KARAKI 4

Bukin Buan Mwengaia

NORA te bwai ae riki ngkai. A a kanakoaki Atam ma Nei Ewa man te oo-n-aroka ae rangi ni kan are Eten. Ko ataa bukina?

Ibukina bwa a karaoa te mwakuri ae rangi ni buakaka. Mangaia are e a katuuaeia Iehova. Ko ataa te mwakuri ae buakaka are a karaoia Atam ma Nei Ewa?

A karaoa te mwakuri are e ribaiia te Atua bwa a na karaoia. E tuangia te Atua bwa a kona n amwarake man kaai nako n te oo-n-aroka arei, ma a na aki amwarake man te kai teuana, bwa mwina a na mate. E taua te kai anne bwa ana bwai. N aron ae ti ataia, e bure anaakin ana bwai temanna kee? Ma tera ae riki?

N te bong teuana ngke e mena n tii ngaia Nei Ewa n te oo-n-aroka, ao e a taetae naba te naeta nakoina. Iangoa anne! E tuanga Nei Ewa bwa e na kana te uaanikai man te kai are e tuangia te Atua bwa a na aki amwarake mai iai. N te tai arei ngke e karikiia naeta Iehova, ao e aki karikiia bwa a na bwaati n taetae. Mangaia are e oti bwa iai ae karaoa te naeta bwa aongkoa e taetae. Antai ae karaoa anne?

Tiaki Atam. Mangaia are bon temanna mai buakoia aomata ake e karikiia ngkoangkoa Iehova, imwain karaoan te aonnaba. Aomata akanne bon anera, ao ti aki kona n noriia. Te anera aei, e kainikatonga. E a moanna n iangoia bwa e riai naba ni kairiri n aron te Atua. Ao e tangiriia aomata bwa a na ongeaba irouna n onean mwin are a riai n ongeaba iroun Iehova. Bon te anera aei, are e karika te naeta bwa aongkoa e taetae.

E tokanikai te anera aei ni mwamwanan Nei Ewa. Ngke e tuanga Nei Ewa bwa e kona n riki n Atua ngkana e kana te uaanikai, ao e kakoauaa neiei. Mangaia are e a kanna, ao e kanna naba Atam. A aikoa ongeaba Atam ma Nei Ewa iroun te Atua, ao aei bukina are a a kabuaa iai mwengaia are te oo-n-aroka ae rangi ni kan.

Ma n te taina, e na manga katikiraoa te aonnaba ni kabutaa te Atua n aron te oo-n-aroka are Eten. Ti na manga reiakinna rimwi riki, bwa tera arom ni buoka te waaki aei. Ma ngkai moa ti na noria bwa tera ae riki nakon Atam ma Nei Ewa.

Karikani Bwaai 2:​16, 17; 3:​1-13, 24; Te Kaotioti 12:⁠9.