Ukoukoran “Momin-te-bwaeao Teuana Ae Rangi Ni Kakawaki” Ni Boong Aikai
“E na tataekinaki euangkerion uean te Atua aei i aonaba ni bane ba te bwai ni kaotioti.”—MATAIO 24:14.
1, 2. (a) Tera aron aia namakin I-Iutaia ake n ana bong Iesu, ni kaineti ma Ana Tautaeka n Uea te Atua? (b) Tera are e karaoia Iesu ibukin kamatataan raoi rongorongon te Tautaeka n Uea, ao tera mwina?
E RANGI ni korakora kan ongoraeakinan rongorongon Ana Tautaeka n Uea te Atua irouia I-Iutaia, n rokon Iesu i aon te aba. (Mataio 3:1, 2; 4:23-25; Ioane 1:49) Ma n te moan tai, a aki ota raoi angiia aomata bwa tera aron raababan ana tautaeka ao aron waakinana; a aki naba ataia ae te tautaeka aei e na mena i karawa. (Ioane 3:1-5) Iai naba tabeman i buakoia taan rimwin Iesu aika a aki ota raoi bwa tera Ana Tautaeka n Uea te Atua, ao tera ae a riai ni karaoia ngkana a kani kakabwaiaaki n te aro ae a na riki bwa raon Kristo n uea.—Mataio 20:20-22; Ruka 19:11; Mwakuri 1:6.
2 Teutana imwin teutana, e karaua n reireinia taan rimwina baika bati Iesu, n ikotaki naba ma te kaikonaki ibukin momin-te-bwaeao teuana ae rangi ni kakawaki, are e maroroakinaki n te maekatin are imwain aei, ike e a katuruturua iai nakoia kakawakin aroia ni kakorakoraia n ukoukora te Tautaeka n Uea i karawa. (Mataio 6:33; 13:45, 46; Ruka 13:23, 24) E korakora riingakin nanoia iai bwa e aki maan imwin aei, ao a a riki naakai bwa taan uarongorongoa te Tautaeka n Uea aika teimatoa iai ma te ninikoria, ao a kabutaa rongorongona nakon taabo aika raroa nako, n aron are e taekinaki n te boki ae Mwakuri.—Mwakuri 1:8; I-Korote 1:23.
3. Tera are e taekinna Iesu ibukin te Tautaeka n Uea ni kaineti ma ara bong aikai?
3 Tera ngkanne ae nanonaki ibukin boong aikai? E a tia n taekinaki nakoia aomata aika mirion ma mirion mwaitiia taekan kakabwaia i aon te aonnaba ae te baretaiti i aan ana kairiri te Tautaeka n Uea. N ana taetae ni burabeti Iesu ae kakawaki ibukin “tokin te waaki i aon te aba,” e taekina iai ae kangai: “E na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.” (Mataio 24:3, (NW) 14; Mareko 13:10) E kabwarabwaraa naba bwa e riai ni karaoaki te mwakuri ae abwabwaki aei, n aki ongei kangaanga ke kataaki aika korakora, ao ai te bwainikirinaki naba. Ma e ngae n anne, e a tia naba n anga te karaunano ae kangai: “Ane nanomwaka ni karokoa te toki ao e na kamaiuaki.” (Mataio 24:9-13) Karaoan anne e kainnanoa te nano ni kan anga bon ngkoe ao te nano ni kan tabeakina raoi te mwioko aei, are titeboo ma are kaotiotaki iroun te tia iokinibwai are mwamwananga, are e taekinaki n ana kaikonaki Iesu. Iai ni boong aikai aika kaotiota te aeka n onimaki aei ao te ingaingannano ibukin ukoukoran te Tautaeka n Uea?
