LÉSON 36
A pou nou toujou onèt
Tout moun lé gen zanmi ki onèt. A sa Jéova lé osi. Mé annan sa monn-an koté bokou moun ka fè bagaj malonnèt sa pa fasil rété onèt. Magré sa, poukisa sa enpòrtan rété onèt ?
1. Poukisa sa enpòrtan rété onèt ?
Lò nou onèt, nou ka montré ki nou kontan Jéova é ki nou ka rèspèkté l’. Pa bliyé ki Jéova savé sa nou ka pansé ké sa nou ka fè (Hébreux 4:13). Lò nou ka chwazi rété onèt, i ka wè l’ é sa ka bay li tchò kontan. So Paròl ka di : « Jéova rayi moun-an ki ka fè bagaj anba anba, mé i ka divini bon zanmi ké moun-yan ki ka maché drèt » (Proverbes 3:32).
2. Kouman nou pouvé rété onèt annan nou lavi ?
Jéova lé nou ‘di nou konpanyen lavérité’ (Zacharie 8:16, 17). Kisa sa lé di ? Sa lé di ki nou pa ké manti lò nou ké palé pou nou fanmi, pou nou kolèg travay, pou nou frè ké sò annan asanblé-a ouben pou otorité-ya. Roun moun ki onèt pa ka vòlò é i pa ka chaché profité di ròt-ya. (li Proverbes 24:28 ké Éphésiens 4:28). É i ka péyé sa Léta ka doumandé péyé (Romains 13:5-7). Pou byen di, « nou lé maché drèt annan tout bagaj nou ka fè » (Hébreux 13:18).
3. Kisa nou pouvé ganyen si nou ka rété onèt ?
Lò nou toujou onèt, moun-yan ka fè nou konfyans. A konsa nou ka fè noupa pou ròt-ya santi yé kò alèz annan asanblé-a kou annan roun vré fanmi. Anplis di sa, nou konsyans pa ké bat nou. Si nou ka rété onèt, nou pouvé osi « fè ansèyman nou Bondjé, Sa-la ki ka sové nou, vini pi bèl », é nou pouvé bay moun-yan anvi anprann plis bagaj asou Jéova (Tite 2:10).
ANNOU FOUYÉ ANNAN LABIB-A
Annou wè kouman lò nou onèt sa ka aji asou nou lanmityé ké Jéova é asou nou menm. Annou wè osi kouman ou pouvé rété onèt annan diféran sitiasyon.
4. Sa ka fè Jéova plézi lò nou onèt
Li Psaume 44:21 ké Malachie 3:16, épi kozé asou sa késyon-yan :
Dapré ou, poukisa nou pa divèt krè ki nou pouvé séré roun bagaj pou Jéova ?
Dapré ou, kisa Jéova ka rousanti lò nou ka chwazi di lavérité menm si sa pa fasil ?
Lò roun timoun ka di lavérité, i ka fè so papa ké so manman plézi. Lò nou ka di lavérité, nou ka fè Jéova plézi.
5. A pou nou onèt annan tout bagaj
Bokou moun ka pansé ki sa pa toujou posib rété onèt. Mé gadé poukisa nou divèt onèt annan tout bagaj. Gadé VIDÉYO-a.
Li Hébreux 13:18, épi kozé asou fason nou pouvé rété onèt...
annan nou fanmi,
lò nou annan nou travay ouben lò nou lékòl,
annan ròt sitiasyon.
6. Rété onèt a roun bon bagaj pou nou
A vré ki détan, lò nou onèt, nou pouvé gen problèm. Mé finalman, a pi bon bagaj-a pou fè. Li Psaume 34:12-16, épi kozé asou sa késyon-an :
Kouman ou lavi ké miyò si ou ka rété onèt ?
Mouché ké madanm ki onèt ka fè yé maryaj vin pi fò.
Lò roun moun onèt annan so travay, so chèf ka fè li konfyans.
Lò roun moun onèt, otorité-ya ka rèspèkté l’.
I GEN MOUN KA DI : « A jis roun ti manti, a pa anyen. »
Poukisa ou ka pansé ki Jéova rayi tout kalité manti ?
SA NOU WÈ
Jéova lé ki so zanmi rété onèt annan tousa yé ka di ké sa yé ka fè.
Kisa ou anprann
Kouman nou pouvé rété onèt ?
Poukisa nou pa divèt krè ki nou pouvé séré roun bagaj pou Jéova ?
Poukisa ou lé rété onèt annan tout bagaj ?
SA OU POUVÉ TRAPÉ OSI
Kouman papa ké manman pouvé anprann yé pitit rété onèt ?
Poukisa nou divèt fè sa nou promèt fè ?
Nou ka trapé bénédiksyon lò nou ka tchenbé nou promès (9:09)
Gadé poukisa nou divèt péyé nou enpo menm si yé ka itilizé l’ di roun mové fason.
« Faut-il payer ses impôts ? » (La Tour de Garde, 1é sèptanm 2011)
Kisa ki ankourajé roun wonm ki té malonnèt chanjé fason i té ka viv ?
« J’ai découvert la miséricorde et le pardon de Jéhovah » (La Tour de Garde, 1é mé 2015)