Ti A Riai Riki Ngkai N Tantani Ma Te Nano-n-umaki
“Ma ngaia ae kam na kamarurungingkami n tantani: ba kam aki ata te bong ane E na nako mai iai ami Uea.”—MATAIO 24:42.
1, 2. Tera ae e kaotia bwa ti a maeka ni kabanean tokin te waaki aei?
“TE BWAI ae raka riki iai te kauabwi n tienture, bwa e korakora rikin te buaka iai,” aio are e taekinna te tia koro-rongorongo ae Bill Emmott. Ngke e kaotia teuaei bwa a a tia aomata n taai akekei n rotaki maiuia ni korakoran taiani buaka ao te tiritiri, ao e a manga reitia n taku: “E aki kaokoro te kauabwi n tienture ma tienture ake tabeua n aron bwaai aika riki iai aika te buaka ma te tiritiri, ma te bwai ae okoro iai, bwa e taonaaba iai kaakaraoan mwakuri aikai. Bon te moan tienture are e a riki iai te buaka are kabutaa te aonnaba . . . Ao ibukin katereterean koauan bwaai ake a riki iai, tiaki tii teuana te buaka are e riki iai, ma bon uoua ake ngaai ake a kabutaa te aonnaba.”
2 E a kaman taekinaki iroun Iesu Kristo taekan buaka ake e na irekereke iai ‘te botannaomata teuana n eka nako te botannaomata teuana, ao uean te uea temanna n eka nako uean te uea temanna.’ Ma bwaai aika riki aikai, bon teuana mai buakon kanoan ‘te kanikina ibukin menan Iesu ma aomata ao tokin te waaki ae buakaka aei.’ N ana taetae ni burabeti Iesu ae kakannato aei, ao e mwanewea iai taekan te rongo, aoraki aika kamamate, ao te mwaeiei. (Mataio 24:3, 7, 8; Ruka 21:6, 7, 10, 11) A mwaiti aanga ake a a tia n rikirake riki iai taabangakin ma karuanikain aeka ni kangaanga aikai. E a taotira buakakaia aomata, n aron ae e kona n noraki n aroaroni maiuiia nakon te Atua ao raoia n aomata. E a kona n noraki ngkai buakakan te aroaro ni maiu ao rikiraken mwakuri n iowawa ao te tiritiri. A riki aomata bwa taani kanimwanemwane nakon are a na tangira te Atua, ao a rangi ni katabetabeaki nanoia ni waaki ni kakukurei. Bwaai aikai ni kabane, a kaotia bwa ti a mena n “tai aika kamamate.”—2 Timoteo 3:1-5.
3. Tera aron rotakira ni ‘kanikina aika oti n taai aikai?’
3 Tera am iango ibukin buakakan aia waaki aomata ae e a tabe n ririkirake? A mwaiti aika a aki kani bwerengaki, ake a kakeai bongan bwaai aika karawawataa te nano aika riiriki n taai aikai. Aomata n te aonnaba aei, aika wanawana ao ni korakora n atiki nanoia aomata, a aki ota raoi aia iango n nanon ‘kanikina aika oti n taai aikai.’ Mataniwin Aaro, a aki naba anga te kaetieti ae eti raoi ni kaineti ma aei. (Mataio 16:1-3) E kaumakiia taan rimwina Iesu ni kangai: “Ma ngaia ae kam na kamarurungingkami n tantani: ba kam aki ata te bong ane E na nako mai iai ami Uea.” (Mataio 24:42) E kaungaira ikai Iesu bwa ti na aki tii tantani ma ti na ‘kamarurungira n tantani.’ Ngkana ti kani kamarurungira n tantani, ti riai ngkanne ni kakorakoraira ao ni kakamatairikiira. Aei are e a kainnanoa karaoan ae bati riki nakon, ae tii ataakin ae ti a maeka i nanoni boong aika kaitira, ao ataakin ae a bubuaka boong aikai. Ti riai ni kakoauaa raoi bwa “e a kaan tokini bwaai ni bane.” (1 Betero 4:7) Mai ikanne are ti a kona iai ni marurung n tantani ma te nano-n-umaki. Ma aei te titiraki ae ti riai n iaiangoia: ‘Tera ae e na buokira ni kakorakoraa onimakinan, ae e a kaan te toki?’
4, 5. (a) Tera ae e na kakorakoraa onimakinan ae e a kakaan tokin te waaki aei, ao bukin tera? (b) Tera te bwai teuana ae e katitebooaki iai ana bong Noa ma rokon natin te Aomata?
