LÉSON 18
Kouman nou pouvé savé kimoun ki sa vré krétyen-yan ?
Milyar moun ka di ki yé krétyen. Mé yé tout pa ka krè menm bagaj-ya é pa ka swiv menm ansèyman-yan. Atò, kouman nou pouvé savé kimoun ki sa vré krétyen-yan ?
1. A kisa roun krétyen ?
Roun krétyen a roun disip, sa lé di roun moun ki ka swiv Jézi Kris (li Actes 11:26). Kouman yé ka montré ki yé ka swiv Jézi ? Jézi di : « Si zòt ka kontinyé swiv mo paròl-ya, zòt sa vréman mo disip-ya » (Jean 8:31). Sa lé di ki vré krétyen-yan divèt obéyi sa Jézi ansényé. Tousa Jézi té ka fè é té ka ansényé té ka vini di Paròl Bondjé-a. Menm fason-an, tousa vré krétyen-yan ka di é ka fè divèt vini di Labib-a (li Luc 24:27).
2. Kouman vré krétyen-yan ka montré yé lanmou ?
Kouman vré krétyen-yan ka montré yé gen lanmou ? Jézi di so disip-ya : « A pou zòt kontan zòt konpanyen, menm fason mo té kontan zòt » (Jean 15:12). Kouman Jézi montré i té kontan so disip-ya ? I idé ké ankourajé disip-ya, é sa té enpòrtan pou li pasé tan ké yé. I menm bay so lavi pou yé (1 Jean 3:16). Menm fason-an, vré krétyen-yan pa ka palé di lanmou rounso, yé ka fè plis ki sa. Yé ka montré annan sa yé ka di ké sa yé ka fè ki yé vréman gen lanmou roun pou ròt.
3. Ki travay vré krétyen-yan ka fè ?
Jézi bay so disip-ya roun travay enpòrtan pou fè. « I voyé yé préché rwayonm Bondjé-a » (Luc 9:2). Mé krétyen-yan pa té ka préché koté moun-yan ki té ka adoré Bondjé rounso. Yé té ka préché tout koté i té gen moun é annan kaz moun-yan osi (li Actes 5:42 ké 17:17). Jòdla osi, vré krétyen-yan ka préché vérité-ya ki annan Labib-a tout koté i gen moun. Yé kontan moun-yan, a pou sa yé kontan itilizé yé tan ké yé fòrs pou ansényé mésaj Labib-a ki ka bay èspérans ké konsolasyon (Marc 12:31).
ANNOU FOUYÉ ANNAN LABIB-A
Gadé ki diférans i gen ant vré krétyen-yan ké sa-ya ki pa ka swiv ansèyman ké èkzanp Jézi.
4. Yé ka chaché lavérité ki annan Labib-a
Prémyé krétyen-yan té ka obéyi Paròl Bondjé-a.
A pa tout sa-ya ki ka di yé krétyen ki ka trouvé sa enpòrtan konnèt lavérité ki annan Labib-a. Gadé VIDÉYO-a, épi kozé asou sa késyon-an.
Kisa Légliz-ya ki ka di yé krétyen fè pou anpéché moun-yan anprann sa Jézi ansényé ?
Jézi ansényé lavérité ki annan Paròl Bondjé-a. Li Jean 18:37, épi kozé asou sa késyon-an :
Dapré Jézi, kouman nou pouvé rékonnèt krétyen-yan ki « pou lavérité » ?
5. Yé ka préché vérité-ya ki annan Labib-a
Prémyé krétyen-yan té ka préché bon nouvèl-a.
Anvan Jézi viré annan syèl-a, i bay so disip-ya roun travay ki ka kontinyé jik jòdla. Li Matthieu 28:19, 20 ké Actes 1:8, épi kozé asou sa késyon-an :
Ès yé té ké préché bon nouvèl-a annan rounsèl koté ? Pannan konmyen tan yé té ké préché ?
6. Yé ka fè sa yé ka préché
Poukisa roun mouché yé ka aplé Tom té sir i té trouvé vré krétyen-yan ? Gadé VIDÉYO-a, épi kozé asou sa késyon-yan.
Annan vidéyo-a, poukisa Tom désidé anbandonnen rélijyon-an ?
Poukisa Tom sir i trapé lavérité ?
Sa nou ka fè gen plis valò pasé sa nou ka di. Li Matthieu 7:21, épi kozé asou sa késyon-an :
Dapré Jézi kisa ki pi enpòrtan : di ki nou sa roun krétyen ouben montré l’ annan sa nou ka fè ?
7. Yé gen lanmou roun pou ròt
Prémyé krétyen-yan té gen lanmou roun pou ròt.
Ès krétyen-yan ja riské yé lavi pou yé frè ké sò ? Gadé VIDÉYO-a, épi kozé asou sa késyon-yan.
Poukisa Lloyd té paré mouri pou sové so frè Johansson ?
Ès ou ka pansé ki Lloyd aji kou roun vré krétyen ?
Li Jean 13:34, 35, épi kozé asou sa késyon-yan :
Kouman disip Jézi-ya (vré krétyen-yan) ka trété ròt-ya ? Ès yé ka fè diférans asou ras ouben péyi roun moun ?
Ès yé ka montré yé lanmou menm pannan roun lagèr ?
I GEN MOUN KA DI : « Kèlkanswa rélijyon-an, sa ki enpòrtan a krè annan Jézi. »
Ki vèrsé ou té ké itilizé pou montré ki roun vré krétyen ka fè plis pasé krè annan Jézi ?
SA NOU WÈ
Vré krétyen-yan ka obéyi sa Labib-a ka di, yé ka montré yé gen lanmou roun pou ròt é yé ka préché bon nouvèl-a ki annan Labib-a.
Kisa ou anprann
Sa krétyen-yan ka krè ka soti di ki koté ?
Ki bèl kalité ka idé nou rékonnèt vré krétyen-yan ?
Ki travay vré krétyen-yan ka fè ?
SA OU POUVÉ TRAPÉ OSI
Anprann plis bagaj asou moun-yan ki ka fè éfòr pou swiv ansèyman ké èkzanp Jézi Kris.
Gadé istwè roun madanm ki té sa roun masò é ki trapé « roun vré fanmi èspirityèl ».
Gadé kouman vré krétyen-yan ka montré yé gen lanmou pou yé frè ké sò lò yé gen problèm.
Nou ka idé nou frè ké sò-ya lò i gen katastròf (roun parti) (3:57)
Gadé kouman vré krétyen-yan jòdla ka obéyi ansèyman Jézi kou prémyé krétyen-yan té ka fè.
« À quoi se reconnaît le christianisme authentique ? » (La Tour de Garde, 1é mars 2012)