Lanmen Jéova pa janmen tro kourt

1. Kouman Moyiz montré ki i té ka fè Jéova konfyans lò i fè Israyélit-ya soti Éjip ?

ANNAN lèt Pòl ékri pou Ébré-ya, i ka palé di bokou sèrvitèr Jéova ki té gen lafwa annan li, parèkzanp Moyiz té gen bokou lafwa (Héb. 3:2-5 ; 11:23-25). I montré ki i té ka fè Jéova konfyans lò i idé Israyélit-ya soti Éjip. I pa lésé Faraon ké so larmé arété l’. É pas i té ka fè Jéova konfyans, i fè Israyélit-ya janbé lanmè Rouj-a épi i gidé yé annan dézèr-a (Héb. 11:27-29). Près tout Israyélit-ya arété fè Jéova konfyans, yé té gen dout, yé pa té sir ki Jéova té ké pouvé pran swen di yé. Mé Moyiz li menm kontinyé fè Jéova konfyans. I té byen gen rézon gardé so lafwa pas Jéova pèrmèt Israyélit-ya rété vivan annan dézèr-a, i fè roun mirak pou bay yé dlo ké manjéa (Ex. 15:22-25 ; Ps. 78:23-25).

2. Poukisa Jéova doumandé Moyiz : ‘Ès mo lanmen tro kourt ?’ (Nombres 11:21-23).

² Menmsi lafwa Moyiz té fò, apéprè roun lannen apré i idé Israyélit-ya soti Éjip, i koumansé doumandé so kò si Jéova té ké pouvé bay yé vyann pou yé manjé. Jéova té di ki i té ké fè l’, mé Moyiz pa té ka wè kouman Jéova té ké pouvé bay tout sa patché moun-yan asé vyann pou yé manjé annan roun dézèr. Atò, Jéova doumandé l’ : ‘Ès mo lanmen tro kourt ?’ (li Nombres 11:21-23). Annan sa vèrsé-ya « lanmen Jéova » lé di so lèspri sen, pwisans-a i ka sèrvi pou fè sa i lé. A kousidiré Jéova té ka doumandé Moyiz : « Ès to ka pansé mo pa pouvé fè sa mo di ? »

3. Poukisa nou divèt réfléchi asou sa Jéova doumandé Moyiz annan Nombres 11:23 ?

³ Ès to ja doumandé to kò si Jéova ké pran swen di to ké to fanmi ? Kèlkéswa nou sitiasyon, nou tout ké anprann bokou bagaj grasa sa ki rivé Moyiz ké Israyélit-ya lò yé pansé ki Jéova pa té ké pouvé pran swen di yé. Annan sa artik-a, nou ké wè plizyèr prensip annan Labib ki ké idé nou pou nou pi sir ankò ki lanmen Jéova pa janmen tro kourt.

KISA SA KI RIVÉ MOYIZ KÉ ISRAYÉLIT-YA LÒ YÉ TÉ ANNAN DÉZÈR-A KA ANPRANN NOU ?

4. Poukisa Israyélit-ya koumansé doumandé yé kò si Jéova té ké pouvé pran swen di yé ?

⁴ Poukisa Israyélit-ya koumansé doumandé yé kò si Jéova té ké pouvé pran swen di yé ? Pèp Israyèl-a ansanm ké « roun patché étranjé » té soti Éjip é yé té k’alé annan péyi Bondjé té promèt yé-a. Sa té ka fè roun moman déja yé té annan dézèr-a (Ex. 12:38 ; Deut. 8:15). Étranjé-ya té las manjé lamann é bokou Israyélit koumansé plenn yé kò osi (Nomb. 11:4-6). Tout sa moun-yan té yèg pas yé té ka sonjé sa yé té ka manjé lò yé té an Éjip. É dapré sa nou ka konprann, kou yé té ka mété présyon asou li, Moyiz vin krè ki a té li ki té divèt bay yé sa yé té ka doumandé (Nomb. 11:13, 14).

5-6. Kouman étranjé-ya détenn asou bokou Israyélit, é kisa sa ka anprann nou ?

