MOANAKIN TE MARORO
REIREI 2
Taetae n Aron ae Bon te Maroro
Te boto n reirei: “Ai raoiroira te taeka ae taekinaki n te tai ae riai!”—TaeRab. 15:23.
Te Baere E Karaoia Biribo
1. Mataku n te TAAMNEI, ke wareka Mwakuri 8:30, 31. Imwina ao nori titiraki aikai:
E kangaa Biribo ni moana te maroro?
Bukin tera ngkai ana moan tabeka aei e taetae iai n aron ae bon te maroro, ao ni karekea angan tibwaan te koaua ae boou nakon te I-Tiobia?
Tera Reireiara Mairouni Biribo?
2. Ngkana ti taetae n aron ae bon te maroro, e na kona riki te aomata n aki maaku ao e na kan ongora n ara rongorongo.
Kakairi Irouni Biribo
3. Kamatairikiko. E kona n otara baika bati mani moamoan te aomata ao teitein rabwatana. E taraa ni kan taetae ma ngkoe te aomata anne? Ko kona ni kaota te koaua teuana man te Baibara n arom n tii tabeka te titiraki aei, “Ko ataia ae . . . ?” Tai imanonoa te maroro ma te aomata ae e a bon aki kani maroro.
4. Taotaona nanom. Tai iangoia bwa ko riai ni waekoa n kaota te koaua man te Baibara. Tataningaa te tai ae angaraoi bwa ko aonga n taetae iai n aron ae bon te maroro. N tabetai ao e kona n nanonaki n aei, te maroro ma ngaia n rokom are imwina.
5. Tauraoi ni kaangaraoiko. E kona n rio te maroro ae ko aki kantaningaia. Ngaia are tauraoi n tibwaa te bwai teuana ae e manena nakon te aomata, e ngae naba ngkana ko nang maroroakina te bwai teuana man te Baibara, ae e kaokoro ma are ko a tia ni katauraoia.