Karaoiroa Iehova Ibukin Ana Mwakuri Aika Abwabwaki!
“E neboa te Atua tamneiu, . . . ba E karaoi baika ababaki nako iu Teuare mwaka.”—RUKA 1:46-49.
1. Baikara mwakuri aika abwabwaki ake ti riai ni karaoiroa iai Iehova?
E RIAI ni karaoiroaki Iehova ibukin ana mwakuri aika abwabwaki. E kangai te burabeti are Mote ngke e karakina rongorongon kamaiuan Iteraera mai Aikubita: “Matami a nora ana makuri ae ababaki Iehova are E karaoia.” (Te Tua-Kaua 11:1-7) N aron naba anne, ngke te anera ae Kabiriera e a katanoataa aron bungiakin Iesu iroun te ataeinaine ae Nei Maria, ao e kangai neierei: “E neboa te Atua tamneiu, . . . ba E karaoi baika ababaki nako iu Teuare mwaka.” (Ruka 1:46-49) Kioina ngkai kaain Ana Tia Kakoaua Iehova ngaira, ti neboa Iehova ibukin ana mwakuri aika abwabwaki, n aron kainaaomatakiia tibun Iteraera man te tautoronaki i Aikubita, ao te kakai ae rikin Natina ae tangiraki i nanon biroton te aomata.
2. (a) Tera nanon ‘ana iango te Atua ae mangkoangkoa,’ ni kaineti ma te botannaomata ae ongeaba? (b) Tera are e riki iroun Ioane n te abamwakoro are Batemoti?
2 A mwaiti ana mwakuri Iehova aika abwabwaki aika a reitaki ma ‘ana iango ma ngkoangkoa,’ are e na kakabwaiaia aomata aika ongeaba, rinanon te Mesia ao kairan te Tautaeka n Uea irouna. (I-Ebeto 3:8-13, Te Baibara ni Katorika [BK]) E a tabe ni kakoroaki bukin te iango anne teutana imwin teutana, ngke te unimwaane are te abotoro Ioane e a kariaiakaki bwa e na mataku rinanon te mataroa ni kaikonaki i karawa, ae e kaukaki nakoina. E ongo te bwana ae kaanga ai aron tangin te bu ae kangai: “Mai rierake, ao N na kaoti nako im baika na bon roko i mwini baikai.” (Te Kaotioti 4:1) I nanon ana tai ni kainaki iroun te tautaeka n Rom n te abamwakoro ae Batemoti “i bukin ana taeka te Atua ao i bukin naba ana kaotioti Iesu,” e a reke iroun Ioane ‘te kaotioti mairoun Iesu Kristo.’ Bwaai ake e nori ma n ongoraei te abotoro arei, a kaotaki iai bwaai aika mwaiti aika irekereke ma ana iango te Atua ma ngkoangkoa, ao e reke mai iai te oota n taamnei ao te kaungaunga ae bati, ibukia Kristian ni koaua ni kabaneia.—Te Kaotioti 1:1, 9, 10.
3. Antai aika a kaikonakaki irouia unimwaane ake 24 ake a noraki iroun Ioane n ana miitara?
3 Ngke e mataku Ioane rinanon te mataroa are kaukaki i karawa arei, ao e noriia unimwaane aika 24, ake a katekatekaki i aon kaintokanuea ao a baunueanaki n ai aroia uea. A bobaraki i matan te Atua ma ni kangai: “Atuara, Ko riai n anganaki te neboaki ma te karineaki ma te mwaka: ba Ko karaoi bwaai ni kabane, ao bon iai baikai i bukin nanom, ao a karaoaki iai.” (Te Kaotioti 4:11) Unimwaane aikai a tei ibukia Kristian ni kabane aika kabiraki ake a kautaki ma ni karietataki n aron are e berita te Atua nakoia. A kairaki bwa a na karaoiroa Iehova ibukin ana mwakuri aika abwabwaki ake a reitaki ma ana mwakuri ni karikibwai. Ti mimi naba ngkai ti nori bwaai aika a kakoauaa ‘mwaakan Iehova n arona n Atua ae akea moana ke tokina.’ (I-Rom 1:20) Ao ngkana e a bati riki reireiara ibukin Iehova, ao a nang reke ngkanne iroura bukina aika a mwaiti are a na kaotaki iai riain karaoiroana iroura ibukin ana mwakuri aika abwabwaki.