⁵ Aparaman, Israyélit-ya lésé étranjé-ya ki té engra détenn asou yé. Nou menm osi nou pouvé lésé mantalité moun-yan ki engra annan sa monn-an détenn asou nou épi fè konparézon parapòrta sa Jéova ka bay nou. Sa pouvé rivé nou si nou ka rigrété sa nou té gen anvan ouben si nou ka jalou sa ròt-ya gen. Parkont, si nou kontan ké sa nou gen kèlkéswa nou sitiasyon, nou tchò ké pi kontan.

⁶ Israyélit-ya té divèt sonjé ki Jéova té promèt yé ki lò yé té ké rivé annan péyi i té promèt yé-a, yé té ké gen bokou bagaj. Mé sa promès-a pa té ké fèt annan dézèr-a, a lò yé té ké rivé annan péyi-a yé té ké gen sa bagaj-ya. Menm fason-an, pasé nou mété nou lidé asou sa nou pa gen annan sa monn-an jòdla, annou mété nou lidé asou sa Jéova promèt bay nou annan monn nouvo-a. Annou réfléchi osi asou vèrsé-ya ki ké idé nou fè Jéova konfyans ankò plis.

7. Poukisa nou pouvé sir ki lanmen Jéova pa tro kourt ?

⁷ Mé pitèt to ka doumandé to kò poukisa Jéova doumandé Moyiz : « Ès mo lanmen tro kourt ? » Dapré sa nou ka wè, i té lé idé l’ konprann ki so lanmen pwisan é ki anplis di sa, i pouvé idé so sèrvitèr kèlkéswa koté yé fika. I té pouvé bay Israyélit-ya vyann pou yé manjé menmsi yé té annan roun dézèr. Grasa « so lanmen ki fò […] ké so bra ki pwisan », Jéova montré so pwisans (Ps. 136:11, 12). A pou nou sir ki lò nou annan éprèv, so lanmen pouvé idé nou chak kèlkéswa koté nou fika (Ps. 138:6, 7).

8. Ki vyé konpòrtman bokou Israyélit té gen, é kisa sa ka anprann nou ? (gadé zimaj-a osi).

⁸ Jéova fè sa i di i té ké fè, i bay Israyélit-ya rounlo ké roun patché zozo pou yé manjé. Mé, yé pa di l’ mèrsi pou sa mirak-a. Pasé sa, bokou annan yé fè voras. Pannan tout lajournen, tout lannwit ké tout landimen-an, yé ranmasé rounlo ké roun patché zozo. Jéova lévé faché dèyè « sa ki té ka gadé yenki pou yé douvan lèstomak » é i pini yé (Nomb. 11:31-34). Kisa sa ka anprann nou ? Nou divèt panga chaché toujou gen plis. Ki nou rich ki nou maléré, anyen pa divèt pi enpòrtan pasé chaché gen « richès annan syèl-a » é a sa nou ka fè lò nou ka fè tousa nou pouvé pou nou vin pi pròch di Jéova ké Jézi (Mat. 6:19, 20 ; Luc 16:9). Si a sa nou ka fè, nou pouvé sir ki Jéova ké bay nou sa nou bézwen.

9. Di kisa nou pouvé sir ?

⁹ Jòdla osi, Jéova paré pou idé so sèrvitèr. Sa pa lé di ki nou pa ké janmen bézwen soumaké ouben ki nou pa ké janmen fenb. Mé Jéova pa ké janmen lagé nou. A chak fwa nou ké annan roun éprèv, i ké la ké nou. Kouman nou pouvé montré ki nou sir ki i ké tchenbé nou ké so lanmen é ki i ké bay nou sa nou bézwen pou viv ? Annou wè dé sitiasyon koté nou pouvé montré sa : 1) lò nou gen problèm soumaké épi 2) lò nou ka sonjé sa nou ké bézwen lò nou ké pi vyé.

