“E Kunea Momin-te-bwaeao Teuana Ae Rangi Ni Kakawaki”

“Moan te ukoukoraki uean te Atua, ao a tauua akana korakora.”​—MATAIO 11:12.

1, 2. (a) Tera te aroaro teuana ae burenibwai rekena, are e kaatuua taekana Iesu n teuana mai buakon ana kaikonaki ibukin te Tautaeka n Uea? (b) Tera are e taekinna Iesu n te kaikonaki ibukin momin-te-bwaeao are e rangi ni kakawaki?

IAI TE bwai ae rangi ni kakawaki ae ko kani karekea iroum n te aro are ko na kukurei ni kaboonakoi iai am bwai ni kabane ibukina? E ngae ngke a taekinna aomata bwa a kukurei ni kabanei korakoraia n uaiakin tiia tabeua n aron, te kaubwai, te kakannato, te mwaaka ke te nakoa ae rietata, ma e rangi ni burenibwai noran te bwai teuana iroun te aomata are e na kukurei ni kaboonakoi ana bwai ni kabane iai bwa e aonga n reke irouna te bwai anne. E taekina te aroaro aei ae rangi n tamaroa Iesu Kristo ma e burenibwai rekena, n teuana mai buakon ana kaikonaki aika mwaiti, ake a kammwakura te iango ibukin ana Tautaeka te Atua.

² Bon te taetae ni kaikonaki are e tii tuangia taan rimwina Iesu, ao are e aki toki naba n taekinaki bwa te kaikonaki ibukin momin-te-bwaeao ae rangi ni kakawaki. E taku Iesu: “Ana tautaeka n uea te Atua ai aron te tia iokinibwai ae ukoukori momin-bwaeao aika raraoi. Ngke e kunea momin-te-bwaeao teuana ae rangi ni kakawaki, ao e nako, ao e waekoa ni kabooi nako ana bwai ni kabane ao e kabooa momin-te-bwaeao arei iai.” (Mataio 13:36, 45, 46, NW) Tera te reirei man te kaikonaki aei, are e tangiria Iesu bwa a na ataia aomata ake a ongora? Ao ti na kanga ni kona ni kakabwaiaki naba man ana taeka Iesu aikai?

Bobuakan Momin-te-bwaeao

3. Bukin tera bwa a rangi ni kakawaki moomin-bwaeao aika raraoi rimoa?

³ N taai ake rimoa, ao e noraki bwa a rangi ni kakawaki momin-bwaeao bwa bwaai ni katamaroa. E taekinna te tia koro-rongorongo temanna i Rom rimoa, ae Pliny the Elder n te boki teuana, bwa e iaiangoaki momin-te-bwaeao bwa “te kabanea ni kakawaki i buakoni bwaai ni kabane aika kakawaki.” E kaokoro momin-te-bwaeao ma te koora, te tirewa, ke atibu aika kakawaki n ai aron te taiman, bwa a karaoaki momin-bwaeao iroun te man ae maiu. E rangi n ataaki bwa a kona aeka ni bwaeao tabeua ni bita te atibu ae moan te uarereke ae e mena i nanoia, nakon momin-te-bwaeao ae raneanea, ngkana a kaotinakoa tonotonoia bwa e na niroaa te atibu arei ibukin mwengabuakaia n tikuna i nanoia, ni karokoa e a riki te atibu aei bwa momin-te-bwaeao ae raneanea. N taai ake rimoa ao a karerekeaki momin-bwaeao aika a kabanea n tamaroa man Taari are Uraura, te Persian Gulf, ao te Indian Ocean aika taabo aika rangi n raroa ma te aba ae Iteraera. Ni koauana, bon aei raoi bukin taekinan “te tia iokinibwai are ukoukori momin-bwaeao aika raraoi,” iroun Iesu. Ngkana ko ukoukora momin-te-bwaeao ni koaua, e kainnanoaki iai te kakorakora ni mwakuri ae bati.