Tataekin Ana Mwakuri Iehova Aika Riai ni Kamoamoaki!
4, 5. Taekin aia katoto aomata n aron Tawita, ni karaoiroa Iehova.
4 Te tia areru are Tawita e karaoiroa te Atua ibukin Ana mwakuri aika abwabwaki. N aron anne, e anene ni kangai Tawita: “Kam na anenea karaoiroan Iehova, are maeka i Tion: kam na tataekin ana makuri i buakoia aomata. Ko na nanoangaai Iehova; Ko na tarataraa bainikirinau irouia ake a ribaai, Ngkoe ae Ko kateirakeai mani mataroan te mate; ba I aonga ni kaota karaoiroam ni kabanea: ni mataroan natin Tion te aine.” (Taian Areru 9:11, 13, 14) Ngke e a tia n angan natina are Toromon taamnein tein te tembora are e na kateaki, e neboa ma ni karaoiroa te Atua Tawita, ni kangai: “Iehova, am bwai te kakanato, ma te mwaka, ma te neboaki ma te tokanikai, ma te mimitong: . . . am bwai te uea, ao Ko neboaki ba te mataniwi i aoni bwaai ni kabane. . . . Ma ngaia aei, Atuara, ti katituaraoiko, ao ti kamoamoa aram ae neboaki.”—1 Rongorongo 29:10-13.
5 E kaokioka kaoara ke kaungaan nanora te Baibara—bwa ti na karaoiroa te Atua, n aron are e karaoia Tawita. A mwaiti taeka aika karaoiroa te Atua ake a kuneaki n te boki ae Taian Areru, ao tao iteran mwaitin areru aikai a kaantaningaki bwa a oteaki iroun Tawita. E aki toki ni karaoiroa ma ni kakaitau nakon Iehova. (Taian Areru 69:30) Irarikin anne, anene aika a kairaki koreaia iroun te Atua aika a oteaki iroun Tawita ao aomata tabeman a kamani kabonganaki ibukin karaoiroan Iehova.
6. Tera manenan Taian Areru ake a kairaki koreaia iroun te Atua nakoira?
6 Ai manena ra Taian Areru nakoia taan taromauria Iehova! Ngkana e roko nanora ni kani kaitaua te Atua ibukin ana mwakuri aika abwabwaki ake e karaoia ibukira, ti kona iai n iangoi taeka aika tamaroa ake a kuneaki n Taian Areru. N aron anne, ngkana ti uti n te ingabong, ti kona ni kairaki bwa ti na taekin taeka aika ai aron aikai: “Te bwai ae raoiroi te katituaraoa Iehova, ao te anenea karaoiroan aram, Ngkoe ae Ko Moa n Rietata: te kaotiota am atataiaomata n te ingabong, ao am kakaonimaki n te bong, . . . ba Ko kakukureiai, Iehova, n am makuri: N na kakatonga n aia makuri baim.” (Taian Areru 92:1-4) Ngkana ti tokanikai i aon te bwai ae tutuka rikirakera n te itera n taamnei, ti na bae ni kani kaota kukureira ao ara kaitau n te tataro, n aron naba are e karaoia te tia areru ngke e anene ni kangai: “Kaaraki, ti na anene nakon Iehova ni kimareirei: ti na kanene bwanara ni kukurei nakon te bwa ae rietata ae kamaiuara. Ti na roko i matana ma te katituaraoi, ti na kanene bwanara ni kukurei nako Ina n anene nako.”—Taian Areru 95:1, 2.
7. (a) Tera te bwai ae riai n ataaki ni kaineti ma anene aika mwaiti aika a anaaki irouia Kristian? (b) Tera bukina teuana ae ti riai ni moan taai n roko iai n taiani botaki ma n tiku ni karokoa bwaraia?
7 Ti aki toki ni kanenei bwanara n anene ni karaoiroa Iehova ni bobotakin te ekaretia, ruunga, ao bwabwaro. E riai n ataaki ae a mwaiti anene aikai aika a aanaki i aon iango ake a kairaki koreaia, ake a mena n te boki ae Taian Areru. Ai kukurei ra ngaira bwa iai iroura naba bokin taian anene n taai aikai aika kaunga ake a karaoiroa Iehova! Te anene ni karaoiroa te Atua bon bukina teuana ae ti riai ni moantaai n roko n ara botaki ma n tiku iai ni karokoa bwarana, bwa ti aonga ni buokanibwai ma raora n taromauri ni karaoiroa Iehova n te anene ao te tataro.
