« Kontinyé byen réfléchi, véyé ! »

1. Kisa Jézi di so disip asou kitan lafen-an té ké rivé, é kisa i di yé fè ?

DÉZTRWA jou anvan Jézi mouri, kat annan so disip-ya doumandé li : « Ki sign ké montré […] dèrnyé moman sa monn-an ? » (Mat. 24:3). Sa disip-ya té dèt ka chaché savé kitan Jérizalèm té ké krazé. Annan so répons, Jézi palé di dèstriksyon Jérizalèm, mé i palé osi di « dèrnyé moman sa monn-an », é a sa lépòk-a nou ka viv jòdla. Lò Jézi palé di kitan lafen-an té ké rivé, i di : « Sa jou-a ké sa lèr-a, pyès moun pa konnèt yé, ni zanj-ya annan syèl-a ni Pitit-a, mé Papa-a rounso. » Apré sa, i byen fè tout so disip-ya konprann ki yé té divèt ‘lésé yé wéy byen louvri’ épi « panga » (Marc 13:32-37).

2. Poukisa sa té enpòrtan pou krétyen 1^é syèk-a véyé ?

² Annan 1^é syèk-a, krétyen-yan ki té Jwif té divèt fè tousa yé té pouvé pou véyé ; si yé pa té ka fè sa, yé té ka riské mouri. Jézi di so disip ki bagaj yé té divèt chaché wè pou yé té pouvé savé kitan Jérizalèm té ké krazé. I di : « Lò zòt ké wè larmé-ya baré Jérizalèm, a pou zòt savé ki i pa ka rété bokou tan ankò pou yé krazé l’. » Lò yé té ké wè sa, krétyen-yan té ké divèt fè sa Jézi té di yé fè : « Kouri alé séré pa bò d’ montangn-yan » (Luc 21:20, 21). Lò Romen-yan krazé Jérizalèm, krétyen-yan ki té byen kouté avèrtisman Jézi té bay-a sové yé lapo.

3. Kisa nou ké wè annan sa artik-a ?

³ Jòdla, nou ka viv dèrnyé moman sa monn mové-a. Donk, nou menm osi nou divèt kontinyé byen réfléchi épi véyé. Annan sa artik-a, nou ké wè kouman nou pouvé rété rézonab lò nou ka gadé sa ki ka pasé annan monn-an é nou ké wè kouman nou pouvé panga sa nou ka fè. Nou ké wè osi pi bon fason nou pouvé sèrvi tan-an ki ka rété.

A POU TO SWIV SA KI KA PASÉ ANNAN MONN-AN, MÉ AN MENM TAN A POU TO RÉZONAB

4. Poukisa nou divèt panga fason sa ki ka pasé annan monn-an ka réyalizé profési ki annan Labib-a ?

⁴ Nou ka swiv sa ki ka pasé annan monn-an pou nou wè kouman sa ka réyalizé profési ki annan Labib-a. A roun bon bagaj nou ka fè. Parèkzanp, pou idé nou savé kitan monn Satan-an té ké antré annan so dèrnyé moman, Jézi bay roun séri bagaj ki té ké fèt (Mat. 24:3-14). Pou nou pouvé kontinyé gen roun lafwa ki fò, apot Pyèr, li menm, ankourajé nou véyé kouman profési-ya ka fèt (2 Pierre 1:19-21). É dèrnyé liv Labib-a ka koumansé konsa : « Révélasyon Bondjé bay Jézi Kris, pou i montré so èsklav-ya sa ki pou rivé titalò » (Rév. 1:1). Donk, nou ka pran tan byen gadé sa ki ka pasé asou latè-a jòdla é nou anvi savé si sa ki ka pasé ka réyalizé profési ki annan Labib-a. Épi souvan, nou anvi palé di sa kalité lévènman-yan ké nou frè ké nou sò-ya.

5. Kisa nou pa divèt fè é kisa nou divèt fè ? (gadé zimaj-ya osi).

⁵ Lò nou ka palé ké nou konpanyen di profési ki annan Labib-a, annou panga chaché déviné sa ki ké rivé. Poukisa ? Paské nou pa lé di pyès bagaj ki pouvé anpéché asanblé-a rété byen ansanm. Parèkzanp, pitèt nou ké tandé chèf politik sa monn-an palé di fason yé pouvé réglé roun lagèr épi mété lapè ké sékirité. Mé pasé nou koumansé di ki sa ka réyalizé profési-a ki annan 1 Thessaloniciens 5:3, annou pito byen swiv dèrnyé ansèyman òrganizasyon Jéova-a ka bay. Si nou ka apiyé sa nou ka di asou sa ansèyman-yan, nou ké idé asanblé-a rété byen ansanm « annan menm lidé-a » (1 Cor. 1:10 ; 4:6).

