Tera Ara Iango Ibukia Aomata Ngkai E A Uakaan Ana Bong Iehova?

“E aki baenikai te Uea n ana taeka n akoi . . . ma E taotaona nanona nako imi, n aki tangira maten temanna, ma a na bane aomata n rairi nanoia.”​—2 BETERO 3:9.

1, 2. (a) Tera ana iango Iehova ibukia aomata ni boong aikai? (b) Baikara titiraki aika ti kona n titirakinira iai?

IAI mwiokoaia ana toro Iehova bwa a na “kakiritiania botanaomata ni kabaneia.” (Mataio 28:19) Ngkai ti tabe ni kakoroa nanon te mwioko aei, ao ni kariariaa naba “ana bong Iehova ae kakanato,” ti riai ngkanne n iangoia aomata n aron iangoakia iroun Iehova. (Tebania 1:14) Ma tera ana iango Iehova ibukia aomata? E taku te abotoro Betero: “E aki baenikai te Uea n ana taeka n akoi n ai aroia tabemang aika atonga te baenikai; ma E taotaona nanona nako imi, n aki tangira maten temanna, ma a na bane aomata n rairi nanoia.” (2 Betero 3:9) E iangoia aomata te Atua bwa a boni kona n rairi nanoia n tatabemania nako. E “tangiriia aomata ni kabaneia ba a na kamaiuaki, ma ni karekea atakin te koaua.” (1 Timoteo 2:4) Ai kukurei ra Iehova ngkana iai temanna ae “rairaki mani kawaina ma ni maiu.”​—Etekiera 33:11.

² Te koaua bwa ti uataboa ana iango Iehova ibukia aomata? Ti kakairi naba irouna n iangoia bwa a kona n riki bwa “tiibun ana tawana n uteute,” aomata n tatabemania nako man reeti ni kabane ao natannaomata? (Taian Areru 100:3; Mwakuri 10:34, 35) Ti na iangoi ngkai katoto aika uoua aika kaota riain reken ana kaantaninga Iehova iroura. N itera aika uoua aikai, e a bon rangi n uakaan te kamaunanakoaki iai, ao a a kaman atai baika a na riki ana toro Iehova. E rangi ni kakawaki iaiangoan katoto aikai kioina ngkai ti a tabe ni kariariaa ana bong Iehova ae kakannato.

Titeboo Ana Iango Aberaam ma Iehova

3. Tera ana iango Iehova ibukia kaain Totom ma Komora?

³ Iai irekereken te moani katoto ma te baatua are kakaonimaki are Aberaam ao kaawa aika bubuaka aika Totom ma Komora. Ngke e ongo Iehova “kabuakakaia Totom ma Komora,” ao e aki kamaunai kaawa akekei ma kaaia ni kabane ngkekei naba, ma e karaoa moa ana tutuo. (Karikani Bwaai 18:20, 21) A kanakoaki uoman anera nako Totom, ao a mena n ana auti te mwaane ae raoiroi ae Rota. N tairikin te bong are a roko iai anera aikai, ao “aomatan te kawa, . . . ake rorobuaka ma unimwane, ake kaaina ni kabaneia man taabo nako a otabaninia te auti arei,” bwa a kani wene ni bure ma anera aikai. E teretere raoi aron aia mwakuri kaain te kaawa aei bwa a boni kammaira, ao e kakoauaki bwa a riai ni kamaunaki. Ma e ngae n anne, ao a titirakina Rota anera aikai ni kangai: “Iai riki am bu ikai ke akea? te mwane ae mare ma natim te aine, ao natim mwaane, ma natim aine, ma am bu ni kabaneia aika mena n te kawa; kaotinakoia mai nanon te tabo aei.” E kauka te kawai ibukini kamaiuaia kaain te kaawa aei Iehova, ma n tokin te karaki bon tii Rota ma natina aine aika uoman aika kamaiuaki.​—Karikani Bwaai 19:4, 5, 12, 16, 23-​26.

4, 5. Bukin tera ngke e bubutii Aberaam ibukiia kaain Totom, ao titeboo ana iango iai ma Iehova ke tiaki?