4 Iangoi bwaai ake a kaakaraoaki imwain rikin te bwai ae okoro nakoia aomata n taai akekei, ae taekan te Ieka ae korakora are e riki n ana bong Noa. A rangi ni buakaka aomata n te aro are e a ‘maraki iai nanon’ Iehova. E taku: “N na kamaunaia aomata mai aontano.” (Karikani Bwaai 6:6, 7) Ao e boni karaoa raoi anne. E taku Iesu ni katitebooan te bwai ane riki anne ma taai aikai: “Ai aron ana bongi Noa rokon Natin te Aomata.”—Mataio 24:37.
5 E bon riai bwa ti na kakoauaa bwa e iangoa te waaki ae kaakaraoaki ngkai Iehova bwa aekan ngkoa te waaki are kaakaraoaki imwain rokon te Ieka are e kabutaa te aonnaba. Kioina ngke e kamaunaia aomata aika bubuaka n ana bong Noa, ao e na manga boni kamaunaia naba aomata aika bubuaka ni boong aikai. Ataakin raoi ae titeboo te tai arei ma ara bong aikai, e riai ni kakorakoraira riki bwa ti na kakoauaa, ae e a boni kaan tokin te waaki ae ngkai. Baikara ngkanne bwaai aika a titeboo rikiia n te tai arei ao ngkai? Boni bwaai aika nimaua. Te moanibwai, a kauringaki raoi taekan te kamaunanakoaki are e nang roko.
A Kauringaki Taekan “Baike A Tuai n Noraki”
6. Tera te bwai are e a motinnanoia Iehova bwa e na karaoia n ana bong Noa?
6 E taekina ae kangai Iehova n ana bong Noa: “E na aki mamakuri Tamneiu i nanoia aomata n aki toki, ngkai bon iriko naba ngaiia: ma ngaia aei, ba a na ti tebubua ma uangaun te ririki maitin aia ririki.” (Karikani Bwaai 6:3) Karokoan ana moti te Atua aei n 2490 B.C.E., e kanikinaea te tai are e nang moanaki iai kamaunakia aomata aika bubuaka n te tai arei. Iangoia moa, bwa tera nanon te tua anne ibukia te koraki ake a maiu n te tai arei! Ai tii 120 riki te ririki ao Iehova e ‘nang karokoa te ieka ae te ran i aonaba, bwa e na kamaunai mai aani karawa iriko ni kabane, aika e mena i nanoia te ikeike ni maiu.’—Karikani Bwaai 6:17.
7. (a) Tera are e karaoia Noa ni kaineti ma te kauring ibukin te Ieka? (b) Tera ae ti riai ni karaoia ibukin kauring aika kaineti ma tokin te waaki ae ngkai?
7 E a kaman anganaki te kauring Noa ibukin te kabuanibwai are e nang riki, tatabebwi te ririki imwain rikina, ao e kamanena raoi te tai anne ni katauraoia bwa e aonga ni kamaiuaki. E taku te abotoro Bauro: “Ngke e a tia n tuangaki iroun te Atua baike a tuai n noraki, ao e wanawana [Noa, NW] ni makua” ao ‘e karaoa te aake bwa e na kamaiuia ana utu.’ (Ebera 11:7) Ao ngaira, tera arora? Tao ai 90 ngkai te ririki n nako man te tai are e moanaki iai kabanean bongin te waaki aei n 1914. Ti a boni mena raoi n “tain te toki.” (Taniera 12:4) Tera ae ti riai ni karaoia ni kaineti ma kauring ake ti a tia n anganaki? E taku te Baibara: “Ane kakaraoa ae E tangiria te Atua, ao e teimatoa n aki toki.” (1 Ioane 2:17) Mangaia are mangkai te tai n umaki ni karaoa nanon Iehova.
8, 9. Baikara kauring aika a a tia ni kaotaki n taai aikai, ao a kanga n tataekinaki?