6. Kisa 2 Pierre 3:11-13 ka anprann nou ?

⁶ (Li 2 Pierre 3:11-13.) Apot Pyèr ka idé nou rété rézonab lò nou ka étidyé profési-ya ki annan Labib-a. I ka ankourajé nou ‘toujou gardé annan nou lèspri prézans jou Jéova-a’. Pou fè kisa ? A pa pou chaché déviné jou-a ké lèr-a Jéova ké fè Armagédon koumansé, mé pito pou sèrvi tan-an ki ka rété pou nou gen ‘roun konpòrtman ki sen épi fè bagaj ki ka montré ki nou lé kontinyé adoré Bondjé’ (Mat. 24:36 ; Luc 12:40). Pou byen di, nou lé kontinyé maché drèt épi panga pou tousa nou ka fè pou Jéova, a lanmou ki ka pousé nou fè l’. Si nou pa lé bliyé sa òbjèktif-a, nou divèt véyé nou kò.

KISA SA LÉ DI VÉYÉ NOU KÒ ?

7. Kisa ki ké montré ki nou ka véyé nou kò ? (Luc 21:34).

⁷ Jézi di so disip-ya véyé sa ki ka pasé annan monn-an, mé i di yé osi véyé yé kò. A sa nou ka wè annan avèrtisman i bay annan Luc 21:34 (li). Gadé sa Jézi ka di : « Véyé zòt kò. » Roun vré krétyen ka véyé so kò lò i ka panga tousa ki pouvé fè li pédi so lanmityé ké Jéova é lò i ka fè sa ki fo pou sa pa rivé l’. A konsa i ka « rété annan lanmou Bondjé » (Prov. 22:3 ; Jude 20, 21).

8. Ki avèrtisman apot Pòl bay krétyen-yan ?

⁸ Apot Pòl osi di krétyen-yan véyé yé kò. Parèkzanp, i di krétyen-yan ki té Éfèz : « Panga zòt fè kou moun ki pa gen sajès, a pou zòt aji pito kou moun ki gen sajès » (Éph. 5:15, 16). Kou Satan pa ka las éséyé fè nou pédi nou lanmityé ké Jéova, Labib-a ka di nou « kontinyé chaché konprann kisa Jéova lé » pou nou protéjé nou kò di tout kalité danjé (Éph. 5:17).

9. Kouman nou pouvé konprann kisa Jéova lé pou nou ?

⁹ Labib-a pa ka bay nou roun lis di tout danjé ki pouvé fè nou pédi nou lanmityé ké Jéova. Souvan, nou gen pou pran désizyon asou bagaj ki pa marké annan Labib-a. Donk, pou nou pouvé pran bon désizyon ké sajès, nou divèt konprann « sa Jéova lé ». Nou ka rivé fè sa lò nou ka étidyé épi pran tan byen réfléchi asou so Paròl souvan. Pi nou ka byen konprann volonté Jéova-a é pi nou ka chaché gen « mantalité Kris-a », pi nou gen plis chans aji « kou moun ki gen sajès », menm si i pa gen pyès règ pou di nou sa pou fè (1 Cor. 2:14-16). Roun ran danjé fasil pou wè ; mé rounòt ran anba anba.

10. Bay plizyèr danjé ki divèt fè nou pran kouri.

¹⁰ Men plizyèr danjé ki divèt fè nou pran kouri : fala fanm ouben mouché, bwè ké manjé tròp, palé pou moun pou fè yé lapenn, épi osi gadé anmizman ki vyolan, pòrnografi ké ròt bagaj konsa (Ps. 101:3). Djab-a ki sa nou lèlmi pa ka arété chaché fè nou pédi nou lanmityé ké Jéova (1 Pierre 5:8). Si nou pa panga, i pouvé sonmen annan nou lèspri ké annan nou tchò grenn ki ké fè nou anvyé moun, divini malonnèt, anvi toujou gen plis, rayi moun, krè nou kò épi tchenbé moun asou nou tchò (Gal. 5:19-21). Pitèt o koumansman, sa défo-ya pa ké fò anlè nou. Mé si nou pa ka fè éfòr pou tiré tousa annan nou tchò, sa ké kontinyé pousé, épi, kou roun mové radyé, sa ké fè bon déga (Jacq. 1:14, 15).