⁴ Ao ngkai, ti na oki rikaaki moa nakon te tai are e kaota iai nanona Iehova bwa e kan tuoi kaawa ake Totom ma Komora. Bon aei ngkanne te tai are e a bubutii iai Aberaam ni kangai: “Ngkana tao iai nimangaun aomata aika raoiroi i nanon te kawa arei: Ko na kamauna te tabo arei ao Ko na aki katikua i bukiia aomata ake a raoiroi ake nimangaun ake a mena i nanona ke Ko na aki? E bia mena i kiraroa mai Roum te karaoa ae aron aei, ae te uaia ni kamateia ake a raoiroi ma ake a buakaka, ba a na ti te bo ake a raoiroi ma ake a buakaka; e bia mena i kiraroa te aro anne mai Roum: tiaki E na karaoa ae riai te tia Motiki taekaia kaain aonaba ni bane?” E kauoua okiokiran kamanenan te taeka ae “e bia mena i kiraroa te aro anne mai Roum,” Aberaam. N aron ana namakin Aberaam, e ataia bwa e bon aki kona Iehova n uaia ni kamaunaia aomata aika raoiroi ao aika buakaka. Ngke e taekinna Iehova bwa e aki kona ni kamaunaa Totom “ngkana tao iai nimangaun aomata aika raoiroi i nanon te kawa,” ao Aberaam e a kakekerikaka te mwaiti ni karokoa ae e a roko n tii tengaun te aomata.​—Karikani Bwaai 18:22-​33.

⁵ E na kona ni mutiakina ana bubutii Aberaam Iehova ngke arona bwa e aki boraoi ma ana iango? E na bon aki. Ngkai bon “raon te Atua” Aberaam, e boni bae ngkanne n atai ana iango, ao e uataboa naba Ana kaantaninga. (Iakobo 2:23) E tauraoi Iehova n rinanon ana bubutii Aberaam ngke e katanrikaaka ana iango ibukin Totom ma Komora. Bukin tera? Ibukina bwa Tamara are i karawa e “aki tangira maten temanna, ma a na bane aomata n rairi nanoia.”

E Korakora Okoron Ana Iango Iona Ibukia Aomata

6. Tera aroia kaain Ninewe ni kaineti ma te rongorongo are e tataekinna Iona?

⁶ Ngkai, ti nang manga iangoa te kauoua ni katoto are rongorongon Iona. N te katoto aei, e a rineaki te kaawa are Ninewe bwa e na kamaunaki. E tuangaki te burabeti ae Iona bwa e na nako n taekinna nakoia kaain Ninewe ae ‘e a aerake i matan Iehova aia buakaka.’ (Iona 1:2) Bon te kaawa ae abwabwaki Ninewe n ikotaki naba ma kaawana tabeua ake a maekanaki irouia taani mwakuri, ae raroana e kainnanoaki “tenibong te bong n te nakonako iai.” Ngke e a manga kaeta nanona Iona, e a ongeaba, ao e a nako Ninewe ao e a tatakarua ni kangai: “Ai ti angaun te bong, ma e a uruaki Ninewe.” Ibukin anne, “a ira nanon ana taeka te Atua kaain Ninewe; ao a takaruaea te aki-mamatam, ma ni karini kunnikai aika raeroba.” E ira naba buakon te raraoma aei, uean Ninewe.​—Iona 3:1-6.

7. Tera ana iango Iehova ibukia kaain Ninewe ake a raraoma?

⁷ Ai okoro ra aroia kaain Totom ni butimwaea te rongorongo ae raoiroi ma aroia kaain Ninewe! Tera ana iango Iehova ibukia kaain Ninewe ake a raraoma? E taekinaki ae kangai n Iona 3:10: “E bita nanona te Atua n nanoanga i bukin te kai, are E taku ba E na karekea i rouia; ao E aki karaoia.” E “bita nanona” Iehova n te aro are e a aki kamaunaia kaain Ninewe, kioina ngke a bitaki man kawaiia aika bubuaka. A aki bibitaki ana kaetieti Iehova, ma e bita ana baire ni karekekai, kioina ngke e noriia kaain Ninewe bwa a raraoma.​—Maraki 3:6.

