LÉSON 59
Ou pouvé tchenbé anba pèrsékisyon
Asiré pa pitèt, tout krétyen ké trapé opozisyon, é pitèt menm jwenn pèrsékisyon. Ès sa divèt fè ou pè ?
1. Poukisa nou sir yé ké pèrsékité nou ?
Labib-a ka di : « Tout sa ki lé kontinyé adoré Bondjé ké fidélité é kontinyé swiv Jézi Kris, yé ké pèrsékité yé osi » (2 Timothée 3:12). Yé pèrsékité Jézi paské i pa té ka fè parti di monn Satan-an. Nou osi, nou pa ka fè parti di sa monn-an. A pou sa, nou pa ka rété èstébékwé lò gouvèrnman ké rélijyon sa monn-an ka pèrsékité nou (Jean 15:18, 19).
2. Kouman nou pouvé préparé nou kò pou pèrsékisyon-an ?
Dipi aprézan, nou bézwen fè nou konfyans annan Jéova vin pi fò. Chak jou, pran tan priyè ké li Labib-a. Alé annan réinyon-yan souvan. Tousa ké bay ou fòrs ké kouraj pou tchenbé anba nenpòrt ki pèrsékisyon ; menm si a roun moun annan ou fanmi ki ka pèrsékité ou. Yé pèrsékité apot Pòl souvan, a pou sa i di : « Jéova ka sové mo ; mo pa ké pè » (Hébreux 13:6).
Rounòt fason pou nou gen plis kouraj, a lò nou ka préché souvan. Préché ka fè nou konfyans annan Jéova vin pi fò é sa ka idé nou pa pè pyès moun (Proverbes 29:25). Si nou gen kouraj préché dipi aprézan, nou ké paré pou kontinyé préché menm si gouvèrnman-yan ka éséyé anpéché nou fè sa (1 Thessaloniciens 2:2).
3. Poukisa tchenbé anba pèrsékisyon ka idé nou ?
Pyès moun pa kontan lò yé ka pèrsékité l’, mé lò nou ka tchenbé anba pèrsékisyon, nou lafwa ka vin pi fò. Nou lanmityé ké Jéova ka vin pi fò paské nou ka wè ké nou pròp wéy fòrs i ka bay, lò nou ka pansé ki nou pa pouvé tchenbé ankò (li Jacques 1:2-4). Sa ka fè Jéova lapenn lò i ka wè nou soufri, mé a pa ti kontan i kontan lò i ka wè nou ka tchenbé rèd. Labib-a ka di : « Si zòt ka tchenbé lò zòt ka soufri pou bon bagaj zòt fè, a roun bagaj ki ka fè Bondjé plézi » (1 Pierre 2:20). Jéova ké rékonpansé sa-ya ki ké tchenbé jouktan lafen-an rivé. I ké bay yé lavi pou tout-tan annan roun monn koté pyès moun pa ké kont vré ladorasyon-an (Matthieu 24:13).
ANNOU FOUYÉ ANNAN LABIB-A
Annou wè poukisa nou pouvé rété fidèl douvan Jéova menm si yé ka pèrsékité nou. Annou wè osi ki bénédiksyon nou ka jwenn lò nou ka tchenbé rèd.
4. Ou pouvé tchenbé rèd anba opozisyon ou fanmi
Jézi té ja di nou ki pitèt nou fanmi pa té ké dakò ké désizyon nou pran di adoré Jéova. Li Matthieu 10:34-36, épi kozé asou sa késyon-an :
Lò roun moun ka désidé adoré Jéova, kouman so fanmi pouvé réyaji ?
Pou wè roun èkzanp di sa, gadé VIDÉYO-a. Épi kozé asou sa késyon-an :
Kisa ou té ké fè si roun moun annan ou fanmi ouben roun zanmi té ka éséyé anpéché ou adoré Jéova ?
Li Psaume 27:10 ké Marc 10:29, 30. Apré ou li chak vèrsé, kozé asou sa késyon-an :
Kouman sa promès-a pouvé idé ou tchenbé rèd magré opozisyon ou fanmi ouben ou zanmi ?
5. Kontinyé adoré Jéova magré pèrsékisyon-an
Ou bézwen kouraj pou adoré Jéova lò ròt-ya ka éséyé anpéché ou fè sa. Gadé VIDÉYO-a, épi kozé asou sa késyon-an :
Kouman èkzanp-ya annan vidéyo-a ka fè ou lafwa vin pi fò ?
Li Actes 5:27-29 ké Hébreux 10:24, 25. Apré ou li chak vèrsé, kozé asou sa késyon-an :
Poukisa sa enpòrtan nou kontinyé adoré Jéova menm si gouvèrnman-an ka défann nou préché ouben alé annan réinyon-yan ?
6. Jéova ké idé ou tchenbé rèd
Témwen Jéova ki pa gen menm laj é ki ka vini di tout koté, ka kontinyé adoré Jéova magré pèrsékisyon-an. Gadé VIDÉYO-a pou wè kisa ki idé frè ké sò-ya. Apré sa, kozé asou sa késyon-an :
Annan vidéyo-a, kisa ki idé frè ké sò-ya tchenbé rèd ?
Li Romains 8:35, 37-39 ké Philippiens 4:13. Apré ou li chak vèrsé, kozé asou sa késyon-an :
Kouman sa vèrsé-a ka byen montré ou ki ou pouvé tchenbé rèd anba nenpòrt ki éprèv ?
Li Matthieu 5:10-12, épi kozé asou sa késyon-an :
Poukisa ou pouvé gen tchò kontan magré pèrsékisyon-an ?
Roun lo ké roun patché moun ki ka adoré Jéova rété fidèl douvan Jéova. Ou pouvé rivé fè sa ou menm osi !
I GEN MOUN KA DI : « Mo pa ké rivé tchenbé anba pèrsékisyon. »
Ki vèrsé pouvé idé sa moun-an gen kouraj i bézwen pou tchenbé rèd ?
SA NOU WÈ
Lò nou ka adoré Jéova magré pèrsékisyon-an, a roun bagaj ki gen bokou valò pou li. Gras a Jéova, nou pouvé tchenbé rèd !
Kisa ou anprann
Poukisa krétyen-yan sir yé ké pèrsékité yé ?
Kisa ou pouvé fè dipi aprézan pou préparé ou kò pou pèrsékisyon-an ?
Poukisa ou pouvé sir ki sa posib adoré Jéova magré pèrsékisyon-an ?
SA OU POUVÉ TRAPÉ OSI
Gadé kouman Jéova idé roun frè ki tchenbé rèd lò yé mété l’ lajòl pas i pa té ka mélé so kò annan zafè monn-an.
Gadé kouman roun mouché ké so madanm rété fidèl douvan Jéova pannan plizyèr lannen magré opozisyon-an.
Gadé kouman ou pouvé pran kouraj é tchenbé anba pèrsékisyon.
« Prépare-toi dès maintenant à la persécution » (La Tour de Garde, jwiyé 2019)
Kisa ou divèt pansé si ou fanmi pa lé ou adoré Jéova ? Gadé osi kisa ou pouvé fè si sa ka rivé ou.
« La vérité apporte, “non pas la paix, mais l’épée” » (La Tour de Garde, òktòb 2017)