Ninikorian Ieoiata

Iai natin Ietebera ae te aine ae arana Atariia, ae e katotonga raoi tinana ae buakaka. E mare Atariia ma uean Iuta. Ngke e mate buuna, ao e a uea natina te mwaane. Ma ngke e mate natina aei ao e a karikia naba neiei i bon irouna bwa te tia tautaeka i Iuta. Imwina, e kataia ni kamauna te utu n uea anne ni kabane, n arona ni kamateia ake a kona n riki bwa taan tautaeka. E boni kamateia naba tibuna mwaane. A bane ni maakua aomata.

E ataia te Ibonga ae Rietata ae Ieoiata ma buuna ae Ioetieba ae e rangi ni buakaka te bwai ae e karaoia Atariia. Ngaia are a karuanikaia maiuia ni karabaa temanna tibun Atariia te mwaane, ae te merimeri ae arana Ioati. A kaikawaa te teei aei n te tembora.

Ngke ai itiua ana ririki Ioati, e botiia mataniwi ni kabane Ieoiata ao tibun Rewi ao e taku nakoia: ‘Kam na tantani ni mataroan nako te tembora ao tai kariaia temanna bwa e na rin.’ Imwina ao Ieoiata e katokaa te baunuea i aon atun Ioati ao e kaueaa i aon Iuta. A takarua ni kangai kaain Iuta: “E na abwabwaki maiun te uea!”

E ongo karongoaaia aomata te Ueannaine ae Atariia ao e a biri nakon te tembora. Ngke e nora te uea ae boou, ao e takarua ni kangai: “Kam karitei! Kam karitei!” A taua te ueannaine ae buakaka aei mataniwi ma ni kairianako, ao a kamatea. Ma tera aron aia mwakuri aika bubuaka aomata imwini kairaia iroun neiei?

E buoka te natannaomata aei Ieoiata bwa a na karaoa aia berita ma Iehova bwa a na taromauria n tii Ngaia. E tua nakoia aomata Ieoiata bwa a na urua ana tembora Baara ao ni kamaeinikuni bouannanti. E rineiia ibonga ao tibun Rewi bwa a na mwakuri n te tembora bwa a aonga ni manga taromauri iai aomata. E kateirakeia taan teiakina te mataroa bwa a na tantani n te tembora bwa e aonga n aki rin iai ane e kamwara. Imwin anne ao Ieoiata ma mataniwi, a kaira Ioati nakon te baareti ao ni katokaa i aon te kaintokanuea. A kimwareirei kaain Iuta bwa a a kona ni beku ibukin Iehova, ao a a kainaomataaki mairoun Atariia ae buakaka ao man taromauriani Baara. Ko noria ae a buokaki aomata aika bati man ninikorian Ieoiata?