“Kam na Kamoamoa Iehova”!
8. Tera ae e kaotaki n te taeka ae “Areruia,” ao tera aron rairan te taeka anne n angiin te tai?
8 Karaoiroan Iehova e a kaotaki n te taeka ae “Areruia,” ae atongan te kibu-n-taeka n te taetae n Ebera ae n angiin te tai e rairaki bwa “Kam na kamoamoa Iaah.” N aron anne, ti kunea n Taian Areru 135:1-3, te kakao ae kamaiu aei: “Kam na kamoamoa Iehova. Kam na kamoamoa aran Iehova; Kamoamoaa, ngkami aika ana toro Iehova: aika kam tei i nanoni maneaban Iehova, i nanon oni maneaban Atuara. Kam na kamoamoa Iehova; ba E raoiroi Iehova: Anenea kamoamoan arana; ba e rerei.”
9. Tera ae kairira bwa ti na karaoiroa Iehova?
9 Ngkana ti iangoi ana mwakuri aika kamimi te Atua ni kaineti ma te karikibwai ao ana mwakuri nako ake e karaoi ibukira, nanora ni kani kakaitau nakoina a kairira bwa ti na karaoiroia. Ngkana ti iangoi kakai ake e karaoi Iehova rimoa ibukia ana aomata, nanora a kairira bwa ti na kamoamoaa taekana. Ao ngkana ti kaiangomwaakaira i aon taiani berita ibukin bwaai aika abwabwaki ake e na manga karaoi Iehova nakon taai aika a na roko, ao n arora anne ti kakaaea ara anga iai ae ti kona ni kaota nanora ni kakaitau ao ni kani kamoamoaa taekana.
10, 11. E na kanga maiura n riki bwa bukina naba teuana ae ti riai ni karaoiroa iai te Atua?
10 Ti riai naba ni karaoiroa Iaah ibukin maiura are ti anganaki. E anene ni kangai Tawita: “N na katituaraoiko [Iehova]; ba e kakamaku karaoau i Roum ao e kamimi naba: a kamimi am makuri; ao e bon ataia raoi tamneiu.” (Taian Areru 139:14) Eng, e ‘kamimi karaoakira’ irouna, ao ti anganaki naba bwaintangira aika kamimi n aron te noraba, te ongongo, ao te kona n iaiango. Tiaki te koaua ngkanne bwa ti na kaira maiura n te aro ae e na reke iai karaoiroan te tia Karikira? E kaota naba anne Bauro ngke e korea ae kangai: “Ngkana kam amarake, ao ngkana tao kam moi, ao ngkana kam karaoa te bwai teuana, ao kam na karaoi bwaai ni kabane i bukin neboakin te Atua.”—1 I-Korinto 10:31.
11 Ti na boni karaoi bwaai ni kabane i bukin neboakin Iehova ngkana ti bon tangiria ni koaua. E taku Iesu bwa bon te moan tua ae: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea, ao ni korakoram ni kabanea.” (Mareko 12:30; Te Tua-Kaua 6:5) Ti riai n tangira Iehova ma ni karaoiroia bwa te tia Karikira ao te tia Anga ‘bwaai n tituaraoi ni kabane aika raraoi.’ (Iakobo 1:17; Itaia 51:13; Mwakuri 17:28) Bwa arora ni kona n iaiango, n tangiri bwaai n taamnei, ao korakoran rabwatara—n ikotaki ma aroarora ao ara konabwai ni kabane—a bane n reke mairoun Iehova. Kioina ngkai te tia Karikira ngaia, ao e riai n tangiraki ma ni karaoiroaki iroura.
