3. Ki travay vré krétyen-yan ka fè ?

Jézi bay so disip-ya roun travay enpòrtan pou fè. « I voyé yé préché rwayonm Bondjé-a » (Luc 9:2). Mé krétyen-yan pa té ka préché koté moun-yan ki té ka adoré Bondjé rounso. Yé té ka préché tout koté i té gen moun é annan kaz moun-yan osi (li Actes 5:42 ké 17:17). Jòdla osi, vré krétyen-yan ka préché vérité-ya ki annan Labib-a tout koté i gen moun. Yé kontan moun-yan, a pou sa yé kontan itilizé yé tan ké yé fòrs pou ansényé mésaj Labib-a ki ka bay èspérans ké konsolasyon (Marc 12:31).

Titalò, Jéova ké itilizé so Rwayonm pou fini ké tout nou problèm. Sa nouvèl-a tèlman bon ki tout moun bézwen konnèt li ! Jézi doumandé so disip-ya palé di sa nouvèl-a pou tout moun (Matthieu 28:19, 20). Kouman Témwen Jéova-ya ka obéyi sa Jézi doumandé fè ?

1. Kouman Matthieu 24:14 ka réyalizé jòdla ?

Jézi té di : « Sa bon nouvèl di Rwayonm-an ké préché asou tout latè-a » (Matthieu 24:14). Témwen Jéova-ya ka pran tan partisipé annan sa travay enpòrtan-an. Nou ka préché bon nouvèl-a asou tout latè-a annan plis pasé 1000 lang ! Sa gro travay-a ka doumandé bokou éfòr é nou bézwen byen òrganizé nou kò. Nou pa té ké pouvé fè sa travay-a si a pa té Jéova ki té ka idé nou.

2. Ki éfòr nou ka fè pou préché pou moun-yan ?

Nou ka préché tout koté nou ka trouvé moun. Kou prémyé krétyen-yan, nou ka préché « di kaz an kaz » (Actes 5:42). A konsa nou ka rivé palé ké milyon moun chak lannen. Kou moun-yan pa toujou annan yé kaz, nou k’alé préché osi tout koté moun-yan fika. Nou toujou ka chaché tout okazyon pou palé ké moun-yan di Jéova ké sa i ké fè.

3. Kimoun ki divèt préché bon nouvèl-a ?

Tout vré krétyen-yan divèt préché bon nouvèl-a. Nou pa ka jwé ké sa rèsponsabilité-a, nou ka fè l’ ké séryé. Chak moun ka fè tousa i pouvé annan sa travay-a pas nou savé ki sa pouvé sové lavi moun-yan (li 1 Timothée 4:16). Yé pa ka bay nou soumaké pou fè sa travay-a, paské Labib-a ka di : « Zòt rousouvwè san zòt pa péyé anyen, bay san zòt pa doumandé anyen » (Matthieu 10:7, 8). Bokou moun pa ka kouté nou, mé nou ka kontinyé préché paské nou lé obéyi Jéova é fè so tchò kontan.

ANNOU FOUYÉ ANNAN LABIB-A

4. Nou ka fè tousa nou pouvé pou préché pou tout moun

VIDÉYO : Yé ka préché annan « koté ki pi lwen asou latè-a » (7:33)

• Kisa ou ka pansé di tousa Témwen Jéova-ya ka fè pou préché ?

Li Matthieu 22:39 ké Romains 10:13-15, épi kozé asou sa késyon-yan :

• Kouman prédikasyon-an ka montré ki nou kontan moun-yan ?

• Kisa Jéova ka rousanti pou sa-ya ki ka préché bon nouvèl-a ? (gadé vèrsé 15-a).

5. Nou ka travay ansanm ké Bondjé

Bokou istwè ka montré ki a Jéova ki ka dirijé sa travay-a. Gadé sa ki rivé roun frè yé ka aplé Paul é ki ka rété Nouvèl-Zélann. Roun aprémidi, i té ka préché di kaz an kaz é i kontré ké roun madanm. Sa madanm-an té priyè Bondjé bon maten-an é i itilizé so non, Jéova. I té doumandé Jéova fè roun moun vini wè li. Paul ka di : « Trwa lèr apré sa, mo té ka konnyen asou so lapòt. »

Li 1 Corinthiens 3:9, épi kozé asou sa késyon-an :

• Poukisa nou pouvé di ki istwè kou sa-la di frè-a ka montré ki a Jéova ki ka dirijé nou travay prédikasyon ?

Li Actes 1:8, épi kozé asou sa késyon-an :

• Poukisa nou bézwen Jéova idé nou préché ?

Ès ou savé sa ?

Chak simenn, annan réinyon nou gen annan simenn-an, nou ka rousouvwè roun fòrmasyon pou préché. Ès ou ja alé annan roun di sa réinyon-yan ? Kisa ou ka pansé di sa fòrmasyon-an ?

6. Nou ka obéyi koumannman Bondjé bay nou-a

Annan lépòk apot-ya, i gen moun ki éséyé fè disip Jézi-ya arété préché. Krétyen-yan défann yé drwa préché lò yé « défann bon nouvèl-a é fè l’ rékonnèt douvan lajistis » (Philippiens 1:7). Témwen Jéova-ya ka fè menm bagaj-a jòdlaa (gadé nòt-a).

VIDÉYO : Yé ka défann bon nouvèl-a douvan lajistis (2:28)

Li Actes 5:27-42, épi kozé asou sa késyon-an :

• Poukisa nou pa ké janmen arété préché ? (gadé vèrsé 29, 38 ké 39).

SA NOU WÈ

Jézi doumandé so disip-ya préché bon nouvèl-a asou tout latè-a. Jéova ka idé so sèrvitèr-ya fè sa travay-a.

Kisa ou anprann

• Kimoun ka préché bon nouvèl-a asou tout latè-a é kouman yé ka fè sa ?

• Kouman prédikasyon-an ka montré ki nou kontan moun-yan ?

• Ès ou ka pansé ki prédikasyon-an pouvé fè nou gen tchò kontan ? Poukisa ou ka pansé sa ?

SA OU POUVÉ TRAPÉ OSI

Kouman Témwen Jéova-ya ka préché annan gran vil-ya ?

Pari : Témwanyaj èspésyal annan gran vil-ya (5:11)

Ki éfòr Témwen Jéova-ya ka fè pou préché pou étranjé-ya ?

Yé ka pran swen di bézwen èspirityèl étranjé-ya (5:59)

Roun sò pasé tout so lavi ka préché bon nouvèl-a. Gadé poukisa sa travay-a bay li tchò kontan.

Travay-a mo chwazi ka bay mo tchò kontan (6:29)

Gadé kouman déztrwa désizyon lajistis idé nou annan travay prédikasyon-an.

« Les prédicateurs se défendent devant les tribunaux » (Le Royaume de Dieu en action !, chapit 13)