LÉSON 45
Kouman nou pouvé montré ki a gouvèrnman Bondjé-a rounso nou ka soutni ?
Jézi di ki so disip-ya pa ka fè « parti di monn-an » (Jean 15:19). Sa lé di ki a gouvèrnman Bondjé-a rounso yé ka soutni é ki yé pa ka mélé yé kò annan zafè monn-an, kou lapolitik ké lagèr. A vré, pa mélé nou kò annan zafè monn-an pa toujou fasil. Akoz di sa, i gen moun ki ka kritiké nou ouben ki ka ari di nou tèt. Kouman nou pouvé kontinyé soutni gouvèrnman Bondjé-a li rounso épi rété fidèl douvan Jéova ?
1. Kouman vré krétyen-yan ka wè gouvèrnman imen-yan ?
Témwen Jéova-ya ka rèspèkté gouvèrnman imen-yan. Kou Jézi doumandé l’, roun krétyen divèt « bay Sézar sa ki di Sézar », sa lé di obéyi lalwa péyi-a, kou parèkzanp zafè péyé enpo-a (Marc 12:17). Labib-a ka èspliké ki gouvèrnman imen-yan ka dirijé sèlman paské Jéova ka pèrmèt yé fè l’ (Romains 13:1). Atò, otorité gouvèrnman-yan gen limit. Nou ka konté asou Bondjé é asou so Rwayonm ki annan syèl-a pou ranjé problèm ki annan monn-an.
2. Kouman roun krétyen ka montré ki a gouvèrnman Bondjé-a rounso i ka soutni ?
Témwen Jéova-ya pa ka mélé yé kò annan zafè lapolitik. A èkzanp Jézi yé ka swiv. Roun jou, lò moun-yan té wè roun annan so mirak, yé té lé fè l’ divini rwa, mé i réfizé (Jean 6:15). Poukisa ? Paské, kou i di l’ apré sa : « Mo rwayonm pa annan sa monn-an » (Jean 18:36). Jòdla, roun disip Jézi ka montré di plizyèr fason ki a gouvèrnman Bondjé-a rounso i ka soutni. Parèkzanp : I pa ka partisipé annan lagèr (li Michée 4:3). I ka rèspèkté drapo-a ké tout ròt bagaj ki ka réprézanté péyi-a, mé i pa ka adoré yé (1 Jean 5:21). I pa ka pran parti pou di i dakò ouben i kont roun kandida ouben roun group politik. Konsa, i ka montré i fidèl douvan rounsèl gouvèrnman : rwayonm Bondjé-a.
ANNOU FOUYÉ ANNAN LABIB-A
Annou wè déztrwa sitiasyon koté sa pouvé rèd pou nou pa mélé nou kò annan zafè monn-an. Annou wè osi kouman nou pouvé pran désizyon ki ké fè Bondjé plézi.
3. Vré krétyen-yan pa ka mélé yé kò annan zafè monn-an
Jézi ké so prémyé disip-ya bay nou roun èkzanp pou nou swiv. Li Romains 13:1, 5-7 ké 1 Pierre 2:13, 14. Apré sa, gadé VIDÉYO-a, épi kozé asou sa késyon-yan :
Poukisa nou divèt rèspèkté gouvèrnman imen-yan ?
Ki fason nou pouvé montré ki nou ka obéyi gouvèrnman-yan ?
Lò i gen lagèr, i gen péyi ki ka di ki yé pa ka pran parti pou roun bò ouben pou ròt-a, mé lavérité a ki yé ka soutni yé toulédé. Kisa vré krétyen-yan ka fè annan sa sitiasyon-an ? Li Jean 17:16. Apré sa, gadé VIDÉYO-a, épi kozé asou sa késyon-an :
Kouman nou pouvé montré ki nou pa ka pran parti pou sa monn-an ?
É si gouvèrnman-yan ka blijé nou fè roun bagaj ki kont lalwa Bondjé ? Li Actes 5:28, 29. Apré sa, gadé VIDÉYO-a, épi kozé asou sa késyon-yan :
Si roun lalwa gouvèrnman-an kont roun lalwa Bondjé, kilès nou divèt obéyi ?
Annan ki sitiasyon roun krétyen pa ké pouvé obéyi gouvèrnman-yan ?
4. Annou soutni rwayonm Bondjé-a annan sa nou ka pansé ké sa nou ka fè
Li 1 Jean 5:21. Apré sa, gadé VIDÉYO-a, épi kozé asou sa késyon-yan :
Poukisa Ayenge réfizé antré annan roun group politik épi réfizé alé adoré drapo-a ?
Ès ou ka pansé i pran roun bon désizyon ?
Annan ki ròt sitiasyon sa pouvé rèd pou nou pa mélé annan zafè monn-an ? Gadé VIDÉYO-a, épi kozé asou sa késyon-yan :
Lò nou ka gadé èspòr koté moun-yan ki ka jwé roun kont ròt ka vini di diféran péyi, kouman nou ka montré ki nou pa ka pran parti pou roun péyi ?
Lò gouvèrnman-an ka pran désizyon, ki i bon ki i pa bon pou nou, kouman nou ka montré ki nou pa ka pran parti pou sa monn-an ?
Si nou abitchwé kouté journal latélé, laradyo, ouben moun ki kontan palé asou lapolitik, kouman sa pouvé détenn asou nou ?
Annan ki sitiasyon roun krétyen ka montré ki i pa ka pran parti pou sa monn-an ?
SI ROUN MOUN DOUMANDÉ OU : « Poukisa to pa ka chanté nou chanté pou péyi-a ? » ouben « Poukisa to pa ka fè sérémoni pou drapo-a ? »
Kisa ou ké réponn ?
SA NOU WÈ
Roun krétyen ka fè tousa i pouvé pou pa mélé so kò annan lapolitik, ki annan sa i ka fè, sa i ka di, ké sa i ka pansé.
Kisa ou anprann
Kisa nou divèt bay pou gouvèrnman imen-yan ?
Poukisa roun krétyen pa ka mélé so kò annan lapolitik ?
Détan, annan ki sitiasyon sa rèd pou nou pa pran parti pou sa monn-an ?
SA OU POUVÉ TRAPÉ OSI
Ki sakrifis nou ké pitèt divèt fè pou pa mélé nou kò annan lapolitik ?
Kouman roun fanmi pouvé préparé so kò pou pa mélé annan zafè monn-an ?
Gadé istwè roun mouché ki té ka pansé ki défann so péyi a té pi gran lònò roun moun té pouvé gen.
Kouman nou pouvé ‘pa fè parti di monn-an’ annan nou travay ?
« Chacun portera sa propre charge » (La Tour de Garde, 15 mars 2006)