4. Tera te boto n reirei man ana kaikonaki Iesu ibukin te tia iokinibwai are e mwamwananga?

⁴ E ngae ngke a rangi ni bobuaka momin-bwaeao aika raraoi rimoa, ma e teretere raoi bwa tiaki mwaitin booia are e boto mai iai te reirei are kakawaki are n ana kaikonaki Iesu. N te kabotau aei, ao e aki kabotaua ana Tautaeka n Uea te Atua Iesu ma momin-te-bwaeao ae kakawaki, ma e kaira aia iango nakon “te tia iokinibwai are ukoukori momin-bwaeao aika raraoi” ao nakon naba te bwai are e karaoia ngke e a tia n reke irouna momin-te-bwaeao arei. Tiaki aroia taani bobwai aika rangi n ataaki iroura, te tia iokinibwai ae e ukoukora momin-te-bwaeao n te kaikonaki aei, bwa e rangi ni mwaatai ni kaineti ma momin-te-bwaeao ao e kinai raoi momin-bwaeao aika raraoi aika bwaai ni koaua. E rangi ni kinaa te bwai ni koaua ngkana e noria, mangaia are e aki kona ni mwamwanaki ni momin-bwaeao aika raraoi aika tiaki bwaai ni koaua.

5, 6. (a) Tera ae raka kakawakina ni kaineti ma te tia iokinibwai are n ana kaikonaki Iesu? (b) Tera ae teretere raoi n te kaikonaki ibukin te kaubwai ae raba ae kaineti ma te tia iokinibwai are e mwamwananga?

⁵ Iai riki te bwai ae kakawaki ibukin te tia iokinibwai ae okoro aei. Aron te tia iokinibwai ae rangi n ataaki, e warebwaia moa boon momin-te-bwaeao are e na kabooaki iai, n te aro are e na kona iai ni katautaua boona are e na kabooa iai bwa e aonga ni bairea ana raka mai iai. E kona naba n iangoia bwa tera aron tangiran momin-te-bwaeao anne, bwa e aonga ni kona ni kabooa nako n te tai ae waekoa. Are nanona, e kaatuua riki te aomata aei iangoan ana raka n te tai ae waekoa, ma akea nanona ni kani bwaina momin-te-bwaeao anne. Ma, e kaokoro aei ma ana iango te tia iokinibwai are n ana kaikonaki Iesu, bwa te bwai ae e tangiria teuaei, bon tiaki te mwane ke norakin ana raka ae korakora. Ni koauana, e kukurei n anga nako “ana bwai ni kabane” are tao ana bwai aika iai irouna ao abana, bwa e aonga ni kona n reke irouna te bwai are e a kua n ukoukoria.

⁶ N aia iango angiia taan iokinibwai, bon te mwakuri n nanobaba te bwai are e karaoia te mwaane are n ana kaikonaki Iesu. E na bon aki kani karaoa te aeka n iokinibwai ae karuanikai aei te tia bitineti ae wanawana. Ma e kaokoro ana iango te tia iokinibwai are n ana kaikonaki Iesu, ni kaineti ma bwaai aika kakawaki. E aki kariaa kaniwangana te mwane ae bati, ma e kaantaningaa te kukurei ao te raunnano kioina ngkai e a reke irouna te bwai ae moan te kakawaki riki nakoni bwaai ni kabane. E kateretereaki te boto n iango ae titeboo ma aei n ana kaikonaki teuana Iesu are e anga, ae kangai: “Uean te Atua ai aron te bwai ae kakawaki are karabaki n te tawana teuana; are e kunea te aomata temanna, ao e karaba, ao e kakatonga iai, ma ngaia are e nako ni kabo ana bwai ni kabane, ao e kaboa te tawana arei iai.” (Mataio 13:44) Eng, e kairaki te mwaane aei bwa e na kabane ana bwai n anganako ibukin kukureina are e reke imwin kunean ao reken te kaubwai irouna. Iai aomata ni bong aikai aika karaoa aei? Iai te kaubwai ae materaoi bwa ko na anga am bwai ni kabane ibukina?