8 N taai aikai, taan reirei n te Baibara aika kakaonimaki, a a tia n reiakinna man te Baibara ae kairaki koreana, bwa e nang roko n te tai are e nang kamaunaki iai te waaki ae ngkai. Ti onimakina raoi aei? Nora naba are e taekinna ni katereterea Iesu Kristo: “E na bati te rawawata iai, ae akea arona ma ngke a moa ni karikaki aonaba, ao bon akea arona naba rimwi.” (Mataio 24:21) E taekinna naba Iesu bwa e na kaoti bwa ana tia Moti te Atua ae e a tia n rineia, ao e na kaokoroia aomata n ai aron te tia kawakin-tiibu are e kaokoroia tiibu mai buakoia kooti. A na nako te koraki ake a kuneaki bwa a bubuaka, “nakon reken te kai are aki toki: ma e na nako te koraki ae raoiroi nakon te maiu are aki toki.”—Mataio 25:31-33, 46.
9 E a tia Iehova ni kairiia ana aomata bwa a na mutiakin kauring aikai, ngke e karokoi taeka ni kauring rinanon te marike n taamnei are e katauraoaki iroun “te toro ae kakaonimaki ae wanawana.” (Mataio 24:45-47) Ma ae kakawaki riki, bwa a a tia ni kaoaki aomata mai buakoia natannaomata, baronga, taian taetae ao ai aomata nako, bwa a na “maka te Atua ma n anganna neboana, ba e a roko ana tai ni motikitaeka.” (Te Kaotioti 14:6, 7 BK) Te kauring ibukin Ana Tautaeka n Uea te Atua are e na waekoa ni kamaunaa aia tautaeka aomata, boni kanoan naba te rongorongo ibukin te Tautaeka n Uea are e tataekinaki i aonnaba ni bane irouia Ana tia Kakoaua Iehova. (Taniera 2:44) E aki riai ni kakeaaki bongan te kauring aei. E kaakakoroi bukin ana berita nako te Atua ae Moan te Mwaaka. (Itaia 55:10, 11) E kakoroa bukin ana berita n ana bong Noa, ao e na manga kakoroa naba bukin ana taeka n ara bong aikai.—2 Betero 3:3-7.
E a Moanna n Taabangaki te Wene ni Bure ae Kammaira
10. Tera ae e kona n taekinaki ibukin te wene ni bure ae kammaira n ana bong Noa?
10 E irekereke naba taai aikai ma ana bong Noa n te itera riki teuana. E a tia n tua Iehova nakon te moani mwaane ao te moan aine bwa a “na kaona aonaba” n aia kariki, rinanon kabonganan aia konabwai ni kakariki are e a tia n angania te Atua, n te aro ae riai ni kaineti ma te babaire n te mare. (Karikani Bwaai 1:28) N ana bong Noa, anera ake a aki-ongeaba a moan karika karaoan te wene ni bure ae aki-riai are tiaki kanoan ana babaire te Atua. A ruo nako aon te aba, a onei rabwataia, ao a wene ni bure ma aine aika tikiraoi, ni karikiia natiia aika anti-ma-aomata, aika aranaki bwa Nebirim. (Karikani Bwaai 6:2, 4) Aia bure anera aika e korakora tangiran te wene ni bure irouia aikai, e kabotauaki ma kammairaia kaain Totom ma Komora. (Iuta 6, 7) N tokina, e a taabangaki te wene ni bure ae kammaira ni boong aikai.
11. Tera te aroaro ae e riiriki n taai aikai ae e titeboo ma are n ana bong Noa?
11 Tera aron te aroaro ni maiu ni boong aikai? Ni boong aika kaitira aikai, ao e a tatangiraki te wene ni bure irouia aomata aika mwaiti. E kabwarabwaraa raoi Bauro taekaia aomata aika ai aroia akanne bwa a “aki manga namakina te mama,” ao a mwaiti aika a anga rabwataia nakon “baika a bubuaka, a karaoi bai ni kabane aika a kamara n aki karaurau.” (I-Ebeto 4:19, BK) E a taabangaki matakuakinan taamnei aika bwaitingako, karaoan te wene ni bure imwain te mare, te bwaitingako nakoia ataei, ao ai te iein irouia aomata aika titeboo aroia n aron te aine ma te aine. Tabeman i buakoia te koraki aei, a a tia n “reke iai kaia ae e riai i bukin aia bure” n te aro are e a reke irouia aorakin te wene ni bure, te raure n te utu, ao te kangaanga ni kaineti ma aia mwakuri.—I-Rom 1:26, 27.