Te Kimwareirei ae Reke man Kunean te Koaua
4. Tera aron rotakia aomata ni boong aikai n te koaua ibukin te Tautaeka n Uea?
4 E rangi ni kimwareirei te tia iokinibwai are n ana kaikonaki Iesu, ngke e nora te bwai are e kunea bwa “momin-te-bwaeao teuana ae rangi ni kakawaki.” Ibukin kimwareireina, e a kairaki ngkanne bwa e na kabanea korakorana bwa e aonga n reke irouna momin-te-bwaeao aei. (Ebera 12:1) N aron anne, a anaaki naba nanoia aomata ni boong aikai n te koaua ibukin te Atua ao ana Tautaeka n Uea, ao a kairaki bwa a na karaoa aron anne naba. Ti a kauringaki man aei ana taeka te tari ae A. H. Macmillan, are e korea rongorongona ngke e ukoukora te Atua ma Ana kaantaninga ibukia aomata, n te boki ae Faith on the March. E taku: “Te bwai are I a tia ni kunea, bon titeboo ma te bwai are kuneaki irouia aomata aika ngaa ma ngaa mwaitiia ni katoa ririki. Bon titeboo aomata aikai ma ngkoe ao ngai, kioina ngkai a roko man natannaomata, reeti, aeka ni maiu ao roroia, aika kakaokoro nako. E aki rinorino te koaua, ma e riing nanoia aomata n aekaia nako.”
5. Baikara uaan te mwakuri aei aika raraoi ake a kaotaki n te ribooti ibukin te ririki ni mwakuri ae 2004?
5 E noraki koauan taeka aikai i nanon te ririki teuana ma teuana, irouia aomata aika raraoi nanoia aika ngaa ma ngaa mwaitiia aika a anaaki nanoia n rongorongon Ana Tautaeka n Uea te Atua, ao a katabui maiuiia nakon Iehova bwa a na kaakaraoa nanona. Bon akea kaokoron aei ma ae noraki n te ririki ni mwakuri ae 2004 are e moa man Tebetembwa 2003 ao e toki n Aokati 2004. I nanon namwakaina aika 12, a a tia ni kaota katabuan maiuiia nakon Iehova ni bwabetitoakiia n te ran, aomata aika 262,416 mwaitiia. E karaoaki aei n aaba aika 235 mwaitiia, ike a kairaki iai reirei n te Baibara aika 6,085,387 mwaitiia irouia Ana tia Kakoaua Iehova ni katoa wiki. Aei are e na kona n reke iai buokaia aomata aika kakaokoro aroaroia ni kabane mai buakoia botannaomata aika bati ma baronga ma taian taetae, ni butimwaea te koaua ibukin te rongorongo ni kakamaiu man ana Taeka te Atua.—Te Kaotioti 7:9.
6. Tera bukin te rikirake ae korakora i nanon ririki aika bati?
6 E kanga ni kona ni karaoaki aei? Akea te nanououa bwa bon Iehova ae e katikia nakoina aomata aika a raoiroi nanoia. (Ioane 6:65; Mwakuri 13:48) Ma e ngae n anne, e aki riai ni kamangoraki te nano n tabeakinia aomata ao te mwakuri ae teimatoa ni waaki nako irouia te koraki ake a kabanei korakoraia n ukoukora te Tautaeka n Uea. E korea ae kangai te tari te mwaane ae Macmillan ngke ai 79 ana ririki: “E tuai man bua mairou kaantaningan te bwai are e a tia n taekinaki n te rongorongo ae mena n te Baibara, ni moa man te tai are I moan ataa iai te berita ibukia aoraki ao maate. N te tai naba anne, I a motika nanou bwa N na ukeuke n te Baibara ni kakaaei reirei riki tabeua, bwa I aonga ni kona ni buokiia aomata aika ai arou ake a ukoukora te atatai ibukin te Atua ae Moan te Mwaaka ae Iehova, ao ana kaantaninga aika raraoi ibukia aomata.”
7. Tera te rongorongo are e katereterea te kukurei ao te ingaingannano irouia te koraki ake a kunea te koaua man te Baibara?