12. Tera am kaantaninga ibukin ana mwakuri Iehova aika abwabwaki, ao taeka ake a mena n Taian Areru 40:5?
12 Ana mwakuri aika kakannato Iehova ni kabane a anganira bukina aika mwaiti ae ti riai n tangiria iai ma ni karaoiroia! “Iehova, a bati am makuri aika kamimi aika Ko karaoi, ma nanom aika kaeti nako ira,” e anene Tawita. “A aki konaki ni baireaki ni warekaki nako Im. Ngkana I kani kaoti baikai ma n taekin, ao a maiti riki nakon aika konaki ni warekaki.” (Taian Areru 40:5) E aki kona Tawita ni karakini ana mwakuri Iehova aika kamimi ni kabane, ao ngaira naba ti aki kona ni karaoa anne. Ma ti bia karaoiroa te Atua n taai nako ngkana e a kaotaki nakoira ana mwakuri teuana ke teuana mai buakon ana mwakuri aika abwabwaki.
Mwakuri Aika Irekereke ma Ana Iango te Atua are Mangkoangkoa
13. Tera aron irekereken ara kaantaninga ma ana mwakuri te Atua aika abwabwaki?
13 Ara kaantaninga ibukin taai aika imwaira e a boto i aon mwakuri aika abwabwaki ma n riai ni kamoamoaki, aika a irekereke ma ana iango te Atua are mangkoangkoa. Imwin te karitei i Eten, Iehova e taekina te moan taetae ni burabeti ae raoiroi te kaantaninga iai. Ngke e taekina ana motikitaeka i aon te naeta, e kangai te Atua: “Ao N na kaki te kakaiwi i marenam ma te aine aei, ao i marenan am kariki ma ana kariki: e na kaikoaka atum, ao ane ko na kaikoaka bukini waena ngkoe.” (Karikani Bwaai 3:15) E a manga reitaki nako onimakinan ana Kariki te aine ae beritanaki i nanoia aomata aika kakaonimaki, imwin te tai are Iehova e karaoa te mwakuri ae abwabwaki ngke e kamaiua Noa ma ana utu man te Ieka are taabangaki n te aonnaba, ma ni kamauna te aonnaba ae buakaka. (2 Betero 2:5) Berita aika taetae ni burabetinaki nakoia taan onimaki n aroia Aberaam ma Tawita, a kaoti riki taekan bwaai ake e na karaoi Iehova rinanon te Kariki anne.—Karikani Bwaai 22:15-18; 2 Tamuera 7:12.
14. Tera te mwakuri ae te kabanea n raoiroi mai buakon ana mwakuri Iehova aika abwabwaki ibukin te botannaomata?
14 Kaotan aron Iehova ae moanibaan te raoiroi ni karaoi mwakuri aika abwabwaki ibukin te botannaomata, e a riki ngke e anga Natina ae ana rikitemanna—ae te Kariki ae beritanaki ae Iesu Kristo—bwa te karea ni kaboomwi. (Ioane 3:16; Mwakuri 2:29-36) Te kaboomwi anne e a kauka aron te manga raoiakinaki ma te Atua. (Mataio 20:28; I-Rom 5:11) Iehova e botiia moan aomata ake a raoiakinaki ma ngaiia i nanon te ekaretia ni Kristian are e kateaki ni Bentekota 33 C.E. N ana ibuobuoki te taamnei ae raoiroi, a a kabuta te euangkerio nakon taabo ake a kaan ao ake a raroa, ni kamataata aron maten ao manga-utin Iesu ni kauka karekean kakabwaia aika akea tokia i aan ana kairiri ana Tautaeka n Uea te Atua mai karawa, nakoia aomata aika ongeaba.
15. E a kanga Iehova n tia ni karaoi mwakuri aika kamimi n ara bong aikai?
15 N ara tai aei, Iehova e a tia ni mwakuri n te aro ae moanibaan te raoiroi n ikotiia nikiraia Kristian aika kabiraki. E a taonaki moa angin te kamaunanakoaki, bwa a aonga ni kanikinaeaki moa nikiraia kaain te koraki ake 144,000 mwaitiia, ake a na tautaeka ma Kristo i karawa. (Te Kaotioti 7:1-4; 20:6) Te Atua e a tia ni bairea kainaaomatakiia Kristian ake a kabiraki, man te tautoronaki n taamnei mairoun “Baburon ae Kakanato,” ae te botaki n Aro ae kewe ae katobibia te aonnaba. (Te Kaotioti 17:1-5) Kainaaomatakiia n 1919 ao kamanoaia iroun te Atua man te tai arei ni karokoa ngkai, e a buokiia kaain te nikira aika kabiraki bwa a na karaoa te mwakuri ra? Kaotaan te aba rinanon karaoan te kabanea ni kaotioti imwain te tai are Iehova e na katoka ana waaki ae buakaka Tatan n te “rawawata are korakora” ae nang waekoa rokona ngkai.”—Mataio 24:21; Taniera 12:3; Te Kaotioti 7:14.