12. Bukin tera bwa ti riai ni karikirakea ribaakin te bwai ae buakaka?
12 N ana bong Noa, ao e a tia Iehova ni karokoa te Ieka ae korakora ao ni kamaunaia aomata ake a bwarua tangiran te wene ni bure. Ti aki riai ni mwanuokina taekan te koaua, are boong aikai, bon tii te arona naba ma ana bong Noa. Te ‘rawawata ae korakora’ ae e a kan roko ngkai, e na kamaunai mataia ‘taani wene ni bure, taani kimoa buun te aomata, mwaane aika baka ni kan aine, ao mwaane aika bure ma raoia ni mwaane’ mai aon te aba. (Mataio 24:21; 1 I-Korinto 6:9, 10; Te Kaotioti 21:8) Ai kakawaki ra karikirakean ribaakin te bwai ae buakaka ao ni kararoaira man waaki ake a na kona ni kairiira nakon karaoan te wene ni bure!—Taian Areru 97:10; 1 I-Korinto 6:18.
E na “Buta Aonaba n te Tiritiri”
13. Bukin tera ngke e “buta aonaba n te tiritiri” n ana bong Noa?
13 E taku te Baibara ni katerea iai taekan te katenua ni bwai are e titeboo iai ara bong aei ma ana bong Noa: “Ao e buakaka te aba i matan te Atua, ao a buta aonaba n te tiritiri.” (Karikani Bwaai 6:11) Te mwakuri n tiritiri bon tiaki te bwai ae e a tibwa riki. Natin Atam are Kain e tiringa tarina are raoiroi. (Karikani Bwaai 4:8) E uringa arona n tiritiri Rameka ao e otea te kario teuana ni kamoamoaa iai taekana ngke e tiringa te ataeinimwaane, aongkoa ibukin kamanoana. (Karikani Bwaai 4:23, 24) Te bwai ae boou rikina n ana bong Noa, bon korakoran te mwakuri n tiritiri. Ngke a iein anera ake a aki ongeaba akekei ma ainen te aonnaba ao a karikiia natiia aika Nebirim, ao e a rikirake ni korakora te mwakuri n tiritiri n te aro ae riao. Aintoa aika iowawa akekei a aranaki bwa “Fellers” ae nanona “te koraki ake a kabwakaia aomata tabemwaang.” (Karikani Bwaai 6:4, NW) Ibukin anne, e a “buta te aonaba n te tiritiri.” (Karikani Bwaai 6:13) Iangoi kangaanga ake e a tia ni kaaitara ma ngaai Noa n ana tai ni kaikawaia rake natina i buakoia aomata aika tiritiri! E ngae n anne, ao e boni kakoauaki Noa bwa e ‘raoiroi i matan Iehova ao i buakon te roro arei.’—Karikani Bwaai 7:1.
14. E a kanga ni “buta aonaba n te tiritiri” n taai aikai?
14 E irianaki maiuia aomata n te tiritiri mangkekei ni karokoa ngkai. N aron are e a tia n noraki koauana n ana bong Noa, ao ti kakoauaa naba n ara tai aikai bwa e a korakora riki ngkai kaakaraoan mwakuri n tiritiri. Ti aki toki n ongongo taekan mwakuri n iowawa i nanon te mwenga, mwakuri n iowawa aika tiritiri, boutokaan tiringaia kaain te reeti teuana, ao tiringaia aomata aika bati irouia taani kakatii aika a aki kakoauaki bwa a na karaoa anne. I rarikin aikai, iai naba te waaki ni katuturaraa are e a riki man taiani buaka. E a manga buta naba aonnaba n te tiritiri. Bukin tera? Tera ae e a tia ni kauekea rikirakena? Kaekan anne, e kaota te aro teuana riki are e titeboo iai ana bong Noa ma ngaira.
15. (a) Tera ae e a tia ni kauekea rikiraken te tiritiri ni boong aika kaitira? (b) Tera ae ti kakoauaa raoi bwa e na bon riki?