8. Bukin tera ngke e moa noku Iona?

⁸ Ngke e a ataia Iona bwa e nang aki kamaunaki Ninewe, e iangoi bwaai aikai n aron iangoakia iroun Iehova? E aki, bwa ti tuangaki ae kangai: “E bati n riba te aro anne Iona, ao e un.” Tera riki are e karaoia Iona? E koreaki ae kangai: “E tataro nakon Iehova, ao e kangai, I butiko, Iehova, tiaki bon au taeka aei, ngke I boni mena i abau? Ma ngaia are I barekai ni kani biri nako Taretiti: ba I ataiko ba bon te Atua ae Ko akoi, ae Ko on n te nanoanga, ae Ko iremwe n un, ae Ko bati n atataiaomata, ao Ko bita nanom n nanoanga i bukin te kai.” (Iona 4:1, 2) E atai aroaron nako Iehova, Iona. Ma e ngae n anne, e moa noku te burabeti aei, ao e a aki kan uataboa ana iango Iehova ibukia aomata aika raraoma i Ninewe.

9, 10. (a) Tera reireian Iona are e katauraoia Iehova? (b) Ti kanga ni kakoauaa bwa e a manga iangoia kaain Ninewe Iona n aron iangoakia iroun Iehova?

⁹ E oti nako Iona mai Ninewe, ao e karaoa te umwa n rianna iai, ao e tekateka i aan nuna “ni mataku ba tera ae na roko n te kawa.” E karikirakea te aroka ae te bangke Iehova bwa e aonga n tan Iona n nuna. Ma e ngae n anne, ao n te bong are imwina, e a manga rai te aroka aei. Ngke e un Iona n te bwai ae riki aei, ao e tuangnga Iehova ni kangai: “Ko nanoangaea te bangke, . . . ao tiaki e riai ba N na nanoangaea Ninewe, are te kawa are ababaki; are a mena iai aomata aika maiti riki nakon tekuri ma uarebu aika aki atai ataiia ma maingia; ao a bati naba maan?” (Iona 4:5-​11) Ai raoiroi ra te reirei aei ibukin Iona ni kaineti ma ana iango Iehova ibukia aomata!

¹⁰ E aki koreaki n te Baibara ana kaeka Iona ibukin nanoangaeakia kaain Ninewe. Ma, e teretere raoi bwa e boni manga kaeta ana iango te burabeti aei ni kaineti ma raraomaia kaain Ninewe. Ti kona ni kakoauaa tokin te rongorongo anne, kioina ngkai e a tia n rineaki teuaei iroun Iehova bwa e na korea bokina ae kairaki koreana iroun taamneina.

Tera Ngkoe Am Iango?

11. E na tera ana iango Aberaam ni kaineti ma aomata aika a maiu ni boong aikai?

¹¹ Ni boong aikai, iai naba te kamaunanakoaki teuana riki ae ti na kaaitara ma ngaia, ae kaineti ma te waaki ae buakaka ae ngkai, ngkana e roko ana bong Iehova ae kakannato. (Ruka 17:26-​30; I-Karatia 1:4; 2 Betero 3:10) E na tera ana iango Aberaam ni kaineti ma aomata n te aonnaba ae e a kaan uruana aei, ngke arona bwa e maiu naba ngkai? E na boni bae ni mutiakinia te koraki ake a tuai n ongo taekan “euangkerion uean te Atua.” (Mataio 24:14) E kaokioka ana bubutii Aberaam nakon te Atua ibukiia aomata aika raoiroi ake a mena ngkoa i Totom. Ti kona ni mutiakinia aomata ake a kona ni kitana aron te aonnaba ae mena i aan ana kairiri Tatan, ngkana a anganaki aia tai n rairi nanoia ao n toro iroun te Atua?​—1 Ioane 5:19; Te Kaotioti 18:2-4.

12. Bukin tera bwa e bebete iroura karaoan te aroaro are e a tia ni karaoia ngkoa Iona, nakoia aomata aika ti kaitiboo ma ngaiia n ara mwakuri ni minita, ao tera ae ti kona ni karaoia ibukin aei?

¹² E riai n ingainga te nano ibukin tokin te buakaka. (Abakuka 1:2, 3) Ma e ngae n anne, ao e bon rangi ni kai reke naba te aeka n iango are iroun Iona, are te aki kani mutiakinia aomata aika kona n rairi nanoia. E rangi ni koaua aei, bwa ti kona n iango n aron aei, ngkana ti kaitiboo ma aomata aika aki kuba, a ribaira, ke aika kauntaeka nakoira ngkana ti taekina rongorongon te Tautaeka n Uea n auti nako. Ti kona naba n tarariaoia te koraki aika e na ikotiia Iehova mai buakon te waaki ae buakaka ae ngkai. (I-Rom 2:4) Ngkana ti tuoi raoi nanora ao ti noria bwa iai iroura tamrurun ana moan iango Iona ngkoa nakoia kaain Ninewe, ti riai ngkanne n tataro ni bubutii buokara bwa a na kaetaki ao ni katiteboaki ara iango ma ana iango Iehova.