Akana A Ataa Kakawakina

7. E kanga ni kaotia Iesu bwa e rangi ni kakawaki irouna te Tautaeka n Uea?

⁷ E bon taekina “uean te Atua” Iesu n ana kaikonaki. E bon ataia naba bwa e rangi ni kakawaki ana Tautaeka n Uea te Atua. E kakoauaki raoi aei n taian euangkerio. Imwin bwabetitoana n 29 C.E., e “moa n reirei Iesu, ao E taku, Kam na rairi nanomi; ba e a kan roko uean te Atua.” E reireinia aomata aika mwaiti kurikuri rongorongon te Tautaeka n Uea i nanon tenua ma te iterana te ririki. E kabutaa abwakin ao rababan te aba, ni “kabuta taiani kawa ma maeka, n reirei, ma ni kaota rongorongon uean te Atua, ae raoiroi.”​—Mataio 4:17; Ruka 8:1.

8. Tera are e karaoia Iesu ni kaotiota iai bannan te bwai are e na karaoia te Tautaeka n Uea?

⁸ N te aro are e karaoi kakai Iesu aika rangi ni mwaiti ni kabutaa te aba, n ikotaki naba ma katokan aorakia aomata, kaamwarakeaia ake a baki, katokan angibuaka, ao kautaia naba maate, e kaotii naba iai bannan bwaai ake e na karaoi ana Tautaeka n Uea te Atua Iesu. (Mataio 14:14-​21; Mareko 4:37-39; Ruka 7:11-17) N tokina, e kaota koauan boutokaan te Atua ao ana Tautaeka n Uea ngke e a bon anga maiuna bwa e na kamateaki ibukin ana koaua i aon te kai ni kammaraki. N aron te tia iokinibwai are e mwamwananga n anga ana bwai ni kabane ibukin “momin-te-bwaeao teuana ae rangi ni kakawaki,” Iesu e kabongana naba maiuna ni kabane ao ni mate ibukin te Tautaeka n Uea.​—Ioane 18:37.

9. Tera te aroaro ae rangi ni kakawaki are e noraki bwa a kaakaraoia taan rimwin Iesu ake rimoa?

⁹ E aki tii kabanea maiuna Iesu ibukin te Tautaeka n Uea, ma e ikoikota naba te kurubu ae uarereke ake a na riki bwa taan rimwina. E rangi ni kakawaki naba te Tautaeka n Uea irouia taan rimwina aikai. I buakoia naakai bon Anterea, are te tia rimwin Ioane are te tia Bwabetito ngkoa. Ngke a ongo iroun Ioane bwa e kakoauaa ae Iesu bon “ana Tiibutetei te Atua,” a waekoa n anaaki nanoia Anterea ao temanna riki ana reirei Ioane are tao bon temanna mai buakoia natin Tebetaio mwaane ae arana naba Ioane, ao a kawara Iesu ao n riki naba bwa taan onimaki. Ma, e aki toki ikanne aia mwakuri. Ni bon te tai naba anne, e nako Anterea nakon tarina are Timon ao e taetae nakoina ni kangai: “E a reke i roura te Mesia.” E aki maan imwin aei, ao Timon (are e aranaki naba bwa Keba ke Betero) n ikotaki naba ma Biribo ao raoraona are Natanaera, a bane ni kakoauaa naba Iesu bwa bon te Mesia. Ni koauana, e kairaki Natanaera bwa e na taekina ae kangai nakon Iesu: “Bon Natin te Atua Ngkoe; aia Uea Iteraera Ngkoe.”​—Ioane 1:35-49.

