Nakonako Ma Te Atua N Taai Aika Karuanikai Aikai

“E nakonako Enoka ma te Atua: ao akea ngaia; ba E anaia te Atua.”​—Karikani Bwaai 5:24.

1. Baikara bwaai aika riiriki n taai aikai ake a a kabuakakai boong aikai?

TAAI aika a karuanikai! A kaineti raoi taeka aikai ma kabwarabwaran ririki ake e a tia te botannaomata n namakina iai te aki rau, ao te iowawa ni moa man tein te Tautaeka n Uea iroun te Mesia n 1914. I nanon taai akanne, a a roko iai aomata i nanoni “boong aika kaitira.” A rotakibuaka riki ngkai aomata nakon are mai imwaina ni kangaanga n aron roongo, aoraki, mwaeiei, ao buaka. (2 Timoteo 3:1; Te Kaotioti 6:1-8) A aki kaokoro te koraki ake a taromauria Iehova ma aomata ni boong aikai. Man rotakira ae uarereke ke ae bubura, ti a bane iai ni kaaitara ma kangaanga ao te nanokokoraki ibukin te aroaro ni maiu n te aonnaba ni boong aikai. Bwaai naba tabeua aika a karikii kangaanga nakon maiura boni kangaanga ibukin te mwane, te aki rau irouia tautaeka, mwakuri n iowawa, ao ai te aoraki.

2. Baikara kangaanga ake a a tia ni kaaitara ma ngaai ana toro Iehova?

² Irarikin anne, a mwaiti ana toro Iehova aika a a tia n nanomwaaka i aani bwainikirinakiia aika rawawata aika mwaiti, ngkai e teimatoa Tatan ni buakania “tabemang, ake a kakawakin ana tua te Atua, ma n taua kaotiotan Iesu.” (Te Kaotioti 12:17) Ao e ngae ngke ti tuai ni bane ni karawawataki n te bwainikirinaki, ma a bane Kristian ni koaua ni kekeiaki ni kaitaraa Tatan te Riaboro ao taamnei ake a kairi karaoan mwakuri aikai i buakon te botannaomata. (I-Ebeto 2:2; 6:12) E kainnanoaki iai te taratara raoi, bwa ti na aki kairarangaki n ae buakaka kioina ngkai ti aki toki n aitara ma ngaia n ara mwakuri, n te reirei, ao n taabo riki tabeua ake ti bobotaki iai ma te koraki ake a aki tangira te taromauri ae itiaki.

Nakonako ma te Atua, ao Tiaki te Botannaomata

3, 4. N te aro raa ae a kaokoro iai Kristian ma kaain te aba?

³ A kakorakoraia naba Kristian ake n te moan tienture n rarawa nakon nanon te aonnaba, ao a rangi ni kaokoro iai ma te koraki ake i tinanikun te ekaretia ni Kristian. E kabwarabwaraa te kaokoro aei Bauro ngke e korea ae kangai: “Ma ngaia ae I a atonga aei, ao I a tuangngkami iroun te Uea, ba kam na tai manga nakonako n ai aroia Tientaire, ngkai a nakonako ni bakanrerein nanoia, ao a ro nanoia, ao a riki n ianena man te maiu are mairoun te Atua i bukin te babanga are i rouia, ma matoatoan nanoia. Ao ngkai a toki n raraoma, ao a kanakoia, boni ngaiia, nakon te tamare, ba a na karaoa te kamaira ni kabanea, ao a bati n ri nanoia iai.”​—I-Ebeto 4:17-19.

⁴ Ai teretere ra raoi taeka akanne, ibukin kabwarabwaran korakoran tangiran kaainakin te Aro n te aonnaba aei, ao te aroaro ni maiu ae aki-riai ibukia ake a maiu n ana bong Bauro ao ara bong aikai naba! N aron are n te moan tienture, a aki “nakonako n ai aroia Tientaire,” Kristian ni boong aikai. Ma e reke irouia te kakabwaia ae te nakonako ma te Atua. Te koaua bwa tao a kona n nanokokoraki tabeman, bwa tao e eti iangoan ae a kona n nakonako ma Iehova aomata aika mangori ao a aki-kororaoi, ke a aki. Ma e kaotaki n te Baibara bwa a boni konaa. Irarikin anne, e kaantaningaia naba Iehova bwa a na karaoa anne. N te kawanua n tienture imwain Aia Tai Kristian, e korei taeka aika kairaki koreaia aikai te burabeti are Mika: “Tera ae E ukoukoria Iehova mai roum, ba ti te karaoa ae eti, ma te tangira te nanoanga, ma te nako [“nakonako,” NW] n nanorinano ma Atuam?”​—Mika 6:8.