13. Bukin tera bwa ti kona n taekinna bwa e mutiakinia aomata Iehova ni boong aikai?

¹³ E mutiakinia aomata ake a tuai n toro irouna Iehova, ao e ongoraei aia bubutii ana toro. (Mataio 10:11) N te katoto, e kaekaa aia tataro n te aro are “e a boni barekia n iri taangaia.” (Ruka 18:7, 8) I rarikin naba anne, e na boni kakoroi bukin ana berita ma ana kaantaninga ni kabane Iehova n te tai are e a bon tia n namatia. (Abakuka 2:3) N ikotaki naba ma aei, e na kamaunaki te buakaka ni kabane n aron naba are e kamaunaa Ninewe imwin manga karaoan te buakaka irouia kaaina.​—Naum 3:5-7.

14. Tera ae ti riai ni karaoia ngkai ti a tabe ni kariariaa ana bong Iehova ae kakannato?

¹⁴ Ti kona n teimatoa ni katabeira ni kaakaraoa nanon Iehova ni karokoa te tai are e nang kamaunaki iai te waaki ae buakaka ae ngkai n rokon ana bong Iehova ae kakannato, are ti kariariaa? Ti aki ataia bwa buburara te mwakuri n tataekina te rongorongo ae riai ni katiaaki imwain rokon ana bong Iehova, ma ti tii ataia bwa e na boni kakoroaki nanon te Atua ibukin tataekinan rongorongon te Tautaeka n Uea aei i aonnaba ni bane imwain rokon te toki. Ao ni koauana, ti riai ni mutiakin “bwaai aika tatangiraki” aika ti nang anganaki, ngkai e teimatoa Iehova ni kaona mwaneabana n te mimitong.​—Akai 2:7.

E Kaotiotaki Ara Iango man Ara Mwakuri

15. Tera ae na kakorakoraa riki kani karaoan te mwakuri n ua rongorongo?

¹⁵ Tao ti kona ni maeka n te tabo ae a aki bati ni kan ongora aomata iai nakon te rongorongo ae ti tataekinna, ao akea naba nanora ni kani mwaing nakon taabo ike e korakora riki iai kainnanoaia taan tataekina rongorongon te Tautaeka n Uea. Iangoia bwa aongkoa tii tengaun aika kona ni kuneaki n ara tabo imwain rokon te toki. E reke iroura te namakin ae e rangi ni manena kakaaeaia aomata akana tengaun akanne? E noria aomata aika bati Iesu, ao e “nanoangaiia, ba a rawawata, ao a mae nako, n ai aroia tiibu aika akea te tia kawakinia.” (Mataio 9:36) Ngkana ti reiakina te Baibara ao ni wawareki rongorongo aika mena n Te Taua-N-Tantani ao te Awake!, ti na kona ngkanne ni karekei otara aika raka riki ibukin karuanikain te aonnaba aei. Ao ngkanne e nang kakorakoraa riki te nano ni kan tataekina te rongorongo ae raoiroi. I rarikin anne, nanora ni kakaitau ae ti kaotia ni kamanenan te rongorongo ae boto man te Baibara are katauraoaki rinanon “te toro ae kakaonimaki ae wanawana,” e kona ni korakora riki iai anaan nanora ni kani kabatiaa karaoan te mwakuri aei n te aono ae e a tia ni mwakuriaki n taai aika mwaiti.​—Mataio 24:45-​47; 2 Timoteo 3:14-​17.