16. Tera ae e a tabe n riki ngkai ni kaineti ma tataekinan te Tautaeka n Uea ni katobibia te aonnaba?
16 Ana Tia Kakoaua Iehova aika kabiraki a boni kaira tataekinan rongorongon te Tautaeka n Uea ni katobibia te aonnaba, ma te ingainga n nano. Ibukin anne, a rikirake mwaitiia “tiibu tabemang” ake a a riki bwa taan taromauria Iehova ngkai. (Ioane 10:16) Ti kimwareirei ngkai e tuai man toki aia tai aomata aika nimamannei ni kona n riki bwa raora ni karaoiroa Iehova. Te koraki ake a butimwaea te kakao ae “mai,” a na kona ni kamaiuaki man te rawawata are korakora, ma kaantaningan karaoiroan Iehova n aki totoki.—Te Kaotioti 22:17.
Ngaa ma Ngaa Mwaitiia Aomata Aika A Ubaraa te Taromauri ni Koaua
17. (a) E a kanga Iehova ni karaoi mwakuri aika abwabwaki ni kaineti ma ara mwakuri n tataekina te rongorongo? (b) E a kanga ni kakoroaki bukin Tekaria 8:23?
17 Iehova e a tabe ngkai ni karaoi mwakuri aika abwabwaki aika a riai ni kamoamoaki, ni kaineti ma ara mwakuri n tataekina te rongorongo. (Mareko 13:10) I nanon ririki ake a tibwa nako, e a tia ni ‘kauki mataroa aika abwabwaki nakon te mwakuri.’ (1 I-Korinto 16:9) E a reke iai kabutan te euangkerio rinanon aaba aika rangi n rababa ike e aki kona n tataekinaki te rongorongo iai rimoa, ibukin aia waaki taiani kairiribai. A mwaiti aomata ake a mena n te roo ni kaineti ma bwaai n taamnei rimoa, ake a tabe ngkai ni butimwaea te kakao nakon taromaurian Iehova. A tabe ni kakoroi bukin taetae ni burabeti aikai: “E kangai ana taeka Iehova Tabaota: Ni boong akekei ao a na taua ririn temanna tengaun te aomata mai buakon taetaeia botanaomata ni kabane, eng, a na bon taua ririn temanna ae te I-Iutaia, ao a na kangai, Ti na airi ma ngkami, ba ti ongo ba E memena te Atua i roumi.” (Tekaria 8:23) Te koraki ake a kataetaeaki irouia “tengaun te aomata,” bon taekaia I-Iutaia n taamnei, ake nikiraia Kristian ake a kabiraki ake a maiu ngkai. Kioina ngkai te nambwa ae tebwina e kona n tei ibukin te bwai ae bwanin ae irekereke ma te aonnaba, “aomata ake tengaun” ngkanne, a tei ibukin te “koraki ae uanao” ake a kairaki bwa a na iraorao ma “ana Iteraera te Atua,” ao a riki n ‘tii te nanaina’ ma ngaiia. (Te Kaotioti 7:9, 10; I-Karatia 6:16) Ai kimwareirei ra norakiia aomata aika rangi ni mwaiti aika a katiteuanaki ni bebeku ma n taromauria Iehova ae te Atua!
18, 19. Baikara koaua aika a kaotia bwa e a tabe ngkai Iehova ni kakabwaia te mwakuri n tataekina te rongorongo?
18 Moan te kukurei ngaira ngkai bubua ma bubua ni ngaa mwaitiia aomata ake a tabe ni butimwaea te taromauri ni koaua n aaba ngkoa ake a rangi n tautoronaki irouia Aaro aika kewe n te aro are e aikoa kona ni kaantaningaki bwa a na boni butimwaea te euangkerio kaaina. Nora te boki ae te Yearbook of Jehovah’s Witnesses ae boou, ma n nori aaba aika a ribootinaki iai taan uarongorongoa te Tautaeka n Uea n te mwaiti ae mena i marenan 100,000 nakon 1,000,000. Bon te bwai ni kakoaua ae korakora aei ae kaotia bwa te mwakuri n tataekina te Tautaeka n Uea e a tabe ni kakabwaiaki iroun Iehova.—Taeka N Rabakau 10:22.