Ti na Kanga n Nakonako ma te Atua ao Bukin Tera?

5. E na kanga ni kona n nakonako ma te Atua te aomata ae aki-kororaoi?

⁵ Ti na kanga n nakonako ma te Atua ae moan te korakora ae e aki kona n noraki? E mataata bwa tiaki n aron ae ti nakonako iai ma raora n aomata. N te Baibara, te taeka ae “nakonako” e kona n nanonaki iai “katotongan te aroaro ni maiu teuana.”a Ururingan aei iroura, ti a ataia iai bwa ane e nakonako ma te Atua, e maiuakina ae e taekinaki iroun te Atua ao ae e kukurei iai. Ibukin uaiakinan te aroaro ni maiu aei, ti a kaokoro iai ngkanne ma angiia aomata aika i rarikira. Bon tii aei te bwai ae e riai ibukin te Kristian. Bukin tera? A a mwaiti bukina.

6, 7. Bukin tera ngkai te nakonako ma te Atua, bon te aroaro ni maiu ae te kabanea n tamaroa?

⁶ Te moanibwai, bon Iehova ara tia Karikiriki, Nibwan maiura, ao te tia Katauraoi bwaai ni kabane aika ti kainnanoi ibukin kateimatoan maiura. (Te Kaotioti 4:11) Ibukin anne, bon tii Ngaia ae E riai n tuangira arora n nakonako. Irarikina, te nakonako ma te Atua bon te aroaro ni maiu ae te kabanea ni bongana nakoira. E a tia Iehova ni karekea te anga ae a na kona ni kabwaraki iai aia bure, te koraki ake a nakonako ma ngaia, ao e kaota naba te kaantaninga ae onimakinaki ae taekan te maiu n aki toki. E katauraoaki naba iroun Tamara are i karawa ae moanibaan te tatangira, reirei aika raraoi ake a na buokaki iai te koraki ake a nakonako ma ngaia ni kanakoraoi maiuia ngkai, e ngae ngke a aki-kororaoi ao a maeka n te aonnaba ae mena i aani mwaakan Tatan. (Ioane 3:16; 2 Timoteo 3:15, 16; 1 Ioane 1:8; 2:25; 5:19) Teuana riki bukin nakonakora ma te Atua, ti ataia ae ingaingan nanora ni karaoia, e na karekea te rau ao te katiteuanaki i nanon te ekaretia.​—I-Korote 3:15, 16.

⁷ Bukin nakonakora ma te Atua ae te kabanea ni kakawaki, bwa ti kaotia iai bwa ti tei iia ni kaineti ma te nanououa bwa antai ae e riai ni mena irouna te mwaaka n tautaeka, are e tabekaki ngkoa n te o-n-aroka are i Eten. (Karikani Bwaai 3:1-6) Ti kaotia n aroaroni maiura bwa ti tei n ana itera Iehova, ao akea maakura n tataekina ae bon tii ngaia ae riai n Tautaeka. (Taian Areru 83:18) Ti karaoa ae boraoi ma ara tataro are e na tabuaki aran te Atua ao e na tauaki naba ana taeka. (Mataio 6:9, 10) Ai wanawana ra te koraki ake a baireia bwa a na nakonako ma te Atua! A kakoauaa raoi bwa a nakonako n te kawai ae eti, kioina ngkai bon tii Iehova “ae e wanawana n ti ngaia.” E bon aki kona ni karaoa ae kairua.​—I-Rom 16:27, BK.

8. A kanga n titeboo taai ake a maiu iai Enoka ao Noa ma ara tai aikai?

⁸ E na kanga ni kona ni maiuakinaki te aroaro ni Kristian, ngkai e a rangi ni karuanikai te aonnaba ao angiia aomata a aki kukurei ni beku ibukin Iehova? Ti na nora kaekan aei, ngkana ti rinanon rongorongoia mwaane ake rimoa ake a teimatoa ni kakaonimaki n taai ake a rangi ni karawawata. Uoman mai buakoia te koraki aikai, bon Enoka ao Noa. A uaia ni maiu uaakai n taai aika titeboo ma ara bong aikai. E a taonaaba te buakaka. E buta aonnaba n te tiritiri ao te wene ni bure n na bong Noa. Ma e ngae n anne, a rawa Enoka ao Noa ni karaoa nanon aon te aba ao a nakonako ma Iehova. A kanga ni karaoa aei? Ibukin kaekan te titiraki anne, ti na maroroakina ana katoto Enoka n te kaongora aei. N te kaongora are imwina, ti na maroroakina iai taekan Noa.

