KARAKI 7

Te Mwaane Ae Ninikoria

NGKE a a moanna ni bati aomata n te aonnaba, ao angiia mai buakoia a kaakaraoa ae buakaka n aron Kain. Ma iai te aomata temanna ae kaokoro. Aran teuaei Enoka. Bon te aomata ngaia ae ninikoria. Aomata nako i rarikina a kaakaraoi mwakuri aika rangi ni bubuaka, ma e teimatoa Enoka n toro iroun te Atua.

Ko ataia bwa bukin tera ngkai a kaakaraoi mwakuri aika bati aika bubuaka, aomata n taai akekei? Iangoia, antai ngkoa are e kairiia Atam ma Nei Ewa bwa a na aki ongeaba iroun te Atua, ni kana te uanikai are e tua te Atua bwa a na aki kanna? Eng, bon te anera are buakaka. E aranaki n te Baibara bwa Tatan. E kataia ni kamwaneia aomata ni kabane bwa a na karaoa ae buakaka.

N te taina, e kabonganaki Enoka iroun Iehova ae te Atua bwa e na tuangia aomata taekan te bwai ae a aki kan ongo. E kangai taekana: ‘N te bong teuana ao e na kamaunaia aomata aika buakaka ni kabane te Atua.’ Tao a rangi n un aomata ngke a ongo aei. A bae ni kataia ni kan tiringa naba Enoka. Mangaia are e riai n rangi n ninikoria Enoka n tuangia aomata taekan te bwai are e nang karaoia te Atua.

E aki kamaana Enoka te Atua ni maiu i buakoia aomata ake a buakaka akekei. Mwaitin ana ririki Enoka bon tii 365 te ririki. E aera ngkai ti taekinna bwa “tii 365 te ririki”? Ibukina bwa e raka marurungia aomata n taai akanne, ao e rangi n abwabwaki riki maiuia ni kabotauaki ma taai aikai. Mwaitin ana ririki natin Enoka are Metutera bon 969!

Imwin maten Enoka ao a a rikirake riki ni buakaka aomata. E taekinaki n te Baibara bwa, ‘a buakaka n taai nako baike a iangoi,’ ao e a ‘onrake te aonnaba n te iowawa.’

Ko ataa teuana bukin batin te kangaanga n te aonnaba ni boong akekei? Ibukina bwa iai ana waaki Tatan ae boou ni kaineti ma kairakia aomata bwa a na karaoi baika bubuaka. Ti na reiakina taekan aei n te kaongora ae imwina.

Karikani Bwaai 5:​21-24, 27; 6:​5, 11-13; Ebera 11:​5, BK; Iuta 14, 15.