7 E noraki naba bwa iai te ingaingannano irouia ana toro Iehova ni boong aikai. Iangoa taekan Nei Daniela ae e mena i Vienna, i Austria. E taku neiei: “E a tia n riki te Atua bwa raoraou ae I rangi n tatangiria ma ngke te tei ngai. I a kaman kan ataa arana ibukina bwa irou, te ara ae te ‘Atua’ e rangi n raroa mairou. Ma I tiku n aki ataa arana ni karokoa e a koro 17 au ririki, ike a a roko iai Ana tia Kakoaua Iehova n au auti ao a kabwarabwarai bwaai ni kabane ake I kan atai ibukin te Atua. E a reke irou te koaua ae rangi ni manena! E korakora ingaingan nanou n te aro are I a tataekina te rongorongo ae raoiroi aei nakoia aomata ni kabane ake I kaitiboo ma ngaiia.” A bwainingarea neiei raona n reirei ibukin ingaingan nanona aei, ma e reitia nako Nei Daniela ni kangai: “Irou, titeboo ma I a nora kakoroan bukin taetae ni burabeti n te Baibara, ibukina bwa I a tia n ataia ae e taku Iesu bwa a na ribaaki ao ni bwainikirinaki taan rimwina ibukin arana. I bon rangi ni kukurei ao ni mimi naba.” N te tai ae waekoa, e a katabua maiuna Nei Daniela nakon Iehova ma ni bwabetitoaki, ao e a moana uaiakinan tiana are te mwakuri ni mitinare. Ngke a a tia ni mareaki Helmut ma Nei Daniela, a kaai n tataekina te rongorongo i buakoia I-Aberika, I-Inria, I-Biribin, ao I-Tiaina, aika maeka i aon Vienna. A mwakuri ngkai bwa mitinare Helmut ao Nei Daniela i Aberika.
A Aki Kerikaki
8. Tera te anga teuana ae a a tia ni kakabwaiaki iai aomata aika mwaiti ibukin kaotiotan tangiran te Atua, ao te kakaonimaki nakon Ana Tautaeka n Uea?
8 Te koaua bwa te mwakuri ni mitinare bon te anga teuana ike a kaotiota iai tangiran te Atua ao aia kakaonimaki nakon ana Tautaeka n Uea, ana aomata Iehova ni boong aikai. N aron te tia iokinibwai are n ana kaikonaki Iesu, a bon anga naba nanoia te koraki ake a karaoa te mwakuri aei, bwa a na mwamwananga nakon taabo aika raroa ibukin te Tautaeka n Uea. Ni koauana, a aki mwananga mitinare aikai ibukin ukoukoran rongorongon te Tautaeka n Uea; ma a nako ni kaongoia aomata aika maeka n taabo aika a rangi n raroa nako, n reireiia ao ni buokiia naba bwa a na riki bwa taan rimwin Iesu Kristo. (Mataio 28:19, 20) A riai n nanomwaaka i aani kangaanga aika raka aroia n aaba aika mwaiti, ma a boni kakabwaiaki man nanomwaakaia.
9, 10. Baikara rongorongo aika kakaongora ake a a tia n rinanona mitinare n taabo aika rangi n raroa n aron te Central African Republic?
9 Nora te katoto teuana n te aba ae te Central African Republic. N te ririki ae nako, ao mwaitiia ake a kaea Kauringan maten Kristo bon 16,184, ae titeboo ma itiua te tai okiokin mwaitiia taan uarongorongoa te Tautaeka n Uea i aon te tabo aei. A taneiai aomata ni karaoi tabeia ni mwengaia i tinanikun aia auti i aan nun te kai, ibukina bwa e tuai roko te iti n angiin taabo i aon n te aba aei. Mangaia are, mitinare aika a mena iai a bon karaoa naba aia mwakuri n te aro anne, ao a tekateka i tinaniku i aan te nuu ngkana a reirei n te Baibara ma aomata. E aki n are e tii ota ke ni mwaitoro te mwakuri i tinanikun te auti, ma iai riki te bwai teuana ae kakawaki ae reke mai iai. A tatangira te Baibara kaain te aba anne ao a tataneiai ni maroro i aon taekan te Aro. A mwaiti aika rirarikiia ngkana a reirei ma aomata, ao a ira naba buakon te reirei.
10 Ngke e tabe ni kaira te reirei n te Baibara temanna te mitinare i tinanikun te auti, ao e a roko naba te roronga temanna ae maeka n iteran te kawai are teuana. E taku teuaei bwa kioina ngkai e tuai ni kawaraki ni mwengana, e riai n roko te mitinare bwa e na reirei naba ma ngaia n te Baibara. Te koaua bwa e kukurei te mitinare arei ni karaoa aei, ao e waekoa n rikirake te roronga ae e reireinaki aei. N te aba naba aei, ao a aki toki bureitiman ni kateia taani Kakoaua n aia tai ni mwamwananga, tiaki ibukin te beebwa ni kaboowi ke ni katuuaia, ma ibukina bwa a tangira katoton Te Taua-n-Tantani ao te Awake! aika boou, ke ni karabwaia ibukin te rongorongo are a rangi ni kukurei n ongoraaia man taiani maekatin aikai.
