• Ou pouvé divini zanmi Jéova
    Viv ké tchò kontan pou tout-tan ! (Kozman asou Labib-a)

    • Ou pouvé divini zanmi Jéova

      Ou ka divini zanmi ké moun ou konnèt. A menm bagaj-a ké Jéova. I lé divini ou zanmi. A pou sa, i lé ou anprann konnèt bèl kalité i gen. I lé osi ou konnèt fason i ka fè tout bagaj é sa i lé pou to. Jéova ka èspéré ki pi ou ké anprann konnèt li, pi ou ké lé divini so zanmi. Mé ès ou pouvé vréman divini zanmi Bondjé ? (li Psaume 25:14). Kisa ou divèt fè pou divini so zanmi ? Labib-a ka réponn sa késyon-yan. I ka èspliké nou osi poukisa lanmityé ké Jéova a pi bèl lanmityé nou pouvé gen.

      1. Kisa Jéova té ké kontan ou fè ?

      « Vini pi pròch di Bondjé, é i ké vini pi pròch di zòt » (Jacques 4:8). Kisa sa vèrsé-a lé di ? Jéova té ké kontan ou divini so zanmi. I gen moun ka pansé ki kou nou pa pouvé wè Bondjé nou pa pouvé divini so zanmi. Mé annan Labib-a, Jéova ka di nou tousa nou bézwen konnèt asou li pou ‘vini pi pròch di li’. Pi nou ka li Labib-a, pi nou lanmityé ké li ké vin pi fò, menm si nou pa ka wè l’.

      2. Poukisa Jéova a pi bon Zanmi ou pouvé gen ?

      Moun-an ki gen plis lanmou pou ou a Jéova. I lé ou gen tchò kontan é ki ou doumandé l’ idé ou chak fwa ou bézwen. Ou pouvé ‘jité tout ou enkyétid asou li paské i ka pran swen di ou’ (1 Pierre 5:7). Jéova toujou paré pou idé, konsolé ké kouté so zanmi (li Psaume 94:18, 19).

      3. Kisa nou divèt fè pou divini zanmi Jéova ?

      Jéova kontan tout moun, « mé i ka divini bon zanmi ké moun-yan ki ka maché drèt » (Proverbes 3:32). Pou divini zanmi Bondjé, a pou nou fè éfòr pou fè sa i lé, é pa fè bagaj i pa kontan. I gen moun ka pansé ki yé pa ké janmen rivé fè sa Jéova ka doumandé yé fè. Mé Jéova ka konprann nou. Sa-ya ki vréman kontan li é ki ka fè tousa yé pouvé pou fè li plézi ka divini so zanmi (Psaume 147:11 ; Actes 10:34, 35).

      ANNOU FOUYÉ ANNAN LABIB-A

      Anprann kouman ou pouvé divini zanmi Jéova é poukisa a pi bon Zanmi ou pouvé gen.

      4. Abraam té sa zanmi Jéova

      Sa Labib-a ka di asou Abraam (yé té ka aplé l’ osi Abram) ka montré nou kisa nou divèt fè pou divini zanmi Bondjé. Li Genèse 12:1-4, épi kozé asou sa késyon-yan :

      • Kisa Jéova doumandé Abraam fè ?

      • Kisa Jéova promèt li ?

      • Kisa Abraam fè ?

      5. Sa Jéova ka doumandé so zanmi fè

      Souvan, nou ka èspéré ki nou zanmi fè bagaj pou nou.

      • Kisa ou kontan ou zanmi fè pou ou ?

      Li 1 Jean 5:3, épi kozé asou sa késyon-an :

      • Kisa Jéova ka doumandé so zanmi fè ?

      Pou obéyi Jéova, pitèt nou ké divèt chanjé nou konpòrtman ouben bagaj ki pa k’alé annan nou karaktèr. Li Isaïe 48:17, 18, épi kozé asou sa késyon-an :

      • Poukisa Jéova ka doumandé so zanmi fè chanjman annan yé lavi ?

      Roun mouché ki ka travay annan konstriksyon ka bay so kolèg travay roun kas pou protéjé so tèt.

      Roun bon zanmi lé idé nou, a pou sa i ka bay nou konsèy pou protéjé nou. Jéova ka fè menm bagaj-a ké so zanmi.

      6. Sa Jéova ka fè pou so zanmi

      Lò yé gen problèm, Jéova ka idé so zanmi. Gadé VIDÉYO-a, épi kozé asou sa késyon-an :

      VIDÉYO : Jéova fè tèlman bagaj pou mo (3:20)

      • Sa madanm-an té ka soufri akoz di mové lidé ké santiman ki té ka dékourajé l’. Kouman Jéova idé l’ ?

      Li Isaïe 41:10, 13, épi kozé asou sa késyon-yan :

      • Kisa Jéova ka promèt fè pou tout so zanmi ?

      • Ès ou ka pansé ki Jéova pouvé sa roun bon Zanmi pou ou ? Poukisa ou ka pansé sa ?

      Montage : Zanmi ka idé roun ké ròt. 1. Roun mouché ka idé rounòt mouché tchenbé roun tab. 2. Roun madanm ka louvri so tchò pou so zanmi. 3. Roun mouché ka idé rounòt mouché pou maché ké so kann.

      Vré zanmi toujou la, paré pou idé ou lò ou bézwen yé idé ou. Jéova ké idé ou osi.

      7. Pou divini zanmi Jéova nou bézwen palé ké li é kouté sa i ka di nou

      Lò dé zanmi ka palé ansanm yé lanmityé ka divini pi fò. Li Psaume 86:6, 11, épi kozé asou sa késyon-yan :

      • Kouman nou pouvé palé ké Jéova ?

      • Kouman Jéova ka palé ké nou ?

      Montage : 1. Roun madanm ka priyè. Laro so tèt, i gen roun flèch ka monté. 2. Roun madanm ka li Labib-a. Laro so tèt, i gen roun flèch ka désann.

      Nou ka palé ké Jéova lò nou ka priyè ; i ka palé ké nou lò nou ka li Labib-a.

      I GEN MOUN KA DI : « Awa, sa pa posib divini zanmi Bondjé. »

      • Ki vèrsé ou té ké itilizé pou montré ki nou pouvé divini zanmi Jéova ?

      SA NOU WÈ

      Jéova lé ou divini so zanmi, i lé idé ou vini pi pròch di li.

      Kisa ou anprann

      • Kouman Jéova ka idé so zanmi ?

      • Poukisa Jéova ka doumandé so zanmi fè chanjman annan yé lavi ?

      • Ès ou ka pansé ki sa rèd divini zanmi Jéova ? Poukisa ou ka pansé sa ?

      Éséyé fè sa

      SA OU POUVÉ TRAPÉ OSI

      Kouman ou lanmityé ké Jéova pouvé chanjé ou lavi ?

      « Jéhovah : un Dieu qui mérite d’être connu » (La Tour de Garde, 15 févryé 2003)

      Anprann kouman divini zanmi Bondjé.

      « Comment devenir l’ami de Dieu ? » (Les jeunes s’interrogent. Réponses pratiques [volume 2], chapit 35)

      Gadé kouman lanmityé sa madanm-an gen ké Jéova, sové so lavi.

      « Je ne voulais pas mourir ! » (La Tour de Garde no 1 2017)

      Jennjan ka palé di yé lanmityé ké Jéova.

      Kisa nou ka rousanti lò nou zanmi ké Bondjé ? (1:46)