LÉSON 26

Poukisa i gen patché méchansté ké soufrans ?

Zimaj piblikasyon-an

Lò roun malò rivé moun-yan ka doumandé : « Poukisa sa bagaj-ya ka rivé ? » Répons-ya ki annan Labib-a ka bay nou tchò kontan.

1. Kouman méchansté-a rivé asou latè-a ?

Satan Djab-a tounen so do bay Jéova. I té lé koumandé tout moun. Satan bloublou Adan ké Èv pou yé menm osi tounen yé do bay Jéova. Kouman Satan fè sa ? I manti pou Èv (Genèse 3:1-5). I fè li krè ki Jéova pa té lé bay li roun bon bagaj. Satan fè li konprann ki imen-yan té ké gen plis tchò kontan si yé pa té ka obéyi Bondjé. Lò i di ki Èv pa té ké mouri, Satan manti. A té prémyé manti-a. A pou sa Labib-a ka di ki Satan a « roun mantò é a li ki papa manti-a » (Jean 8:44).

2. Kisa Adan ké Èv désidé fè ?

Jéova té kontan bay Adan ké Èv tousa yé té bézwen. I té di yé ki yé té pouvé manjé frwi di tout pyébwa ki té annan jarden Édèn-an sof rounsèl (Genèse 2:15-17). Mé yé désidé dézobéyi. Èv « pran roun frwi é i manjé annan l’ ». Pita, Adan « manjé » li menm osi (Genèse 3:6). Adan ké Èv té parfè, a pou sa, sa pa té difisil pou yé fè sa ki byen. Mé yé désidé dézobéyi Jéova. Lò yé fè sa, yé péché é yé réfizé gouvèrnman Bondjé-a. Sa désizyon-an mennen bokou soufrans pou yé (Genèse 3:16-19).

3. Ki konsékans désizyon Adan ké Èv gen asou nou ?

Lò Adan ké Èv péché, yé divini enparfè é akoz di sa yé bay enpèrfèksyon-an pou tout yé pitit. Labib-a ka di asou Adan : « A konsa, akoz di rounsèl wonm, péché-a antré annan monn-an é akoz di péché-a lanmò-a antré osi, é a konsa lanmò-a détenn asou tout moun paské yé tout té péché » (Romains 5:12).

Atò, poukisa nou ka soufri ? Détan nou ka soufri akoz di mové désizyon nou ka pran. Épi détan nou ka soufri akoz di mové désizyon ròt-ya ka pran, ouben nou ka soufri paské nou alé roun koté épi o menm moman roun mové bagaj rivé (li Ecclésiaste 9:11).

ANNOU FOUYÉ ANNAN LABIB-A

Annou wè poukisa Bondjé pa rèsponsab di méchansté-ya ké soufrans-ya nou ka wè asou latè-a jòdla. Annou wè osi kisa i ka rousanti lò i ka wè nou soufri.

4. Sa-la ki koupab di nou soufrans

Bokou moun ka krè ki a Bondjé ka dirijé latè-a. Mé ès sa vré ? Gadé VIDÉYO-a.

VIDÉYO : Kimoun ka dominé monn-an ? (1:24)

Li Jacques 1:13 ké 1 Jean 5:19, épi kozé asou sa késyon-an :

Ès a Bondjé ki rèsponsab di méchansté ké soufrans-ya ?

5. Konsékans-ya di dominasyon Satan

Gadé VIDÉYO-a.

VIDÉYO : Poukisa Bondjé ka pèrmèt soufrans-ya ? (roun parti) (3:07)

Li Genèse 3:1-6, épi kozé asou sa késyon-yan :

Ki manti Satan rakonté ? (gadé vèrsé 4 ké 5).
Kisa Satan fè pou nou krè ki Jéova té lé anpéché moun-yan profité di roun bon bagaj ?
Dapré Satan, ès imen-yan bézwen gouvèrnman Jéova pou gen tchò kontan ?

Li Ecclésiaste 8:9, épi kozé asou sa késyon-an :

Nou ja wè ki a pa Jéova ka dominé monn-an. Akoz di sa, kisa ka pasé ?

Montaj : Plizyèr lévènman ka montré koumansman kréyasyon-an jik paradi-a i ké gen titalò. A. Roun paradi asou latè-a ké roun bèl lanatir. B. Pannan bokou lannen, imen-yan ranpli latè-a ké fo rélijyon, ké dézòrd, ké lagèr é yé sali latè-a. Annan gouvèrnman pwisan-yan ki asou zimaj-a, i gen Éjip, Chin, Grès, Ròm, Anglétèr ké Étazini. C. Roun zimaj di paradi-a i ké gen asou latè-a.

Adan ké Èv té parfè é yé té ka viv annan paradi-a. Mé yé kouté sa Satan di yé é yé tounen yé do bay Jéova.
Péché, soufrans ké lanmò ka èkzisté toupatou.
Jéova ké fè disparèt péché-a, soufrans-ya ké lanmò-a. Imen-yan ké roudivini parfè é yé ké viv annan paradi-a.

6. Jéova gen lapenn lò nou ka soufri

Ès Bondjé pa mélé lò i ka wè nou soufri ? Annou gadé kisa rwa David ké apot Pyèr ékri. Li Psaume 31:7 ké 1 Pierre 5:7, épi kozé asou sa késyon-an :

Sa vèrsé-ya ka montré ki Jéova ka wè lò nou ka soufri é i lé idé nou. Kisa ou ka rousanti lò ou ka li sa ?

7. Bondjé ké fè disparèt tout soufrans-ya

Li Isaïe 65:17 ké Révélation 21:3, 4, épi kozé asou sa késyon-an :

Jéova ké fini ké tousa ki ka fè nou soufri. Poukisa a roun bon bagaj ?

Ès ou savé sa ?

Lò Satan manti, i sali non Jéova. I fè sa pou nou konprann di ki Jéova pa ka dirijé ké jistis é lanmou. Titalò Jéova ké fè soufrans-ya disparèt, é i ké montré ki i pa gen pi bon gouvèrnman pasé sopa gouvèrnman. Lò i ké fè sa i ké lavé so non di tout manti Satan di asou li. Pa gen pyès bagaj ki pi enpòrtan pasé défann répitasyon Jéova (Matthieu 6:9, 10).

I GEN MOUN KA DI : « Bondjé ka fè nou soufri pou wè si nou gen lafwa. »