Titiraki Mairouia Taan Wareware
Iai rangan te naeta are taetae ngkoa nakon Ewa?
N aron ae koreaki ni Karikan Bwaai 3:14, e kataetaeaki te naeta are e a tia ni kewea Ewa n te oo-n-aroka are i Eten iroun Iehova ae te Atua ni kangai: “Ngkai ko karaoa aei, ao e na kabatiaki riki karekeani kaim nakoia maan aika manana ni kabaneia, ma manin te tawana aika katamanti ni kabaneia; ko na aeae ni birotom, ao ko na amamarake ni bubun te tano n ua tokini bongini maium ni kabane.” E aki kamatataaki n te Baibara bwa tao iai rangan te man are kabonganaki ni mwamwanan Ewa ma a a manga bua. E ngae ngkai a kona ni kairaki tabeman n taeka akana ni Karikani Bwaai 3:14, bwa a na iangoa anne, ma ti aki riai ni motikia n ara iango bwa tao imwain kamaraian te naeta ao bon iai rangana. Bukin tera?
Ae moamoa riki, ti riai n uringnga bwa e kabuakakaki Tatan iroun Iehova ae te anera ae e aki nonoraki are e kamanena te man ae mangori n te aro ae aki riai. E kabwarabwaraa Tatan te Baibara bwa “taman te kewe” ao “te naeta nikawai.” A kaai ni kaineti taeka aikai nakon Tatan ngke e kamanena te naeta bwa ana tia taetae are e karina te nano n aki ongeaba nakon ana kaetieti te Atua iroun Ewa.—Ioane 8:44; Te Kaotioti 20:2.
E karikiia naeta te Atua ao e teretere bwa e a tia Atam n angania naeta araia, imwain kamanenan te naeta iroun Tatan bwa e na kewea Ewa. E aki riai ni bukinaki n aei te naeta ae nanoroo are e kataetaea Ewa. E bon aki ataia te naeta ae e a kunemwaania Tatan, ao e aki kona naba n ota n ana motiki taeka te Atua ibukia te koraki ake a aki ongeaba.
Ma e aera ngke e taekina kamangoran te naeta te Atua? E kaineti raoi kamangoran Tatan n te kaikonaki aei, ma aron karikan te naeta iroun te Atua, ae te kakawakawa i aoni birotona ao n newenewea te tano. E a tia ngkoa n anganaki nnena ae rietata bwa temanna naba ana anera te Atua, ma e a manga kamangoraki ngkai n aron ae taekinaki n te Baibara, bwa nnena bon te Nne ni kaikain ae roo.—2 Betero 2:4.
Irarikina, n aron ae e kona te naeta ni koaua ni kaikoaka bukini waen te aomata, e kona naba Tatan ni nnena ae moan te mangori aei ni kaikoaki bukin waeia ana “kariki” te Atua. (Karikani Bwaai 3:15) E kakoauaki bwa te moan uaa man te kariki anne bon Iesu Kristo, are e kammarakaki n te tai ae kimototo n aia mwakuri ana koraki Tatan. Ma n te tai ae aki maan, e nang kamanatuaki atun te naeta n te aro ni kaikonaki n aki toki iroun Kristo ao raona aika Kristian aika kabiraki n utiia. (I-Rom 16:20) Mangaia are ana kamaraia te Atua nakon te naeta boni bannan mangorin ao kamaunan te “naeta nikawai,” ae Tatan te Riaboro.