LÒ NOU GEN PROBLÈM SOUMAKÉ

10. Ki problèm nou pouvé jwenn ?

¹⁰ Kou lafen sa monn-an tou pròch rivé, i ké gen plizanplis problèm soumaké. Akoz di problèm politik, di lagèr, di katastròf natirèl ouben di pandémi-ya, pitèt nou ké gen pou achté sèrten bagaj nou pa té prévwè achté. Pitèt nou ké pédi nou travay, sa nou gen ouben pitèt nou ké gen pou lésé nou kaz. Pitèt nou ké divèt chaché rounòt travay ouben nou ké divèt déménajé ké nou fanmi pou nou pran swen di yé. Kisa ki ké idé nou pran désizyon ki ka montré ki nou sir ki lanmen Jéova pouvé idé nou kèlkéswa koté nou fika ?

11. Kisa ki pouvé idé to lò to gen problèm soumaké ? (Luc 12:29-31).

¹¹ Prémyé bagaj nou divèt fè, a di Jéova sa ki ka fè nou enkyèt (Prov. 16:3). Doumandé l’ bay to sajès pou to pran bon désizyon, doumandé l’ idé to ‘arété kasé to tèt’ pou to rété kalm é pou idé to kontan ké sa to gen (li Luc 12:29-31 ;1 Tim. 6:7, 8). To pouvé fè réchèrch asou nou piblikasyon osi pou to trapé konsèy asou sa to pouvé fè lò to gen problèm soumaké. Bokou moun trapé bon konsèy asou jw.org.

12. Ki késyon roun krétyen divèt pozé so kò pou i pran miyò désizyon pou li ké so fanmi ?

¹² I gen moun ki asèpté roun travay ki té ka oblijé yé rété lwen di yé fanmi. Mé souvan, yé trapé dézagréman. Anvan to asèpté roun travay, a pa pou to gadé konmyen soumaké to ké touché rounso. A pou to gadé osi si sa ké idé to ké to fanmi rété pròch ké Jéova (Luc 14:28). Doumandé to kò : « Si mo ka rété lwen di mo mari ouben di mo madanm, kouman mo maryaj ké fika ? Si mo ka asèpté sa travay-a, ès mo ké pouvé alé préché, alé lasal épi pasé tan ké mo frè ké sò ? » Si to gen timoun, men sa to divèt doumandé to kò osi : « Kouman mo ké pouvé lévé mo timoun “soulon prensip ké avèrtisman Jéova ka bay” si mo pa la ké yé ? » (Éph. 6:4). Lò to gen roun désizyon pou to pran, pa kouté ni zanmi ni moun to fanmi ki pa ka swiv sa Labib ka di. Pasé to fè sa, swiv sa Jéova ka dic. Men sa ki rivé Tony, roun frè ki ka rété an Azi. Yé propozé l’ plizyèr travay ki té ké pèrmèt li touché bokou soumaké, mé ki té ké oblijé l’ alé travay annan rounòt péyi. Tony priyè parapòrta sa, i palé ké so madanm é apré sa, i désidé pa asèpté sa travay-a. I pito désidé dépansé mwens soumaké. Men sa Tony ka di jòdla : « Mo rivé idé plizyèr moun anprann konnèt Jéova é mo timoun kontan Jéova. Nou fanmi anprann ki dipi nou ka swiv sa Matthieu 6:33 ka di, Jéova ka pran swen di nou. »

LÒ NOU KA SONJÉ SA NOU KÉ BÉZWEN LÒ NOU KÉ PI VYÉ

13. Kisa nou pouvé fè jòdla pou gen sa nou ké bézwen pou viv lò nou ké pi vyé ?

¹³ Nou pouvé montré ki nou sir ki lanmen Jéova pa tro kourt lò nou ka prévwè sa nou ké fè pou nou gen sa nou bézwen lò nou ké granmoun. Labib ka ankourajé nou travay rèd pou nou gen sa nou ké bézwen pita (Prov. 6:6-11). Donk, a roun bon bagaj lò nou pouvé mété roun ti kichoz asou koté pou lò nou ké pi vyé. Soumaké pouvé idé nou lò nou bézwen, a vré (Éccl. 7:12). Mé, a pa pou soumaké-a divini sa ki pi enpòrtan annan nou lavi.