11. Douvan ki danjé ki anba anba nou divèt pran kouri, é poukisa ?

¹¹ Rounòt danjé ki anba anba, a mové frékantasyon. Imajiné sa sitiasyon-an : To blijé travay ké roun moun ki pa Témwen Jéova. Kou to lé sa kolèg-a byen wè Témwen Jéova-ya, to janti ké li é to ka randé li sèrvis. Tanzantan to ka asèpté manjé ké li. Épi lò to lé konprann, a pa tanzantan ankò, a souvan. Détan, kozé-a jis ka vini asou bagaj malpròp. O koumansman, to ka éséyé fè kousidiré to pa tandé mé piti piti tèlman to abitchwé ké sa, sa pa ka fè to anyen ankò. Épi roun jou, to kolèg ka envité to alé bwè apré travay-a, é to ka di wi. Piti piti, to ka koumansé réfléchi kou li. Dapré to, konmyen tan sa ké pran anvan to koumansé aji kou li ? Sa vré, nou janti ké tout moun é nou ka rèspèkté tout moun. Mé pa bliyé ki moun nou ka chwazi maché ké yé-a ka détenn asou nou (1 Cor. 15:33). Si nou ka fè kou Jézi di nou, sa lé di si nou ka véyé nou kò, lò nou pa blijé fè l’, nou ké panga maché ké moun ki pa ka swiv lalwa Jéova (2 Cor. 6:15). Nou ké wè danjé-a é nou ké rété lwen.

SÈRVI TO TAN PI BON FASON-AN

12. Kisa disip Jézi-ya té divèt fè toupannan yé té ka antann dèrnyé moman monn yé lépòk ?

¹² Toupannan yé té ka antann lafen-an rivé, disip Jézi-ya pa té divèt rété la san yé pa fè anyen. Jézi té bay yé roun travay pou fè : yé té divèt préché bon nouvèl-a « annan Jérizalèm, annan tout Jidé ké Samari, é jik annan koté ki pi lwen asou latè-a » (Actes 1:6-8). A pa té roun ti travay ! Disip-ya sèrvi tan-an miyò fason yé té pouvé fè l’. Yé mété tout yé fòrs annan sa travay-a.

13. Poukisa nou divèt sèrvi nou tan pi bon fason i pouvé gen ? (Colossiens 4:5).

¹³ (Li Colossiens 4:5.) Véyé nou kò, sa lé di osi réfléchi asou fason nou ka sèrvi nou tan. Annou sonjé ki « bagaj yé pa prévwè » ka rivé tout moun (Eccl. 9:11). Nou pouvé pédi nou lavi rounsèl kou konsa.

14-15. Ki miyò fason nou pouvé sèrvi nou tan ? (Hébreux 6:11, 12) (gadé zimaj-a osi).

¹⁴ Sèrvi nou tan miyò fason i pouvé gen, sa lé di pran sa tan-an pou fè volonté Jéova épi fè nou lanmityé ké li vin pi fò (Jean 14:21). A pou nou « fò, byen dibout » é a pou nou « toujou gen bokou bagaj pou fè annan travay Sényèr-a » (1 Cor. 15:58). Konsa, lò lafen-an ké rivé, ki a lafen nou lavi ouben lafen sa monn mové-a, nou pa ké rigrété anyen (Mat. 24:13 ; Rom. 14:8).

¹⁵ Jòdla osi, Jézi ka gidé so disip ki ka préché rwayonm Bondjé-a asou tout latè-a. Kou i té di l’, i ka fè sopa : i ka sèrvi òrganizasyon Jéova-a pou anprann nou préché é i ka bay nou zouti nou bézwen (Mat. 28:18-20). Kanta nou menm, nou ka fè noupa : nou ka bay annan prédikasyon-an ké annan ansèyman-an, é nou ka véyé toupannan nou ka antann Jéova fini ké sa monn-an. Si nou ka swiv konsèy ki marké annan Hébreux 6:11, 12, nou ké tchenbé nou èspérans byen fò « jistan lafen-an rivé » (li).

16. Kisa nou byen désidé fè ?

¹⁶ Jéova chwazi roun jou ké roun lèr pou i fini ké monn Satan-an. Apré sa, i ké fè bèl profési ki annan so Paròl fèt. Anvan sa jou-a rivé, pitèt nou ké krè ki lafen sa monn-an ka pran tan pou rivé. Pourtan, jou Jéova-a « pa ké an rétar ! » (Hab. 2:3). Atò, a pou nou byen désidé « djété Jéova » épi ‘ké pasyans antann Bondjé ki ka sové nou-a’ (Mich. 7:7).