16. Ti na kanga ni karikirakea riki uaan ara mwakuri ni minita?

¹⁶ Ngkana ti mutiakinia aomata aika a na kona ni butimwaea te rongorongo ni kakamaiu ae nako man te Baibara, ti na kona iai ngkanne ni kaungaki bwa ti na iaiangoi taai ao aanga aika kakaokoro ibukin kawaraia aomata n ara mwakuri ni minita. Ti a tia n noria bwa a mwaiti aomata aika a aki mena ni mwengaia ngkana ti kawari auti? Ngkana ti a tia, ti kona ngkanne ni kabatiaa riki uaan ara mwakuri ngkana ti bita ara tai ao ara tabo ibukin karaoan te mwakuri n tataekina te rongorongo. A nanako n akawa taan akawa n taai ake a ataia bwa a na kokona iai. Ti kona ni karaoa ae titeboo naba ma aei ni kaineti ma te akawa n taamnei? (Mareko 1:16-​18) Bukin tera bwa ko aki kataia n tataekina te rongorongo n te tairiki ao n uarongorongo rinanon te tareboon? A a tia n noria tabeman bwa a rangi n angaraoi taabo ni mwakete, taabo n tuutaraa, baao ni mwamwananga, kai ni bwati, ao ai titooa ibukin ‘karekeaia aomata aika mwaiti.’ Ti kaotia bwa iai iroura te nano are iroun Aberaam ni kaineti ma aomata, ngkana ti noraki bwa ti kamanenai taai aika a angaraoi ni karaoa iai tataekinan te rongorongo ae raoiroi n taai aika a aki baireaki.

17. Aaro raa aika ti na kona iai ni kaungaia mitinare ao tabeman riki aika mwakuri n aaba aika ianena?

¹⁷ A mwaiti aomata aika bon tuai n ongo rongorongon te Tautaeka n Uea. I rarikin naba ara mwakuri n tataekina te rongorongo, ti kona ni kaota tabeakinaia aomata ao n aki kaaki naba taekaia kaain mwengara? Ti a tia n ongongo taekaia mitinare ke aomata aika kabwanina aia tai n tataekina te rongorongo ae raoiroi n aaba ianena? Ngkana ti a tia, ti kona ngkanne ni koro reta nakoia ni kaota nanora ni kakaitau ibukin aia mwakuri. E na kanga ni kaotaki mutiakinaia aomata ni kabane man te koro reta? A kona ni kakorakoraki mitinare aikai bwa a na teimatoa ni karaoa mwiokoaia anne, man ara reta ni kaunganano ao ni kamoamoaa taekaia iai, ao aroia anne are a a kona ni manga mwaiti riki iai aika a na buokaki ni karekea te atatai ae koaua. (Taani Motiki-Taeka 11:40) Ti kona naba n tataro ibukia mitinare ao ibukia naba ake e korakora irouia kainnanoan te koaua n aaba ake tabeua riki. (I-Ebeto 6:18-​20) Te anga riki teuana ae ti kona iai ni kaota mutiakinaia aomata, boni man ara bwai-n-tangira ae te mwane ibukin buokan te mwakuri ni katobibia te aonnaba ae a kaakaraoia Ana Tia Kakoaua Iehova.​—2 I-Korinto 8:13, 14; 9:6, 7.

Ko Kani Mwaing Naba Ngkoe?

18. Tera ae a a tia ni karaoia Kristian tabeman ibukin karikirakean riki tangiran te kan ongora nakon rongorongon te Tautaeka n Uea i aon abaia?

¹⁸ A a tia ni kakabwaiaki aomata ake a a tia ni mwaing nakon taabo, ike e korakora riki iai kainnanoaia taan uarongorongo ibukin te Tautaeka n Uea, kioina ngkai a a tia ni kakorakoraia n anga boni ngaiia ibukin te mwakuri aei. Ao Ana tia Kakoaua Iehova ake a tiku i aon abaia, a a tia n reiakina te taetae ae ianena bwa a aonga ni kona ni buokiia iabatera ake a roko i abaia, i aon bwaai n taamnei. Ni koauana, a bon rangi n uaana mwakuri aikai. N te katoto, itiman taari mwaane ao aine ake a buokiia I-Tiaina ni kaawan Texas teuana ae bubura i Amerika, a kaoia aomata aika 114 mwaitiia nakon Ana Katairiki te Uea n te ririki 2001. E roko te namakin irouia taari ake a a tia ni buokiia te koraki aikai bwa e a tauraoi aia tabo nakon taiakina.​—Mataio 9:37, 38.

19. Tera ae ko riai ni karaoia, ngkana ko iangoa te mwaing nakon te aba ae ianena ibukini karikirakean riki te mwakuri n uarongorongo iai?