Kaumakaki Nakon te Mwakuri

10. Tera aia kaeka taan rimwin Kristo ngke e a manga roko Iesu irouia tabeua te tai, imwin moani kaitibooia ma ngaia?

¹⁰ E kona ni kabotauaki te kimwareirei are a namakinna Anterea, Betero, Ioane ao tabeman riki, ngke e a reke irouia te Mesia, ma te namakin are e reke naba iroun te tia iokinibwai are e mwamwananga, ni kunean momin-te-bwaeao ae rangi ni kakawaki irouna. Tera are a nang karaoia? E aki taekinaki n taian euangkerio bwa tera are a karaoia imwin moani kaitibooia ma Iesu. Ma n taraana, angina mai buakoia a manga okiri anuani maiuiia ake rimoa. Ngke tao ai onoua te namwakaina ke e a kan ririki imwina, e a manga kaitiboo riki Iesu ma Anterea, Betero, Ioane, ao tarin Ioane are Iakobo, ngke a tabe n akawa n Namani Kariraia.a E taku Iesu nakoia ngke e noriia: “Mai ri mwiu, ao N na karaoingkami ba taan akawa aika konami aomata.” Tera aia kaeka? E kangai taekaia Betero ao Anterea n te boki ae Mataio: “A kitan naba aia karaun, ao a iria.” Ao ibukin Iakobo ao Ioane, ti wareka ae kangai: “A kitana naba te boti ma tamaia, ao a iria.” E taekinna naba te boki ae Ruka bwa a “kitani bwaai ni kabane, ao a iriria.”​—Mataio 4:18-22; Ruka 5:1-11.

11. Tao tera bukina are a waekoa iai taan rimwin Iesu ni butimwaea ana wewete?

¹¹ Te koaua bwa e a tibwa reke aia iango n te tai naba anne ae a na rimwin Kristo? E bon aki! E ngae ngke a reita nako aia mwakuri n aia bitineti n akawa n aia utu imwin moani kaitibooia ma Iesu, ma akea te nanououa bwa bwaai ake a a tia n nori ao n ongo n te tai arei, e bon rangi ni korakora riingakin nanoia ao aia iango iai. E a bon tia n reke naba aia tai ae abwabwaki are e kaania teuana te ririki, ibukin kananoan aia iango i aoni bwaai aikai. Ao ngkai, e a roko te tai are a riai ni karaoa iai aia motinnano. A kona uaakai ni katotonga umakin nanon te tia iokinibwai are e mwamwananga, ngke e kunea momin-te-bwaeao are e rangi ni kakawaki, n aron are e kabwarabwaraa Iesu ni kangai, “e nako, ao e waekoa” ni karaoi bwaai ni kabane aika riai bwa e na kona ni kabooa iai momin-te-bwaeao arei? Eng, a boni kaumakaki nanoia ni bwaai ake a a tia n nori ao n ongo. A bon ataia bwa e a roko te tai ni mwakuri. E taekinaki n te rongorongo, bwa a kitan aia bwai ni kabane ao a riki bwa taan rimwin Iesu ngkekei naba.

12, 13. (a) Tera aroia aomata aika mwaiti ni butimwaea ana kakao Iesu? (b) Tera ana taeka Iesu ibukia taan rimwina aika kakaonimaki, ao tera nanon ana taeka aikai?

¹² Ai kaokoro ra aroia te koraki aika kakaonimaki aikai ma tabeman ake a taekinaki n taian Euangkerio, imwina riki! A mwaiti aomata ake a a tia ni katokaki aorakia ke a kaamwarakeaki iroun Iesu, ma a bon teimatoa naba n tabeakin riki aia bitineti. (Ruka 17:17, 18; Ioane 6:26) Iai naba tabeman ake a butiia Iesu bwa a na okiria moa aia utu, ngke e kaoia bwa a na riki bwa taan rimwina. (Ruka 9:59-62) Ni kaitaraa anne, e taekina ae kangai Iesu imwina riki ni kaineti ma te koraki aika kakaonimaki: “Man ana bong Ioane are te tia Bwabetito ni karokoa ngkai, a uaiakin tiaia aomata ae te tautaeka n uea i karawa, ao e reke irouia akana kakorakoraia n uaiakinna.”​—Mataio 11:12, NW.

¹³ Tera ae nanonaki n taeka aika “uaiakin” ao “kakorakoraia n uaiakinna”? Ni kaineti ma te weabe n te taetae n Erene are a anaaki mai iai taeka aikai, e taekinaki ae kangai n te Vine’s Expository Dictionary of Old and New Testament Words: “E nanonaki n te weabe aei te kakorakora ae bati.” Ao ni kaineti ma te kibu aei, e taku te tia rabakau temanna i aon te Baibara ae Heinrich Meyer: “E kabwarabwaraki n te aro aei te ingaingannano ao te kekeiaki mwaaka ae kabaneaki ibukin karekean te Tautaeka n Uea iroun te Mesia . . . E korakora te ingaingannano ao te mwakuri korakora (e a toki moa te aoaori ma te kakaantaninga) ni kaineti ma te tautaeka n uea.” N aron are e karaoia te tia iokinibwai are e mwamwananga, a waekoa aomata aika karako mwaitiia ni baireia bwa tera ae kakawaki riki, ao a kukurei n anganako aia bwai ni kabane ibukin tangiran te Tautaeka n Uea.​—Mataio 19:27, 28; I-Biribi 3:8.