15 Ngke e kateaki i karawa ana Tautaeka n Uea te Atua iroun te Mesia n 1914, ao e karaoa ana mwakuri ae moan te kakawaki te Uea are e a tia n rineaki are Iesu Kristo. A karenakoaki mai karawa nako rarikin te aonnaba Tatan te Riaboro ma ana taimonio. (Te Kaotioti 12:9-12) Imwain te Ieka, anera aika aki-ongotaeka, a kitan aroia n anera i karawa tii i nanon te tai ae kimototo ao ni manga okira karawa, ma n taai aikai, a a boni kamwawaki mai iai n aki manga kaokaki. I rarikin anne, a akea naba aia konabwai ni bitii rabwataia nakon te rabwata n aomata i aon te aba, n te aro bwa a na kukurei ni katoki nanoia ni kaibwabwaru. Mangaia are ibukina bwa a nanobubu, a un ao a maaka te motikitaeka ae e a kaan roko, a kariri nanoia aomata ao botaki nako bwa a na karaoi mwakuri aika bubuaka n aron te iowawa ao te tiritiri, are e a korakora riki ngkai nakon are e karaoaki n ana bong Noa. Iehova e kamaunaa te aonnaba are imwain te Ieka imwin kaonrakeana n te buakaka irouia anera aika aki-ongotaeka ao natiia. Ko riai ni kakoauaa raoi bwa e na manga boni karaoa naba aekan anne n ara bong aikai! (Taian Areru 37:10) Ma e ngae n anne, ao te koraki ake a teimatoa n tantani ni boong aikai, a ataia bwa e a kaan kamaiuaia.
E Tataekinaki te Rongorongo
16, 17. Tera te kaaua ni bwai are e titeboo iai ana bong Noa ma ngaira?
16 Te kaaua ni bwai are e titeboo iai aron ara bong aei ma are imwain te Ieka, e noraki n te mwakuri are e karaoia Noa, are e tuangaki bwa e na karaoia. E kabaa te ake ae totoa Noa. E riki naba ngaia bwa “te tia taekina te raoiroi.” (2 Betero 2:5) Tera te rongorongo are e tataekinna? Ana uarongorongo Noa, e katereterea raoi riain te raraoma ibukin te bure ao e katerea naba taekan te kauring ibukin te kabuanibwai ae e a kaan roko. E taku Iesu bwa aomata ake n ana bong Noa a “aki kubara te kauring ni karokoa te tai are e a roko iai te ieka n uotia nako ni kabaneia.”—Mataio 24:38, 39, NW.
17 N aron naba anne, Ana tia Kakoaua Iehova, a botumwaaka ni kakororaoa mwiokoaia n tataekina rongorongon ana Tautaeka n Uea te Atua, are e a tataekinaki ngkai ni katobibia te aonnaba. N angiin aaba nako n te aonnaba, ao a kona aomata ni bon ongo ao ni wareka taekan rongorongon te Tautaeka n Uea n oin aia taetae nako. Te maekatin ae Te Taua-n-Tantani, are e katanoataa ana Tautaeka n Uea Iehova, e a tia n tibwatibwaki n te mwaiti ae raka i aon 25,000,000 ao e boretiaki nakon taetae aika raka i aon 140 mwaitiia. Ni koauana, e a tia n tataekinaki te rongorongo ae raoiroi ibukin ana Tautaeka n Uea te Atua “nakoia botanaomata ni kabaneia.” Ngkana e a tabwanin raoi karaoan te mwakuri n aron are e kaantaningaia te Atua, ao ngkanne e nang bon roko iai te toki.—Mataio 24:14.
18. Tera aron kabotauan butimwaean te rongorongo irouia aomata aika mwaiti ni boong aikai, ma angiia aomata n ana bong Noa?
18 Ngkana ti iaiangoa kerikakin tangiran bwaai n taamnei ao kerikakin te aroaro ni maiu ae riai imwain rokon ngkoa te Ieka, ao e a bebete ngkanne iangoan aroia ana utu Noa, n riki bwa taani ngareakinaki irouia aomata aika a aki kona ni kakoauaa te rongorongo, ao a riki naba bwa bwaai n taetaebuakaki ao ni kakanikoaki. Ma e ngae n anne, ao e bon roko te toki. N aron anne, e na taotira naba mwaitiia “taani kakaniko ni kakaniko” ni boong aika kaitira aikai. Ma e taku te Baibara: “E na roko ana bong te Uea n ai aron te tia ira.”(2 Betero 3:3, 4, 10) E na bon roko n taina are e a tia n namataki. E na aki mwaarara. (Abakuka 2:3) Ai wanawana ra ngaira ngkana ti teimatoa n tantani!
Tii Tabeman Aika A Kamaiuaki
19, 20. Tera te bwai ae ti kona n ataia ae e riki n tain te Ieka ao e na riki naba n tain kamaunakin te waaki aei?
