliyé fason Jézi fè so kò toupiti. Lò Jézi routounen annan syèl-a, Pyèr géri roun mouché ki pa té pouvé maché dipi i té toupiti (Actes 1:8, 9 ; 3:2, 6-8). Roun patché moun wè sa mirak-a é yé vin òbò Pyèr (Actes 3:11). Mé Pyèr pa rété la ka kouté moun ka poté li anlè, menmsi annan so kiltir moun té kontan lò yé té ka bay yé grad. Pasé i fè sa, i fè so kò toupiti é di yé louwé Jéova ké Jézi. Men sa i di yé : « A grasa non Jézi é a grasa nou lafwa annan so non si sa mouché zòt ka wè é zòt konnèt-a vin gaya » (Actes 3:12-16). Pita, Pyèr ékri krétyen-yan pou ankourajé yé anprann fè yé kò toupiti. Annan lang grèk-a i sèrvi, i palé di sa bèl kalité-a kousidiré a té roun lenj yé té ka mété. Sa ka fè nou sonjé fason Jézi maré so ren ké roun sèrvyèt épi lavé pyé so apot (li 1 Pierre 5:5).
Lò Pyèr fè roun mirak, i fè so kò toupiti. I di moun-yan louwé Jéova ké Jézi. Nou menm osi nou pouvé fè nou kò toupiti lò nou pa ka antann moun poté nou anlè ouben rékonpansé nou pou roun bon bagaj nou fè (gadé paragraf 11-12).
12. Kouman nou pouvé swiv èkzanp Pyèr épi kontinyé anprann fè nou kò toupiti ?
12 Nou ké swiv èkzanp Pyèr si nou ka anprann fè nou kò toupiti. A pa fason roun moun ka palé rounso ka montré ki i ka fè so kò toupiti. Sa Pyèr di, ka montré ki a ofon nou tchò nou ka fè nou kò toupiti. Si nou ka fè bagaj pou ròt-ya, a pa paské nou lé yé poté nou anlè, mé a paské nou kontan yé é paské nou kontan Jéova. Nou ka montré ki nou ka fè nou kò toupiti lò nou ka fè tousa nou pouvé pou nou sèrvi Jéova ké ròt-ya ké tchò kontan, menmsi pyès moun pa ka wè sa nou ka fè (Mat. 6:1-4).
A POU TO SA ROUN « MOUN KI KA BYEN RÉFLÉCHI »
13. Kisa roun « moun ki ka byen réfléchi » ka fè ?
13 Kisa roun « moun ki ka byen réfléchi » ka fè ? (1 Pierre 4:7). Roun krétyen ki ka byen réfléchi ka chaché kouman Jéova ka wè bagaj-ya anvan i pran roun désizyon. I savé ki i pa gen pyès bagaj ki pi enpòrtan pasé so lanmityé ké so Papa. É i pa ka bay so kò grad, i ka rékonnèt ki i pa konnèt tout bagaj. I ka konté asou Jéova é i ka priyè l’ souvan pou i gidé l’a.
14. Annan ki sitiasyon Pyèr pa fè Jéova konfyans ?
14 Lannwit anvan i mouri-a, Jézi di so disip : « Akoz di sa ki ké rivé mo, zòt tout ké tribiché sa lannwit-a. » Pyèr té krè ki i té fò, men sa i réponn : « Menmsi tout ròt-ya ka tribiché akoz di sa ki ké rivé to, mo menm mo pa ké janmen tribiché ! » Mé, pita sa lannwit-a, Jézi bay roun ran annan so disip sa konsèy-a : « Véyé épi priyè toulong » (Mat. 26:31, 33, 41). Si Pyèr té swiv so konsèy, i té ké gen kouraj di douvan tout moun ki i té sa disip Jézi. Malérèzman, i di ki i pa té konnèt so mèt, é a pa ti rigrété i rigrété sa (Mat. 26:69-75).
15. Kisa ki idé Jézi kontinyé byen réfléchi lannwit anvi i mouri-a ?
15 Kanta pou Jézi li-menm, i konté asou Jéova ké tout so tchò. Menmsi i té parfè, i priyè toulong. A konsa i rivé gen kouraj fè sa Jéova té lé i fè-a (Mat. 26:39, 42, 44 ; Jean 18:4, 5). Asiré, Pyèr pa janmen bliyé ki Jézi priyè plizyèr fwa lannwit anvan i mouri-a.
16. Kisa ka montré ki piti piti Pyèr divini roun moun ki ka byen réfléchi ? (1 Pierre 4:7).
16 Piti piti, Pyèr anprann konté asou Jéova plis ankò épi priyè l’ pi souvan. Lò Jézi résisité i promèt Pyèr ké ròt apot-ya bay yé so lèspri sen pou idé yé préché bon nouvèl-a kou i té doumandé yé fè. Mé i di yé osi rété Jérizalèm jiktan i voyé sa lèspri sen-an (Luc 24:49 ; Actes 1:4, 5). Kisa Pyèr fè toupannan i té ka antann ? Li ké so konpanyen « té ka kontinyé priyè ansanm » (Actes 1:13, 14). Pita, annan so prémyé lèt, Pyèr ankourajé krétyen-yan divini dé moun ki ka byen réfléchi, ki ka fè Jéova konfyans é ki ka priyè l’ (li 1 Pierre 4:7). I té divini roun frè ki té djòk annan lavérité é ki té ka byen réfléchi é i té pouvé idé so frè ké sò-ya vin pi fò (Gal. 2:9).
17. Kisa nou divèt fè toulong kèlkéswa sa nou konnèt fè ? (gadé zimaj-a osi).
17 Pou nou sa dé moun ki ka byen réfléchi, a pou nou priyè Jéova souvan. Annou toujou sonjé ki nou bézwen priyè l’ kèlkéswa sa nou konnèt fè. Atò, annou doumandé l’ gidé nou èspésyalman lò nou gen désizyon enpòrtan pou nou pran, pas nou sir ki i savé sa ki pi bon pou nou.
Pyèr anprann konté asou Jéova plis ankò épi priyè l’ pi souvan. Nou menm osi nou ké divini dé moun ki ka byen réfléchi si nou ka doumandé Jéova idé nou èspésyalman lò nou gen désizyon enpòrtan pou nou pranb (gadé paragraf 17).
18. Kisa nou divèt toujou kontinyé fè ?
18 Nou gen rékonésans pou fason Jéova fè nou-a pas nou pouvé imité so kalité (Gen. 1:26). Nou pa pouvé imité l’ roun fason ki parfè, a vré (Is. 55:9). Mé, kou Pyèr, nou pouvé pi byen konprann fason Jéova ka wè bagaj-ya. Atò, annou kontinyé anprann wè bagaj-ya kou i ka wè yé, annou toujou anprann fè nou kò toupiti é annou kontinyé divini dé moun ki ka byen réfléchi.
KANTIK 30 Mon Ami, Mon Dieu, mon Père
a Pou anprann plis bagaj asou sa, alé asou jw.org ouben annan JW Library® épi gadé artik « 2 Timothée 1:7 : “Dieu ne nous a pas donné un esprit de crainte” » annan parti « Que veulent dire ses versets ? » annan paragraf-a ki ka èspliké a kisa ki « bon sens ».
b MEN SA NOU KA WÈ ASOU ZIMAJ-A : Roun sò ka priyè annan so tchò toupannan i ka antann anvan yé pozé l’ késyon pou roun travay.