11. E ngae ngke a mwaiti kataaki, ma tera aia namakin mitinare ake a maan ni karaoa te mwakuri aei?
11 A mwaiti mai buakoia te koraki ake a a tia ni karaoa te mwakuri ni mitinare i nanon 40 ke 50 te ririki aika a bon teimatoa naba ngkai ni kakaonimaki ni beku iai. Ai tikiraoira te katoto aei ibukin te onimaki ao te botumwaaka ibukira ni kabane! A a tia ni karaoa te mwakuri ni mitinare te taangana n aaba aika tenua aika kakaokoro i nanon 42 te ririki. E taku teuare te mwaane: “Iai kangaanga aika ti kaaitara ma ngaai. N te katoto, ti ituaki n te maraeria i nanon 35 te ririki. Ma e ngae n anne, ti bon aki uringaaba ibukin ara motinnano are ti kani mitinare.” E raonna naba neiere buuna ni kangai: “A bon rangi ni mwaiti bwaai aika ti kani kakaitau iai. E rangi ni kakimwareirei te mwakuri ni minita, ao akea te kangaanga ni karekeaia aomata aika kan reirei n te Baibara. Ngkana ko noriia aomata aika reirei n te Baibara bwa a roroko n taiani bobotaki ao n rena ma aomata nako, ai bon titeboo ngkanne ma bobotakiia kaain te utu ae tii te utuna ni katoa tai.”
A “Atongi Baikai ni Kabane ba te Kabuanibwai”
12. E na kanga temanna ni kaotia bwa e rangi ni kakawaki irouna te Tautaeka n Uea?
12 Ngke e kunea momin-te-bwaeao ae rangi ni kakawaki te tia iokinibwai, “e nako ao e waekoa ni kabooi nako ana bwai ni kabane ao e kabooa.” (Mataio 13:46, NW) Te nano ni kan anganako bwaai aika a atongaki bwa a kakawaki, boni kanikinaeaia te koraki ake e rangi ni kakawaki irouia te Tautaeka n Uea. E taekina ae kangai temanna are e na raona Kristo n ana Tautaeka n Uea ae mimitong ae te abotoro Bauro: “I atongi baikai ni kabane ba te kabuanibwai, ngkai moaniban te raoiroi atakini Kristo Iesu are au Uea, are I kabua au bwai ni kabane i bukina, ao I atongi ba maange, ba E aonga n reke Kristo i rou.”—I-Biribi 3:8.
13. Tera are e karaoia temanna man te Czech Republic ibukin kaotan tangiran te Tautaeka n Uea irouna?
13 N aron naba anne, a mwaiti ni boong aikai aika a tauraoi ni karaoi bitaki i aoni maiuiia bwa a aonga ni kakabwaiaki man te Tautaeka n Uea. N aron aei, n Okitobwa 2003, e kunea te boki teuana are buoka aron reiakinan te Baibara te mataniwi n te kuura n reirei i Czech Republic ae ai 60 ana ririki, ae te Knowledge That Leads to Everlasting Life. Imwin warekan te boki aei, e waekoa naba ngkekei teuaei n tuangia Ana tia Kakoaua Iehova ake n ana tabo bwa e kan reirei n te Baibara. E waekoa rikirakena ni kaineti ma karaoan nanon te Atua ao e a moanna n iriri bobotaki ni kabane. Ma tera ngkanne aron ana iango are e na karina ngkoa arana n te rinerine ibukin te mataniwi n te kaawa ao imwina e na kona n ira naba rineaia raoia taani Karaotua? E motika nanona bwa e na kabongana maiuna ibukin uarongorongoan te Tautaeka n uea. E taku, “I a tia ni kona n angania ataein au reirei, booki aika mwaiti ake a aanaki n te Baibara.” E katabua maiuna teuaei nakon Iehova ao e bwabetitoaki n tain te bwabwaro n Turai 2004.
14. (a) Baikara bitaki aika a a tia ni kairaki iai aomata aika mirion ma mirion mwaitiia bwa a na karaoi man rongorongon te Tautaeka n Uea ae raoiroi? (b) Baikara titiraki aika manena aika ti kona n titirakinira iai?