A Buoka Ukoukorana Tabemwaang

14. E kanga Iesu ni katauraoia abotoro ibukin te mwakuri n uarongorongoa te Tautaeka n Uea, ao tera mwina?

¹⁴ I nanon ana tai Iesu ni waakina nako ana mwakuri ni minita, e reiakinia ao ni buokia aomata bwa a na ukoukora te Tautaeka n Uea. E moan rineia 12 mai buakoia taan rimwina, ao e arania bwa abotoro, are nanona aomata ake e kanakoia. E angania mwaane aikai kaetieti ibukin karaoan aia mwakuri ni minita ao taeka ni kauring ibukin kangaanga ao kataaki aika mena imwaia. (Mataio 10:1-42; Ruka 6:12-16) N ririki ake uoua ake imwin anne, a airi ma Iesu uaakai n tataekina te rongorongo ni kabutaa te aba, ike e a reke iai kaanin aia iraorao ma Iesu. A ongora ni baike e taekini, ao n nori naba ana mwakuri aika korakora, ao ana katoto are e karaoia. (Mataio 13:16, 17) Akea te nanououa bwa e rangi ni korakora riingan nanoia ni mwakuri aikai ni kabane, n te aro are a katotonga te tia iokinibwai are e mwamwananga, ao a ingainga n ukoukora te Tautaeka n Uea ma nanoia ni kabane.

15. Tera raoi bukin kakatongaia taan rimwin Iesu, are e taekinna nakoia?

¹⁵ Irarikia abotoro ake 12, e a manga “rineiia riki aomata aika itingaun te Uea, ao E kanakoia ni kakauomania i mwaina nakoni kaawa ni kabane ma taabo ake E kan nako iai.” E a tia n tuangia taekan kataaki ao kangaanga ake a na kaaitara ma ngaai ao e tuangia naba bwa a na tua ae kangai nakoia aomata: “E kaaningkami uean te Atua.” (Ruka 10:1-12) A oki te koraki ake 70 ma te kakatonga ae bati, ao a ribooti nakon Iesu ni kangai: “Te Uea, a bon ongo i roura taimonio n aram.” Ma, tao a a bon rangi ni mimi riki, ngke e a manga taekinna nakoia Iesu, bwa iai te kimwareirei ae korakora riki ae na bwakaria nakon taai aika a na roko, ibukin ingaingannanoia ibukin te Tautaeka n Uea. E taku: “Tai kakatonga n aei, ngkai a ongo i roumi tamnei; ma kam na kakatonga, ngkai a koreaki arami i karawa.”​—Ruka 10:17, 20.

16, 17. (a) Tera are e tuangia ana abotoro ake a kakaonimaki Iesu, n ana kabanea n tairiki ma ngaiia? (b) Tera aron kukureia ao raunnanoia abotoro n ana taeka Iesu?

¹⁶ N ana kabanea n tairiki Iesu ma ana abotoro n Nitian 14, 33 C.E., e a moani karaoa iai te kauring are e a ataaki bwa Ana Katairiki te Uea, ao e tuangia bwa a na kakauringa te tai aei. N te tairiki anne, Iesu e tuangia abotoro ake 11 ake a teimatoa n tiku ma ngaia ni kangai: “Ao ngkami bon aika kam memena ma Ngai ni kaririakiu; ao Ngai I motika ueami nako imi, n ai aron Tamau ngke E motika ueau nako Iu, ba kam na amamarake ma ni momoi n au taibora n ueau; ao ane kam na tekateka i aoni kaintokanuea ni motiki taekaia aia baronga Iteraera ake tengauni ma ua baronga.”​—Ruka 22:19, 20, 28-30.