¹⁹ Tao ko kona naba ngkoe ma am utu n iangoa te mwaing, nakon taabo ike e korakora riki iai kainnanoaia taan uarongorongo ibukin te Tautaeka n Uea. Ma te moanibwai ae riai ni karaoaki, bon te “tekateka moa ni wareka boona.” (Ruka 14:28) E a moamoa riki aei, ngkana ko a tia n iangoia bwa ko nang mwaing nakon te aba ae ianena nakoim. Ngkana iai ae reke irouna te iango aei, tao e riai moa n titirakinna ni kangai: “N na kona ni katoki kainnanoia kaain au utu ni kaineti ma au kataumwane? E kona n reke irou te beebwa ni kariaiakaki ibukin mwanangau? I ota n aia taetae kaain te aba anne, ke I tauraoi n reiakina taetaena? I a tia ni karaua moa n iangoa aron mwaitoron ke kabuebuen te tabo arei ao te katei iai? I kona n riki bwa te tia kabebetenano ao tiaki te tia karawawataia raao n onimaki n te aba anne?” (I-Korote 4:10, 11) Ibukin kan ataakin korakoran kainnanoan te mwakuri anne n te tabo ane ko iangoa te mwaing nako iai, e raoiroi riki ngkana ko koro reta nakon mwangan aia aobiti Ana tia Kakoaua Iehova ae tararuaa te uarongorongo ibukin te Tautaeka n Uea n te tabo anne.a

20. E kanga temanna te roro-n-rikirake ae te Kristian ni kabonganaa korakorana ibukin kakabwaiaia raona n onimaki ao aomata riki tabeman n te aba ae ianena?

²⁰ E noria temanna te Kristian ae e irekereke ma te mwakuri ni kateitei ibukin aia Tabo n Taromauri Ana Tia Kakoaua Iehova i Tiaban, bwa iai kainnanoan te rabakau ni kateitei ibukin katean te tabo n taromauri i Paraguay. Kioina ngkai akea buun teuaei ao e namakinna naba bwa e korakora ngkai bon te roro-n-rikirake ngaia, e kukurei ngkanne ni mwaing nakon te aba anne ao ni mwakuri iai i nanon wanua te namwakaina n tii ngaia ae mwakuri ni kabwanina ana tai iai. I nanon tikuna ikekei, e reiakina te taetae n Tibein n te aro ae e a kona ni kairi reirei man te Baibara tabeua. E noria teuaei bwa e korakora naba kainnanoaia taan uarongorongo ibukin te Tautaeka n Uea n te aba aei. Mangaia are, ngke e a oki rikaaki teuaei nako abana i Tiaban, e aki maan imwina ao e a manga oki naba nako Paraguay ni buoka ikoikotakiia aomata aika a na kona ni kamanenaa te Tabo n Taromauri aei.

21. Tera te mwakuri ae ti riai ni moanibwaia, ao tera ara iango ibukia aomata ngkai ti tabe ni kariariaa rokon ana bong Iehova ae kakannato?

²¹ E na kakoauaa raoi te Atua bwa e na boni waaki nako karaoan te mwakuri n tataekina te rongorongo, ni kaineti ma nanona. Ni boong aikai, e a ienikuria rokon te kabanea n tai ibukin taiakini bwaai n taamnei. (Itaia 60:22) Ti bia uataboa te mwakuri n tai n taamnei ao n iangoia aomata n aron iangoakia iroun Atuara ae tatangira ngkai ti tabe ni kariariaa rokon ana bong Iehova.

[Kabwarabwara ae nano]

Ko Uringnga?

• Tera ara iango ibukia aomata ngkai ti tabe ni kariariaa ana bong Iehova?

• Tera ana iango Aberaam ibukia aomata aika raoiroi ake a maeka ngkoa i Totom?

• Tera ana iango Iona ni kaineti ma aomata ake a raraoma i Ninewe?

• Ti na kanga ni kaotia bwa ti uataboa ana iango Iehova ni kaineti ma aomata aika a tuai n ongoraea te rongorongo ae raoiroi?

[Taamnei n iteraniba 14]

E iangoia aomata Aberaam n aron iangoakia iroun Iehova

[Taamnei n iteraniba 15]

E reke naba ana tai Iona ni kakairi n ana iango Iehova ibukia kaain Ninewe ake a raraoma

[Taamnei n iteraniba 16]

E na kairira mutiakinaia aomata bwa ti na iaiangoi taai ao aaro aika kakaokoro nako ibukin tataekinan te rongorongo ae raoiroi