LÉSON 55

Idé ou asanblé lokal

Zimaj piblikasyon-an

Asou tout latè-a, annan milyé asanblé lokal, milyon moun ka adoré Jéova ké tchò kontan. Tout sa Témwen-yan byen kontan rousouvwè roun ansèyman ké roun fòrmasyon, é yé menm yé lé idé yé asanblé lokal. Ès a pa menm lajwa-a ou ka rousanti annan ou asanblé ?

1. Kouman ou pouvé sèrvi ou tan ké ou fòrs pou idé ou asanblé ?

Tout moun pouvé idé annan asanblé-a. Si annan ou asanblé, i gen frè ké sò ki ja granmoun ouben ki andikapé, pitèt ou pouvé idé yé vini annan réinyon-yan. Ouben ou pouvé idé yé rounòt fason, parèkzanp ou pouvé alé fè komisyon pou yé ouben nétwayé yé kaz pou yé (li Jacques 1:27). Nou pouvé osi propozé idé pou nétwayé ouben ranjé sal di Rwayonm-an. Pyès moun pa ka fòrsé nou idé. A paské nou kontan Bondjé ké nou frè ké sò-ya ki nou ka ‘vini bay yé nou fòrs ké tout nou tchò’ (Psaume 110:3).

Sa-ya ki batizé pouvé fè ròt bagaj ankò. Frè-ya pouvé travay pou yé gen kalité Labib-a ka doumandé yé gen pou yé divini asistan, épi pita, ansyen. Frè-ya kou sò-ya pouvé divini pyonyé pou fè plis annan travay prédikasyon-an. É roun ran Témwen Jéova ka asèpté idé pou konstrwi koté pou adoré Jéova. Ròt ankò ka alé viv annan rounòt koté pou idé roun asanblé koté yé bézwen plis moun.

2. Kouman nou pouvé sèrvi nou soumaké ké sa nou gen pou idé asanblé-a ?

Labib-a ka ankourajé nou ‘bay Jéova lònò ké sa nou gen ki pi bon’ (Proverbes 3:9). A roun plézi pou nou bay soumaké ouben ròt bagaj pou idé asanblé lokal-a ouben travay prédikasyon-an ki ka fèt asou tout latè-a (li 2 Corinthiens 9:7). Ofrann nou ka bay ka sèrvi osi pou opérasyon pou poté sékour. Chak simenn ouben chak mwa, roun patché Témwen Jéova ka mété « roun kichoz asou koté » pou fè roun ofrann (li 1 Corinthiens 16:2). Pou fè sa, yé ka itilizé sit-a donate.jw.org ouben bwèt pou fè ofrann-yan ki annan koté nou ka adoré Jéova. Fason nou ka itilizé nou soumaké ké sa nou gen ka pèrmèt nou montré Jéova ki nou kontan li.

ANNOU FOUYÉ ANNAN LABIB-A

Annou wè plizyèr fason nou pouvé idé asanblé-a.

3. Nou pouvé bay ofrann

Jéova ké Jézi kontan sa-la ki ka bay ké tchò kontan. Roun jou, Jézi wè roun vèv ki té maléré bay roun ofrann. Li Luc 21:1-4, épi kozé asou sa késyon-yan :

Ès nou blijé bay bokou soumaké pou fè Jéova plézi ?
Kisa Jéova ké Jézi ka rousanti lò nou ka bay ké tout nou tchò ?

Pou savé sa yé ka fè ké ofrann-yan, gadé VIDÉYO-a. Épi kozé asou sa késyon-an :

VIDÉYO : « Roun kado pou Jéova » (4:47)

Kouman yé ka itilizé ofrann-yan pou idé asanblé-ya asou tout latè-a ?

Roun sò ki gen so laj ka mété soumaké annan roun bwèt pou fè ofrann. I kontan toubonnman.

4. Nou pouvé montré ki nou paré pou idé

Tan-lontan-an, adoratèr Jéova-ya té ka travay rèd pou okipé di koté yé té ka adoré l’. Mé pou fè sa, a pa soumaké rounso yé té gen pou bay. Li 2 Chroniques 34:9-11, épi kozé asou sa késyon-an :

Kouman chak Israyélit rivé idé pou ranjé Tanp-a ?

Pou wè kouman Témwen Jéova-ya ka pran swen di yé sal di Rwayonm, gadé VIDÉYO-a. Apré sa, kozé asou sa késyon-yan :

VIDÉYO : Annou pran swen di koté nou ka adoré Jéova (3:31)

Roun zimaj vidéyo-a ‘Annou pran swen di koté nou ka adoré Jéova’. Gran kou piti ka nétwayé yé Sal di Rwayonm.

Poukisa sa enpòrtan ki sal di Rwayonm-an rété pròp é pou i pa abimé ?
Kisa ou pouvé fè pou idé annan sa ?

Asou roun chantyé Sal di Rwayonm, Témwen-yan ka konstrwi roun mir ké aglo.

5. Frè-ya pouvé fè plis annan asanblé-a

Labib-a ka ankourajé frè-ya fè tousa yé pouvé pou fè plis annan asanblé-a. Gadé VIDÉYO-a, épi kozé asou sa késyon-an :

VIDÉYO : Frè-ya, travay pou Jéova (5:23)

Kisa Ryan fè pou fè plis pou idé annan asanblé-a ?

Labib-a ka di ki bèl kalité roun frè divèt gen pou i divini asistan ouben ansyen. Li 1 Timothée 3:1-13, épi kozé asou sa késyon-yan :

Ki bèl kalité roun frè ki té ké lé divini asistan ouben ansyen divèt gen ?
Ki bèl kalité so fanmi divèt gen ? (gadé vèrsé 4 ké 11).
Lò frè-ya ka fè tousa yé pouvé pou yé gen sa kalité-ya, kouman sa ka idé tout moun annan asanblé-a ?