¹⁷ Ai bati ra te kukurei ao te raunnano are a namakinna abotoro, ngke a ongo taeka akekei mairoun Iesu! A tuangaki bwa a boni kona n anganaki te karineaki ae te kabanea n rietata ao te tibwanga ae okoro ma tibwangaia aomata nako. (Mataio 7:13, 14; 1 Betero 2:9) N aron te tia iokinibwai are e mwamwananga, a a tia n anganako aia bwai aika bati ibukin touan mwin mwanekan Iesu n ukoukora te Tautaeka n Uea. A torobaki raoi nanoia, kioina ngkai e aki matebuaka aia angakarea are a a tia ni karaoia ni karokoa boong aikai.

18. Antai aika a na reke kakabwaiakia naba n te Tautaeka n Uea, irarikia abotoro ake 11?

¹⁸ Bon tiaki tii abotoro ake a mena ma Iesu n te tairiki arei, aika a na kakabwaiaki man te Tautaeka n Uea. Bon ana kaantaninga Iehova bwa e na anaaki te mwaiti ae 144,000 nakon te berita ibukin te Tautaeka n Uea bwa a na uaia n tautaeka ma Iesu Kristo n te Tautaeka n Uea i karawa ae mimitong. Irarikin anne, e noraki naba iroun te abotoro Ioane, te miitara ae taekaia “te koraki ae uanao, ae e aki kona temanna ni warekia, . . . a tei i nanoaan te kaintokanuea, ao i matan te Tiibutetei, . . . ao a kangai: Ana bwai Atuara ae tekateka i aon te kaintokanuea te kamaiu, ao ana bwai naba te Tiibutetei.” Aomata aikai, bon aomata aika a na maekana te aonnaba i aan ana kairiri te Tautaeka n Uea.b​—Te Kaotioti 7:9, 10; 14:1, 4.

19, 20. (a) Tera te nakoa ae kona n reke irouia aomata man baronga nako? (b) Tera te titiraki ae na rinanoaki n te kaongora ae na roko?

¹⁹ E tua ae kangai Iesu nakoia taan rimwina ake a kakaonimaki, teutana te tai imwain waerakena nako karawa: “Kam na nako ni kakiritiania botanaomata ni kabaneia, ni babetitoiia nako nanon aran te Tama ma te Nati ma te Tamnei are Raoiroi; n reireiia ba a na kabane baike I tuangngkami n tauu: ao noria, I a memena naba i roumi ni boongi ni kabane ni karokoa tokin aonaba.” (Mataio 28:19, 20) Mangaia are, a na riki aomata man baronga nako bwa taan rimwin Iesu Kristo. Ao te koraki aikai a na ingainga naba ni kani karekea i nanoia tangiran te Tautaeka n Uea bwa tao e na reke kaniwangaia n te nako karawa ke te tiku i aon te aba, n aron naba are e karaoia te tia iokinibwai are e mwamwananga ni kaineti ma momin-te-bwaeao are raoiroi.

²⁰ E kaotia Iesu n ana taeka bwa e na reitinako te mwakuri ibukin kakaaeaia taan rimwin Kristo ni karokoa “tokin te waaki i aon te aba.” Mangaia are, te koaua bwa iai naba aomata n ara bong aikai, aika titeboo aroia ma te tia iokinibwai are e mwamwananga, aika a kukurei ni kitan aia bwai ni kabane ibukin ukoukoran ana Tautaeka n Uea te Atua? E na rinanoaki te titiraki aei n te kaongora are imwina.

[Kabwarabwara ae nano]

Ko Kona ni Kabwarabwaraa?

• Tera raoi te boto n reirei man te kaikonaki ibukin te tia iokinibwai are e mwamwananga?

• E kanga ni kaotia Iesu bwa e bon rangi ni kakawaki irouna te Tautaeka n Uea?

• Tera are e kairiia Anterea, Betero, Ioane, ao tabeman riki bwa a na kaekaa ana kakao Iesu ni bon te tai naba arei?

• Baikara kakabwaia aika moan raraoi aika mena imwaia aomata man baronga nako?