Kabwarabwaraani Mwakoro 9

Ti reireiaki n te mwakoro aei taekaia rooro n rikirake, burabeti, ao ueea ake a kaotiota onimakinan Iehova n te aro ae rianako. Iai te teinnaine ae uarereke ae tibun Iteraera i Turia, ae e kakoauaa bwa e kona ana burabeti Iehova ni katoka aorakin Naaman. E onimakina raoi Iehova te burabeti ae Eritai bwa e kona ni kamanoa man aia taanga ni buaka taani kairiribai. E karuanikaia maiuna te Ibonga ae Rietata ae Ieoiata ni kamanoa te teei ae Ioati mairoun tibuna te aine ae buakaka ae Atariia. E onimakina Iehova te Uea ae Etekia bwa e na boni kamaiua Ierutarem, ao e aki maaka aia taeka ni kakamaaku I-Aturia. E kamauna Iotia taromauriani bouannanti man te aba, e onobwaia te tembora, ao e kaoka te natannaomata nakon te taromauri ae koaua.