19 Kioina ngkai ana aomata Iehova ngaira, ti karaoiroa ma ni kaitaua Tamara are i karawa ngkai e a tia ni karaoa maiura bwa e na rangi ni manena, ao ngkai e anganira naba te mwakuri ae uaana ae irekereke ma ara beku irouna ao te kaantaninga ae raoiroi ibukin taai aika imwaira. A ingainga nanora ngkai ni kakaantaninga kakoroan bukin ana berita te Atua ni kabane, ao ti kamatoai nanora bwa ti na ‘teimatoa ni mena n ana tangira te Atua ma ni kakaantaninga te maiu are aki toki.’ (Iuta 20, 21) Ai kukurei ra ngaira ngkai ti a noria bwa te koraki ae uanao ae e kaainaki irouia aomata aika a karaoiroa te Atua, aika a raka i aon 6,000,000 mwaitiia! N ana kakabwaia Iehova, kaain te nikira aika kabiraki n ikotaki ma raoraoia aika tiibu tabemang a memena n ekaretia aika 91,000 tabun n aaba aika 235 mwaitiia. Ti a bane n nabeaki raoi n te amwarake n taamnei imwin aia mwakuri korakora kaain “te toro ae kakaonimaki ae wanawana.” (Mataio 24:45) Te botaki ae tautaekanaki iroun te Atua ae e a tabe ni waaki nako ma ni karaoa te tararua n te tangira, man tabe ni bairei mwakuri aika irekereke ma te Tautaeka n Uea rinanon mwaangan aia aobiti Ana Tia Kakoaua Iehova aika 110 mwaitiia. Ti kaitaua Iehova ngkai e a tia ni kaira nanoia ana aomata bwa a na ‘neboia ma aia bwai aika kakawaki.’ (Taeka N Rabakau 3:9, 10) Ibukin anne e a reitaki nako ara mwakuri n tataekina te rongorongo ni katobibia te aonnaba, ao a kateaki taabo ni boreeti, auti ni Beta-era ao auti ni mitinare, Maneaba n Uea ao Taabo ni Botaki, n aron ae kainnanoaki.
20. Tera aron rotakira ae riai ngkai ti a tabe n iaiangoi ana mwakuri Iehova aika abwabwaki ake a riai ni kamoamoaki?
20 Ti aki kona n taekin ana mwakuri ni kabane Tamara are i karawa aika abwabwaki ma n riai ni kamoamoaki. Ma iai te aomata ae raoiroi nanona ae e kona n rawa ni boota bwanana ma aomata aika mwaiti aika a tabe ni karaoiroa Iehova ngkai? Bon akea! Mangaia are a bia bane taan tangira te Atua ni kakatonga ma ni kimwareirei ni kangai: “Kam na kamoamoa Iehova. Kam na kamoamoa Iehova mai karawa: Kam na kamoamoaa n taabo aika rietata. Kam na kamoamoaa, ngkami aika ana anera ni kabaneingkami: . . . ma rorobuaka ma ateiaine; ma unimwane ma ataei: A na kamoamoa aran Iehova; ba ti arana ae neboaki: E mena mimitongina i aon aonaba ma karawa.” (Taian Areru 148:1, 2, 12, 13) Eng, ngkai ao n aki totoki, ti bia karaoiroa Iehova ibukin ana mwakuri aika abwabwaki!
Ko na Kanga ni Kaeka?
• Tera ana mwakuri Iehova tabeua aika a riai ni kamoamoaaki?
• Bukin tera ngkai ko namakina ae ko riai ni karaoiroa Iehova?
• Tera aron irekereken ara kaantaninga ma ana mwakuri te Atua aika abwabwaki?
• Tera aron Iehova ni karaoi mwakuri aika riai ni kamoamoaki ni kaineti ma te mwakuri n tataekina te Tautaeka n Uea?
[Taamnei n iteraniba]
Ko iriri anaakin taian anene aika a karaoiroa Iehova ma nanom ni koaua?
[Taamnei n iteraniba]
Ti kimwareirei ngkai e teimatoa n uki te kawai bwa a kona riki iai aomata aika nimamannei n airi ma ngaira ni karaoiroa Iehova