E Nakonako Enoka ma te Atua n Taai Aika Karuanikai

9. Tera rongorongon Enoka ae iai iroura?

⁹ Enoka bon te moan aomata n nakonako ma te Atua, ae e kabwarabwaraki n te Baibara. E taku te Baibara: “E nakonako Enoka ma te Atua i mwini karikani Metutera i rouna.” (Karikani Bwaai 5:22) Imwin taekinan abwakin maiun Enoka, ae abwabwaki ngkana e kabotauaki ma maiura, ma e uarereke ni kabotauaki ma maiuia aomata n taai akekei, e taku te rongorongo: “E nakonako Enoka ma te Atua: ao akea ngaia; ba E anaia te Atua.” (Karikani Bwaai 5:24) E teretere bwa Iehova e kamwainga maiun Enoka man te maiu nakon te mate bwa e aonga n aki rotakibuaka ngkana e reke i nanon baia ake a ribaia. (Ebera 11:5, 13, BK) E karako rongorongon Enoka n te Baibara itinanikun kiibu akana uarereke akanne. Mangaia are, man te rongorongo ae reke iroura ao ni bwaai ni kakoaua riki tabeua, e bon eti ngkanne ngkai ti taekina ana tai Enoka, bwa e karuanikai naba.

10, 11. (a) Tera aron butanakon te buakaka imwin aia karitei Atam ao Nei Ewa? (b) Tera te taetae ni burabeti are e tataekinna Enoka, ao tera are e karaoaki nakoina ibukin anne?

¹⁰ N te katoto, iangoa waekoan taabangakin te buakaka i buakoia botannaomata imwin buren Atam. E kaongoira te Baibara bwa te moan aomata n tiritiri, bon ana moan nati Atam are Kain are e tiringa tarina are Abera. (Karikani Bwaai 4:8-10) Imwin kamatean Abera n te aro ae iowawa, e a manga riki natin Atam ao Nei Ewa te mwaane riki temanna, ao a aranna bwa Teta. N rongorongona, ao ti wareka iai ae kangai: “E bungiaki naba natin Teta; ao e aranna ba Enoti: ao a a tiba moa n taboa aran Iehova ngkekei.” (Karikani Bwaai 4:25, 26) E kananokawaki bwa a “taboa aran Iehova,” n te aro ae e aki eti.b Imwin ririki aika bati imwin bungian Enoti, ao e a otea te anene teuana ana bakatibu Kain ae arana Rameka, nakoia buuna aika uoman ike e a kaotia iai bwa e a tia n tiringa te mwaane are e kaikoakia. E kauring naba ni kangai: “Ba itiua te rekenikai ibukini mateni Kain, ma bon itibui ma itiua i bukini maten Rameka.”​—Karikani Bwaai 4:10, 19, 23, 24, BK.

¹¹ E kaotaki man bwaai aika uarereke ake a taekinaki n rongorongo ake mai imwaina, bwa e waekoa ni butanako te buakaka are e moanaki iroun Tatan n te oo-n-aroka are i Eten, i buakoia ana kariki Atam. N te tai anne, Enoka bon ana burabeti Iehova are e taekini taeka aika a mwaaka aika iai manenaia ibukira ni boong aikai. E taekinna Iuta bwa e taetae ni burabeti Enoka ni kangai: “Noria, E nako mai te Uea [“Iehova,” NW] ma ana koraki aika raoiroi aika reebu, ba E na motiki taekaia aomata ni kabaneia, ao E na kabuakakaia akana aki tangira te Atua ni kabaneia i bukin aia makuri aika bubuaka ni kabane, akana a karaoi n aki tangira te Atua, ao i bukin aia taeka aika kananomaraki aika a bukinna iai taani bure aika aki tangira te Atua.” (Iuta 14, 15) A na kakoroaki bukin taeka akanne n Aremaketon. (Te Kaotioti 16:14, 16) Ma, ti kakoauaa raoi bwa a rangi ni mwaiti “taani bure aika aki tangira te Atua” n ana bong Enoka, ake a ongora n ana taetae ni burabeti Enoka ma te nano n un. Ai bati ra ana tangira Iehova, ngke e a uota nako te burabeti man kammarakana!