14. Poukisa nou divèt tchenbé kont di Hébreux 13:5 lò nou ka désidé sa nou ké fè pou nou gen sa nou bézwen lò nou ké pi vyé ?

¹⁴ Jézi sèrvi roun èkzanp pou èspliké ki roun moun ki ka chaché gen bokou soumaké san i pa « rich pou Bondjé », sòt (Luc 12:16-21). Nou pa savé sa ki pouvé rivé nou dimen (Prov. 23:4, 5 ; Jacq. 4:13-15). Anplis di sa, nou ka jwenn problèm pas nou disip Kris. Jézi di ki si nou lé divini so disip, nou divèt paré « lésé » tousa nou gen (Luc 14:33). A sa ki rivé krétyen-yan ki té ka rété Jidé annan 1^é syèk-a. Yé tchò té kontan menmsi yé té pédi tout yé bagaj (Héb. 10:34). É jòdla, roun patché frè ké sò pédi yé travay paské yé pa té lé soutni roun parti politik (Rév. 13:16, 17). Kisa ki bay yé fòrs pou yé fè sa ? Yé té ka fè sa promès Jéova-a konfyans : « Mo pa ké jen lésé to, é mo pa ké jen lagé to » (li Hébreux 13:5). Donk, annou fè sa nou pouvé pou nou gen sa nou bézwen lò nou ké pi vyé, mé si roun bagaj nou pa té prévwè ka sirprann nou, annou fè Jéova konfyans.

15. Kisa papa-ya ké manman-yan divèt sonjé parapòrta yé timoun ? (gadé zimaj-a).

¹⁵ Annan sèrten kiltir, moun-yan ka fè timoun pas konsa, timoun-yan ké okipé di yé lò yé ké granmoun. Mé Labib ka di ki a papa-ya ké manman-yan ki divèt bay yé timoun sa yé bézwen pou viv (2 Cor. 12:14). Lò laj ké rantré, détan, yé ké bézwen moun idé yé fè sèrten bagaj é yé timoun ké kontan fè sa pou yé (1 Tim. 5:4). Mé paran-yan ki ka fè Jéova konfyans ka konprann ki yé tchò ké pi kontan si yé ka idé yé timoun adoré Jéova, pasé yé lévé yé timoun pou yé idé yé lò yé ké pi vyé (3 Jean 4).

16. Kouman papa-ya ké manman-yan pouvé idé yé timoun travay pou yé gen sa yé bézwen lò yé ké vin gran ? (Éphésiens 4:28).

¹⁶ Zòt ki papa ké manman, lò zòt ka anprann zòt timoun travay pou yé gen sa yé bézwen lò yé ké vin gran, idé yé fè Jéova konfyans. Montré yé ki zòt menm zòt ka fè Jéova konfyans. Dipi yé toupiti, montré yé ki sa enpòrtan di travay rèd (Prov. 29:21 ; li Éphésiens 4:28). Lò yé ké lékòl, ankourajé yé byen travay. Fè réchèrch osi pou trapé prensip-ya ki annan Labib ki ké idé yé byen chwazi ki diplonm ouben ki fòrmasyon yé ké chwazi. Sa zòt lé, a anprann zòt timoun travay pou yé gen sa yé bézwen lò yé ké vin gran é pou yé rivé gen tan pou préché é pitèt menm divini pyonyé.

17. Di kisa nou pouvé sir ?

¹⁷ Sèrvitèr Jéova-ya ki fidèl pouvé sir ki Jéova pouvé é ki i lé bay yé sa yé bézwen pou viv. Pi lafen sa monn-an ké vin pròch, pi nou ké bézwen fè Jéova konfyans. Mé kèlkéswa sa ka rivé nou, annou byen désidé fè Jéova konfyans. A pou nou sir ki i ké sèrvi so pwisans pou bay nou sa nou bézwen pou viv. A pou nou sir ki so lanmen ki fò é so bra ki pwisan pa ké janmen tro kourt, Jéova ké toujou pouvé idé nou kèlkéswa koté nou fika.