14 A a tia ni butimwaea rongorongon te Tautaeka n Uea n aron naba anne, aomata aika mirion ma mirion mwaitiia ni katobibia te aonnaba. A a tia n otinako mai buakon ana waaki te aonnaba ae buakaka, a kaaki aomataia nikawai, a kitania raoraoia ake rimoa, ao a katinanikua tangiran bwain te aonnaba. (Ioane 15:19; I-Ebeto 4:22-24; Iakobo 4:4; 1 Ioane 2:15-17) Bukin tera bwa a karaoi bitaki aikai ni kabane? Ibukina bwa e korakora irouia karinean ao tangiran kakabwaia aika a na reke man te Tautaeka n Uea, nakon bwaai ni kabane aika kona n reke man te waaki ae buakaka ae ngkai. Titeboo am namakin ma aei, ibukin rongorongon te Tautaeka n Uea ae raoiroi? E kaungaki nanom iai bwa ko na karaoi bitaki aika riai bwa e a aonga ni boraoi anuam, baika ko iangoi bwa a kakawaki, ao tiam aika ko uaiakin, ma baika e tangiri Iehova mairoura? Ko na boni karekei kakabwaia aika rangi ni bati ngkai ao n taai aika a na roko, ngkana ko karaoa aei.
E a Kaan Roko n Tokina te Mwakuri n Tai
15. Tera are e a tia n taetae ni burabetinaki bwa a na karaoia ana aomata te Atua i nanoni boong aika kaitira?
15 E korea ae kangai te tia areru: “A tauraoi am aomata ni iriko n am tai ni buaka.” Te koraki aikai, ake a tauraoi n iri e kaainaki naba irouia ‘ataeinimwaane aika ai aron aoin te karangaina,’ ao te ‘taanga n aine ae abwabwaki aika a tataekina te rongorongo ae raoiroi.’ (Taian Areru 68:11, BK; 110:3) Tera uaan aia kakorakora ni mwakuri ma nanoia ni kan anga ngaiia ni boong aika kaitira aikai, ana aomata Iehova aika mwaane, ataei, ao kaara?
16. Aanga te katoto i aon aroia ana toro te Atua ni karababaa nako aia atatai, ibukin buokaia aomata riki tabeman bwa a na kona n reiakina te Tautaeka n Uea.
16 E tabeaianga temanna te bwaiania ke te tia uarongorongoa te Tautaeka n Uea ae kabwanina ana tai iai i aon Inria, n aron te anga ae a na kona ni buokaki iai aomata aika bonotaninga n reiakina rongorongon te Tautaeka n Uea, aika tao uoua te mirion mwaitiia. (Itaia 35:5) E moti ana iango neiei bwa e nang rin n te reirei ibukin te taetae n te bai ni kaawan Bangalore. Ngke e mena iai, e a reke ana tai n tibwatibwaa te kaantaninga ibukin te Tautaeka n Uea nakoia bonotaninga aika mwaiti, ao a a kateaki kurubu ibukin te reirei n te Baibara mai iai. I nanon tabeua te wiki, e a raka i aon 12 mwaitiia aomata aika roroko nakon taian bobotaki n te Tabo n Taromauri. N tain te baka ni mare teuana imwina riki, e a manga kaitiboo te bwaiania aei ma te roronga ae bonotaninga mai Calcutta. A mwaiti ana titiraki teuaei ao e kaota naba korakoran nanona ni kani kabatiaa riki ana atatai ibukin Iehova. Ma e ngae n anne, ao bon iai naba te kangaanga ae riki. E nang manga oki te roronga aei nako Calcutta, ae tao 1,600 te kiromita raroana, bwa e na kataneiai n te kuura ae rietata iai, ao akea mai buakoia taani Kakoaua n te tabo arei ae rabakau n taetae n te bai. Mangaia are, e a kakorakoraa teuaei ni bubutiia tamana bwa e na kaea te kuura i Bangalore, bwa e aonga ni kona ni waakina nako ana reirei n te Baibara. E waekoa n rikirake ana onimaki teuaei, ao imwin teuana te ririki e a katabua maiuna nakon Iehova. E a kairi naba reirei man te Baibara teuaei ma bonotaninga tabeman n ikotaki naba ma raoraona ngkoa, ngke e uarereke. E a tia ngkai te aobiti n tararua i aon Inria, ni baireia bwa a na reiakinaki bwaiania te taetae n te bai bwa a aonga n ibuobuoki n te itera aei.
17. Taekin bwaai aika e kaungaki iai nanom man te ribooti ibukin te ririki ni mwakuri ae 2004 ae mena n iteraniba 13 nakon 16.