Tera Are E Kakorakoraa Enoka n Nakonakona ma te Atua?

12. Tera te bwai are e kaokoro iai Enoka ma aomata ake n ana tai?

¹² N te oo-n-aroka are i Eten ngkoa, ao a ongeaba Atam ao Nei Ewa iroun Tatan, ao e karitei Atam nakon Iehova. (Karikani Bwaai 3:1-6) E kaokoro anuan maiun natiia te mwaane are Abera ma ngaiia, ao e mutiakinaki iroun Iehova. (Karikani Bwaai 4:3, 4) Ma e kananokawaki, bwa a mwaiti riki natin Atam aika a aki katotonga Abera. Ma e ngae n anne, ao Enoka are e bungiaki tebubua te ririki imwina riki, e boni katotongnga. Tera kaokoron Enoka ma kanoan Atam aika mwaiti? E kaekaa te titiraki anne te abotoro Bauro ngke e korea ae kangai: “Bon te onimaki are e uotaki nako Enoka iai, ba e aonga n aki mate; ao e aki manga noraki, ba e uotia nako te Atua. I main ana tai ni uotaki nako, ao e a kamani kaotaki ba e kukurei te Atua irouna.” (Ebera 11:5, BK) Enoka bon temanna mai buakoia [Kristian rimoa] ‘aika taani kakoaua aika uanao n aron te nang,’ ake a a tia n riki bwa banna ni katoto aika rangi n tamaroa ibukin te onimaki. (Ebera 12:1) Bon te onimaki are e kaira Enoka bwa e na nanomwaaka ni kaakaraoi aroaro aika raraoi, i nanon ana ririki ni maiu ae raka i aon 300, ae titeboo ma tenua okiokin abwakin maiuia angiia mai buakora ni boong aikai!

13. Te aeka n onimaki raa are iai iroun Enoka?

¹³ E kabwarabwaraa Bauro taekan ana onimaki Enoka ao taani kakoaua riki tabeman ngke e korea ae kangai: “Te onimaki bon te aki-nanokokoraki nakoni baika kaantaningaki, ae kakoauani baika aki noraki.” (Ebera 11:1) Eng, te onimaki bon te kaantaninga ae nene, ae boto i aon te aki-nanokokoraki bwa a na boni koro bukin bwaai aika ti kaantaningai. E irekereke aei ma te kaantaninga ae rangi n nene, n te aro are e a rotaki iai arora ni kaatuui baika moani kakawaki ni maiura. Bon te aeka n onimaki anne are e kaira Enoka bwa e na nakonako ma te Atua, e ngae ngke a aki karaoa anne aomata n taai akekei.

14. Tao e boto ana onimaki Enoka i aon te atatai raa?

¹⁴ E boto te onimaki ni koaua i aon te atatai ae eti. Tera ana atatai Enoka? (I-Rom 10:14, 17; 1 Timoteo 2:4) Akea te nanououa bwa e bae n atai bwaai ake a riki ngkoa i Eten. Tao e a tia naba n ongo bwa tera aron te maiu n te oo-n-aroka are i Eten, are tao e bon teimatoa naba n iai, ma e a tuukaki rinia aomata iai. (Karikani Bwaai 3:23, 24) Ao e ataa naba ana kaantaninga te Atua are a na kaona te aba ana kariki Atam ao a na karaoa te aonnaba aei ni kabane bwa te Baretaiti n aron are boni moani karikana. (Karikani Bwaai 1:28) Irarikin anne, e rangi ni kakawaki iroun Enoka ana berita Iehova ibukin karikan te Kariki are e na kaikoaka atun Tatan ao ni kaoki mwin ana kewe ake e rotaki buaka te aba iai. (Karikani Bwaai 3:15) Te koaua bwa a kawakinaki n te boki ae Iuta ana taetae ni burabeti Enoka aika kairaki koreaia, are e taekina iai kamaunan ana kariki Tatan. Kioina ngkai iai ana onimaki Enoka, ti ataia iai bwa e taromauria Iehova are “bon te tia kabo aia onimaki akana kakorakoraia n ukoukoria.” (Ebera 11:6) Mangaia are, e ngae ngke e aki bane n reke iroun Enoka te atatai ae reke iroura ngkai, ma ana atatai ngkekei e rangi n tau ibukin katean aan ana onimaki ae nene. E teimatoa ni kakaonimaki n taai ake a karuanikai ibukin ana onimaki.

