E Kona ni Maraki Nanon te Atua Arora ni Kona ni Kakukureia

Ko a tia n rangi ni kammarakaki n te aro are ko a bon tang iai?​—a Ti bae n tia n rinanon aei ngaira ni kabane. Ma n taai tabetai, ti kona n tang ibukina bwa ti nanokawaki. E kona temanna n taekin taeka ibukira aika buakaka aika aki koaua. E kona ni kammaraki anne ke e aki?​— E kona naba ni maraki nanon te Atua ngkana e taekinaki n te aro ae kewe. Ti na maroroakina aei ao n nora arora ni kakukureia te Atua ma n aki kammarakia.

E taekinaki n te Baibara bwa aomata tabeman ake a taekinna bwa a tangira te Atua, a boni “kamaraka nanona.” Eng, a boni “karawawata” te Atua! Ni koauana, bon akea ae kona ni kammaraka rabwatan te Atua ae Iehova ae moan te mwaaka. Ti na nora ngkanne bukini marakin nanon Iehova ngkana ti aki karaoi baike e taekin.

A rangi ni kammaraka nanon Iehova aomata aika uoman ake e moani karikiia. A kamaekaaki naaka uoman aikai n te Bwaretaiti i aon te aba ae e aranaki bwa “te ne n aroka are Eten.” Antai naaka uoman aikai?​— Eng, bon Atam ao imwina Ewa. Ti na nora te bwai are a karaoia are a kammaraka iai nanon Iehova.

Imwini kamaekaia n te onnaroka anne iroun Iehova, e tuangia bwa a na tararuaia raoi. E tuangia naba bwa a kona ni kariki ao ni kaai ni maiu n te onnaroka n aki mamate. Ma imwain reken natiia Atam ao Ewa, e a riki te bwai ae rangi ni kangaanga. Ko ataia bwa tera te baenne?​— E kairaki Ewa iroun te anera ao imwina Atam bwa a na karitei nakon Iehova. Ti na nora aron rikin aei.

E kabongana te naeta te anera bwa aongkoa e taetae. E bwaka nanon Ewa n te baere e tuangaki are e kona n riki bwa “kaanga te Atua,” iroun te naeta ni kawai. Ngaia are e a karaoa are e tuangnga te naeta ni kawai. Ko ataia bwa tera te baenne?​—

E kana uaan te kai Ewa are e tuangaki Atam iroun Iehova bwa a riai n aki kanna. Imwaini karikan Ewa iroun te Atua, e a kaman tuanga Atam ni kangai: “Ko kona n amamarake raoi mani kaai ni kabane aika kain te ne n aroka aei: ma ko na tai amarake man te kai n ata te raoiroi ma te buakaka: ba n te bong are ko amarake mai iai ao ko na boni mate.”

E bon ataa te tua anne Ewa. Ma e teimatoa n tarataraa te kai arei ao e noria bwa “e kakanaki uaana, ao ba e kan tarataraki ni maata,. . . ao e kinika uaana, ao e kanna.” Imwina e angan Atam ao “e kanna naba.” N am iango, bukin tera ngke e karaoa anne?​— Ibukina bwa e korakora riki tangiran Ewa iroun Atam nakon tangiran Iehova. E rineia bwa e na kakukureia riki buuna nakoni kakukureian te Atua. Ma e kakawaki riki te ongeaba nakon Iehova nakon te ongeaba nakon temanna!

Ko uringa te naeta ni kawai are e taetae nakon Ewa? N aron te aomata ngkai e kona ni karaoa te taore bwa aongkoa e taetae, iai naba ae karaoa te naeta anne bwa aongkoa e taetae. Antai are e taetae mairoun te naeta?​— Bon “te naeta nikawai, are arana te Riaboro ao Tatan.”

Ko ataia bwa ko na kanga ni kakukureia Iehova?​— Ko boni kona ni karaoa anne ngkana ko ongeaba irouna n taai nako. E taekinna Tatan bwa e kona ni kairiia aomata ni kabane bwa a na karaoa are e tangiria. Ngaia are e kaumakira Iehova ni kangai: “Natiu, ko na wanawana, ao kakukureia nanou, Ba I aonga ni kaeka ane kakanikoai.” E bwainingareaki ke ni kakanikoaki Iehova iroun Tatan. E taku bwa e kona ni katannakoia aomata ni kabane bwa a na aki toro iroun Iehova. Ngaia are kakukureia n arom n ongeaba ao n toro irouna! Ko na kakorakorako ni karaoa anne?