17 N te iteraniba 13 nakon 16 n te maekatin aei, ko kona n nora iai te ribooti ibukin aia mwakuri Ana tia Kakoaua Iehova ni katobibia te aonnaba, n te ririki ni mwakuri ae 2004. Karekea am tai teutana n rinanona bwa ko aonga ni kakoauaa iai, ae a boni kakorakoraia ana aomata Iehova ni katobibia te aonnaba ni boong aikai, ni kaatuui aia iango i aon ukoukoran “momin-te-bwaeao teuana ae rangi ni kakawaki.”
Teimatoa n “Ukoukora Moa Uean te Atua”
18. Tera te rongorongo are e aki karinna Iesu n ana kaikonaki ibukin te tia iokinibwai, ao bukin tera bwa e aki karinna?
18 Ngkana ti a manga oki rikaaki nakon ana kaikonaki Iesu are ibukin te tia iokinibwai are e mwamwananga, ti noria iai bwa akea ana taeka Iesu ibukin aron teuaei ni kateimatoaa ana karekemwane imwin kabonakoan ana bwai ni kabane. Ni koauana, tao a kona n titiraki tabeman ni kangai: ‘E na kanga te tia iokinibwai arei ni karekea kanana, kunnikaina ao mwengana, ngkai ai akea nikiran ana bwai irouna? Tera kabwaiana ae e na reke man momin-te-bwaeao are bati ni kakawaki arei?’ A raoiroi titiraki akanne ngkana a iangoaki man te itera n rabwata. Ma tiaki te koaua bwa e kaumakiia taan rimwina Iesu ni kangai: “Kam na ukoukora moa uean te Atua ma ana raoiroi; ao a na bane n raonaki baikai nako imi?” (Mataio 6:31-33) Te boto n iango man te kaikonaki aei, bon kaotiotan tangiran te Atua ma nanora ni kabane ao te ingaingannano ibukin te Tautaeka n Uea. Tera reireiara man aei?
19. Tera te boto n reirei ae ti kona n reiakinna man ana kaikonaki Iesu are taekan momin-te-bwaeao ae rangi ni kakawaki?
19 Ngkana tao ti a tibwa reiakini rongorongo aika raoiroi ke ti a tia n ukoukora te Tautaeka n Uea ao n tuangia naba aomata, taekan kakabwaia mai iai i nanon te tai ae maan, ti riai ngkanne n teimatoa ni kaatuua iaiangoan te Tautaeka n Uea. Bon taai ni karawawata taai aikai, ma e ngae n anne, iai bukina ae ti na iangoa tiara ae ti uaiakinna bwa te bwai ni koaua ae akea kabotauana, ae ai aron momin-te-bwaeao are e kunea te tia iokinibwai. E kaotaki raoi koauan ae ti a mena ngkai i nanon tain “tokin te waaki i aon te aba” ao kakoroan nanon taetae ni burabeti aika n te Baibara, man bwaai aika riiriki n te aonnaba ngkai. (Mataio 24:3, NW) Ti bia katotonga te tia iokinibwai are e mwamwananga, ni kaotiota te ingaingannano ma nanora ni kabane nakon ana Tautaeka n Uea te Atua, ao ni karaoa naba mwiokoara ae tataekinan te rongorongo ae raoiroi ma te kimwareirei ae bati.—Taian Areru 9:1, 2.
Ko Uringnga?
• Tera ae e a tia ni buoka rikiraken mwaitiia taan taromauri ni koaua, i nanon ririki aika bati?
• Tera aroaroia te koraki ake a karaoa te mwakuri ni mitinare ae nonoraki?
• Baikara bitaki aika a a tia ni karaoi aomata imwin ongoraaia n rongorongon te Tautaeka n Uea ae raoiroi?
• Tera te reirei ae kakawaki ae ti kona n reiakinna man ana kaikonaki Iesu are ibukin momin-te-bwaeao teuana ae rangi ni kakawaki?
[Taibora n iteraniba 13-16]
TE RIPOOTI IBUKI AIA RIRIKI NI MWAKURI ANA TIA KAKOAUA IEHOVA AE 2004
(Nori bound volume)
[Taamnei n iteraniba 9]
A tataekina te rongorongo ae raoiroi Daniela ma Helmut n te taetae ae ianena i aon Vienna