Kakairi n Ana Katoto Enoka

15, 16. Ti na kanga ni kakairi ni maiun Enoka?

¹⁵ Kioina ngkai titeboo nanora ma Enoka, ae te kani kakukureia Iehova n taai aika karuanikai, ti bon riai ni katotonga Enoka. Ti kainnanoa karekean te atatai ae eti ibukin Iehova ma ana kaantaninga, ao maiuakinana. Ma e bati riki ae ti kainnanoia. Ti riai ni kariaia bwa e na kairaki maiura n te atatai anne. (Taian Areru 119:101; 2 Betero 1:19) Ti riai ni kairiraki n ana iango te Atua ao ni kekeiaki n taai nako ni kakukureia, n ara iango ni kabane ao n ara mwakuri nako.

¹⁶ E aki taekinaki bwa antai riki raon Enoka n toro iroun Iehova, ma e teretere bwa bon tii ngaia ke temanna mai buakoia aika tii tabeman. E rangi n uarereke naba ara botaki ni kabotauaki ma buburan te aonnaba, ma tiaki nanona bwa e na bwara nanora iai. E na boni boutokaira Iehova n aki ongeia bwa antai aika a kaaitaraira. (I-Rom 8:31) E ninikoria Enoka ni kauring ibukin kamaunaaia aomata aika a aki-tangira te Atua. Ti ninikoria naba ngaira ngkai ti uarongorongoa “euangkerion uean te Atua aei,” n aki ongei taiani kakaniko, karitei, ao bwainikirinara. (Mataio 24:14) E aki bati ana ririki Enoka n aroia aomata ake n ana tai, ao akea naba ana kaantaninga ae raoiroi ibukin te aonnaba. E a tia ni katurua ana iango n te bwai ae rangi ni kakawaki riki. (Ebera 11:10, 35) Ngaira naba, ti a tia ni katurui ara iango i aon kakoroan bukin ana kaantaninga Iehova. Mangaia are ti na aki kabanei nanora nakon tangiran bwain te aonnaba. (1 I-Korinto 7:31) Ma n onean mwin anne, ti na kabonganai korakorara ao kaubwaira n te beku ibukin Iehova.

17. Tera te atatai ae iai iroura ao akea iroun Enoka, mangaia are tera ae ti riai ni karaoia?

¹⁷ E kakoauaa raoi Enoka bwa e na kaoti te Kariki are e beritanna te Atua n ana tai Iehova are e a tia n namatia. E a tia ni kaania ngkai 2,000 te ririki imwin kaotin te Kariki are Iesu Kristo, ma katauraoan te karea ni kaboomwi irouna, ao kaukan te kawai ibukin karekean te maiu are e aki toki, ibukira ao ibukia naba taani kakoaua rimoa ake a kakaonimaki n aron Enoka. E a tia ngkai te Kariki anne ni kaueaki n Ana Tautaeka n Uea te Atua, ao ni karenakoa Tatan mai karawa nakon te aonnaba aei, ao ti a nora mwina n te rawawata ae ti a otabwaniniaki iai. (Te Kaotioti 12:12) Eng, e rangi ni mwaiti riki te atatai ae ti kona ni karekea ngkai, nakon are e kona n reke iroun Enoka. A bia bane n nene ara onimaki n aron Enoka. Ti bia karaoi bwaai ni kabane, ni kaineti ma ara koaua are a na boni koro bukin ana berita te Atua. Ti bia katotonga Enoka, n nakonako ma te Atua, e ngae ngkai ti a mena i nanon taai aika karuanikai.

[Kabwarabwara ae nano]

Ko na Kanga ni Kaeka?

• Tera ae nanonaki n te nakonako ma te Atua?

• Bukin tera ngkai te nakonako ma te Atua bon te maiu ae te kabanea n tamaroa?

• Tera are e kaira Enoka bwa e na nakonako ma te Atua, n aki ongei taai aika karuanikai?

• Ti na kanga ni kakairi iroun Enoka?

[Taamnei n iteraniba 25]

“E nakonako Enoka ma te Atua,” n te onimaki

[Taamnei n iteraniba 26]

Ti kakoauaa raoi bwa a na boni bane ni koro bukin ana berita Iehova

[Picture Credit Line n iteraniba 23]

Woman, far right: FAO photo/B. Imevbore; collapsing building: San Hong R-C Picture Company