19 Bwaai aika a titeboo rikiia n ana bong Noa ma ngaira, a aki tii kaineti ma aomata aika buakaka ao aroia ni kamaunaki. Kioina ngke iai aika a reke maiuia n tain te Ieka, ao bon titeboo naba ma ae na riki n tokin te waaki ae ngkai. Aomata ake a reke maiuia n tain te Ieka, bon aomata aika nimamannei, ake a kaokoroi aroaroia ma aomata aika mwaiti ake a maiu n taai ake ngkoa. A mutiakina ana kauring te Atua ao a teimatoa ni kaokoroia man te aonnaba ae buakaka n taai akekei. E taku te Baibara: ‘E reke akoan Noa i matan Iehova.’ “Te aomata ae raoiroi Noa, ao moan te eti arona i buakoia ana roro.” (Karikani Bwaai 6:8, 9) Mai buakoia aomata ni bong akekei, ao tii teuana te utu ae e kaainaki irouia ‘tabeman aomata, aika waniman ake a kamaiuaki man te ran.’ (1 Betero 3:20) E anga ana kakabwaia Iehova nakoia ni kangai: “Kam na bati ni kariki, ao kamaitingkami, ao kam na manga kaoon aonaba.”—Karikani Bwaai 9:1.
20 E karau nanora ana Taeka te Atua, ae “te koraki ae uanao” e na “nako mai buakon te rawawata are korakora.” (Te Kaotioti 7:9, 14) Iraman kaain te koraki ae uanao? E taku Iesu: “E wariki te mataroa, ao e irariki te kawai are nako n te maiu, ao a karako akana kunea.” (Mataio 7:13, 14) Ni kabotauaki ma aomata aika maekana te aonnaba ngkai aika 6 tabun te birion, ao e na karako mwaitiia te koraki ake a na kamaiuaki n tain te rawawata ae korakora. Ma a kona ni karekea te kakabwaia ae tii te arona ma are e reke irouia te koraki ake a reke maiuia n tain te Ieka. Aomata aika reke maiuia, a na kona ni karikiia natiia ake a na manga riki bwa kaain te aonnaba ae boou.—Itaia 65:23.
“Kamarurungingkami n Tantani”
21, 22. (a) E na kanga iaiangoan rongorongon te Ieka ni karekea kakabwaiam? (b) Tera te kibu ibukin te ririki 2004, ao bukin tera bwa ti riai ni mutiakina te reirei ae reke iai?
21 E ngae ngke akea irekereken te Ieka ma ara bong aikai, ma e oti raoi iai te kauring are ti aki riai ni kakeaa bongana. (I-Rom 15:4) Bwaai aika titeboo rikiia n ana bong Noa ma ara bong aikai, a riai ni karikirakea riki i nanora ataakin kakawakin, ae bukin tera bwa a riki mwakuri aikai, ao a kamatairikiira naba nakon rokon Iesu ni motiki taekaia aomata aika buakaka, are e kabotauaki ma rokon te tia ira.
22 Ni boong aikai, e a tabe Iesu Kristo ni kaira bairean te mwakuri ni kateitei n taamnei ae rangi ni kakawaki. Ibukin mweeraoia ao kamaiuaia taan taromauri ni koaua, e a kateaki te baretaiti n taamnei ae ai aron te ake. (2 I-Korinto 12:3, 4) Ngkana ti kani kamaiuaki n tain te rawawata ae korakora, ti riai n teimatoa ni mena n te baretaiti anne. E katomimiiaki te baretaiti n taamnei n ana aonnaba Tatan, ao e a bon tatauraoi nako naba ni kabwauta te aomata are e a manga nimatutu n te aro n taamnei. E rangi ni kakawaki bwa ti na ‘kamarurungira n tantani’ ao ni kaotia bwa ti a tauraoi imwain ana bong Iehova.—Mataio 24:42, 44.
Ko Uringnga?
• Tera te kaungaunga are e anga Iesu ni kaineti ma rokona?
• Tera are e kabotaua ma rokona Iesu?
• Baikara aanga ake e a titeboo iai ara tai ma ana bong Noa?
• E na kanga n rotaki nanora n umaki, man iaiangoan bwaai aika titeboo rikiia n ana bong Noa ao n ara bong aikai?
[Kabwarabwaraan n iteraniba]
Te kibu ibukin te ririki 2004: “Kamarurungingkami n tantani . . . Kam na katae nangimi.”—Mataio 24:42, 44.
[Taamnei n iteraniba 9]
E mutiakina te kauring mairoun te Atua Noa. Anne naba arora?
[Taamnei n iteraniba 10]
“Ai aron ana bongi Noa rokon Natin te Aomata”